ஈரோட்டில் 156mm, மொடக்குறிச்சியில் 94mm! இடி மின்னலுடன் இரவில் கொட்டித் தீர்த்த மிக கனமழை

தமிழ்நாட்டில் நேற்று முதல் வடகிழக்கு பருவமழை தொடங்கியுள்ள நிலையில், மாநிலத்தின் பல பகுதிகளிலும் மழை பெய்து வருகிறது. வறட்சியின் பிடியில் தகித்த ஈரோடு மாவட்டத்தின் பல பகுதிகளிலும் நேற்றிரவு பரவலாக கனமழை கொட்டித் தீர்த்திருக்கிறது. கிட்டத்தட்ட இரண்டு மணி நேரத்திற்கும் மேலாக பெய்த கனமழையால் விவசாயிகள் மிகுந்த மகிழ்ச்சியடைந்துள்ளனர். அதேவேளையில் நகருக்குள் கொட்டித் தீர்த்த மிக கனமழையால் முக்கிய சாலைகளான மீனாட்சி சுந்தரனார் சாலை, மணிக்கூண்டு, காளைமாட்டு சிலை போன்ற பகுதிகளில் வெள்ள நீர் சூழ்ந்து வாகனங்களை இயக்குவதில் சிரமம் ஏற்பட்டுள்ளது. கனமழைவீரப்பன்சத்திரம் பகுதிகளில் மழைநீருடன் கழிவுநீர் கலந்து சில வீடுகள் மற்றும் வணிக நிறுவனங்களுக்குள் வெள்ளநீர் புகுந்துள்ளது. மின்னலின் தாக்கமும் காணப்பட்டதால் பல பகுதிகளில் மின் துண்டிப்பும் ஏற்பட்டுள்ளது. கடந்த 24 மணி நேரத்தில் ஈரோடு மாநகரில் மிக கனமழையாக 156 மில்லிமீட்டரும் மொடக்குறிச்சியில் கனமழையாக 94 மில்லிமீட்டரும் பதிவாகியுள்ளது. வடகிழக்கு பருவமழை தொடரும் பட்சத்தில் நீர்நிலைகள் மற்றும் நிலத்தடி நீர்மட்டம் படிப்படியாக அதிகரிக்கும் என எதிர்பார்க்கப்படுகிறது.