CM Revanth Reddy : హైదరాబాద్‌కు నీరందించే జలాశయాలు ఎండిపోతున్నాయి.. రైతులు సహకరించాలి.. సీఎం రేవంత్ విజ్ఞప్తి

CM Revanth Reddy : రాష్ట్రంలో ఎల్‌నినో ప్రభావం నేపథ్యంలో తెలంగాణ ప్రజలకు.. ముఖ్యంగా రైతులకు సీఎం రేవంత్ రెడ్డి కీలక విజ్ఞప్తి చేశారు. గురువారం ఎల్‌నినో (Elnino) కారణంగా తెలంగాణలో ఏర్పడ్డ పరిస్థితులు, భవిష్యత్తు ప్రణాళికల గురించి ముఖ్యమంత్రి రేవంత్‌ రెడ్డి మంత్రులు, సీనియర్‌ అధికారులతో సమావేశం నిర్వహించారు. అనంతరం మీడియా సమావేశంలో మాట్లాడారు. Also Read : CM Revanth Reddy : తెలంగాణ సీఎంగా ప్రజలకు నా విజ్ఞప్తి ఇదే.. ఎల్‌నినో ప్రభావంపై రేవంత్ రెడ్డి కీలక వ్యాఖ్యలు ఎల్ నినో విషయంలో శాస్త్రవేత్తలు ఊహించినట్లుగానే పరిస్థితులు చేయిదాటి పోయేలా ఉన్నాయని, నీరు, విద్యుత్ కొరతను తీవ్రంగా ఎదుర్కోబోతున్నట్లు సీఎం రేవంత్ రెడ్డి అన్నారు. ఈ నేపథ్యంలో ప్రజలు, రైతులు మరింత అప్రమత్తంగా ఉండాలని సూచించారు. ముఖ్యంగా రైతులు యాసంగిలో ఆరుతడి పంటలను మాత్రమే సాగు చేయాలని సీఎం రేవంత్ రెడ్డి విజ్ఞప్తి చేశారు. గతేడాది ఈ సమయానికి రాష్ట్రంలోని అన్ని రిజర్వాయర్లలో కలిపి 400 టీఎంసీలకుపైగా నీళ్లు అందుబాటులో ఉన్నాయి. ఈ ఏడాది 209 టీఎంసీలు మాత్రమే ఉన్నాయని, ఈ నీళ్లనే పొదుపుగా వాడుకోవాలని సీఎం రేవంత్ రెడ్డి పేర్కొన్నారు. హైదరాబాద్ నీరందించే జలాశయాలు ఎండిపోతున్నాయన్న సీఎం రేవంత్.. రైతులు పెద్ద మనసు చేసుకొని యాసంగి సీజన్లో వరి వేయొద్దని సూచించారు. ఎల్‌నినో ప్రభావం నేపథ్యంలో ప్రజలు, రైతులు ఆందోళన చెందాల్సిన పనిలేదని.. ఎల్ నినోను సమర్ధవంతంగా ఎదుర్కొనేందుకు ప్రభుత్వం అన్ని ప్రయత్నాలు చేస్తుందని చెప్పారు. అయితే, ప్రభుత్వ నిర్ణయాలకు ప్రజలు అన్నివిధాల సహకారం అందించాలని ఈ సందర్భంగా కోరారు. మార్చిలో ఉండాల్సిన ఉష్ణోగ్రతలు అక్టోబర్ నెలలో నమోదవుతున్నాయి. ఉష్ణోగ్రతలు ఎక్కువగా ఉండటం వల్ల విద్యుత్ వినియోగం పెరుగుతోంది. అక్టోబర్ నెలలో ఇంత విద్యుత్ డిమాండ్ గతంలో ఎప్పుడూ లేదు. సాధారణంగా అక్టోబర్ నెలలో 15వేల మెగావాట్ల విద్యుత్ అవసరం ఉంటుంది. ఇప్పుడు అది 20వేల మెగావాట్లకు పెరిగిందని సీఎం రేవంత్ రెడ్డి తెలిపారు. మార్కెట్లో విద్యుత్ ఏ ధరకు దొరికినా కొనేందుకు ప్రయత్నిస్తున్నామని చెప్పారు. ఈ సందర్భంగా సీఎం రేవంత్ రెడ్డి కేంద్ర ప్రభుత్వానికి ఓ విజ్ఞప్తి చేశారు. రాష్ట్రానికి అదనపు విద్యుత్ ఇవ్వాలని కేంద్ర ప్రభుత్వాన్ని కోరుతున్నాం. విద్యుత్ పై ఇచ్చే సబ్సిడీలను పెంచాలని విజ్ఞప్తి చేస్తున్నామని రేవంత్ అన్నారు. ఎల్ నినో కష్టకాలంలో రాష్ట్రాలను కేంద్రం ఆదుకోవాలని అన్నారు. ఎల్‌నినో వల్ల ఎదురయ్యే సమస్యలను పరిష్కరించేందుకు కేబినెట్ సబ్ కమిటీ వేస్తున్నామని, దసరా తరువాత ఉపముఖ్యమంత్రి భట్టి విక్రమార్క నేతృత్వంలో అఖిలపక్ష భేటీ నిర్వహిస్తామని సీఎం రేవంత్ రెడ్డి చెప్పారు. ప్రకృతి విపత్తును జయించేందుకు అందరి సహకారం కావాలన్న సీఎం.. దుష్ర్పచారాలను నమ్మకుండా అందరూ సంయమనంతో ఉండాలని కోరారు.