Fire Accident : ఘోర అగ్నిప్రమాదం.. ఒకే కుటుంబానికి చెందిన ఆరుగురు మృతి

Fire Accident : మధ్యప్రదేశ్‌ రాష్ట్రంలో తీవ్ర విషాద ఘటన చోటుచేసుకుంది. సియోని జిల్లాలోని ఓ ఇంట్లో అగ్నిప్రమాదం సంభవించడంతో ఒకే కుటుంబానికి చెందిన ఆరుగురు ప్రాణాలు కోల్పోయారు. మరో నలుగురు తీవ్రంగా గాయపడ్డారు. పండుగ సంబరాలు జరుపుకోవాల్సిన సమయంలో చోటుచేసుకున్న ఈ ప్రమాదం స్థానికంగా తీవ్ర విషాదాన్ని నింపింది. Also Read : Kukatpally : కూకట్‌పల్లిలో తెల్లవారుజామున భారీ అగ్నిప్రమాదం.. ఛపారా పట్టణంలోని మహావీర్ వార్డులో నివసించే బంగారు ఆభరణాల వ్యాపారి కుందన్ లాల్ సోనీకి చెందిన మూడు అంతస్తుల భవనంలో సోమవారం తెల్లవారుజామున 4 గంటల నుంచి 4.30 గంటల మధ్య మంటలు చెలరేగాయి. ఆ సమయంలో కుటుంబ సభ్యులు ఇంట్లోనే ఉన్నారు. చూస్తుండగానే మంటలు భవనం అంతటా వ్యాపించాయి. ప్రమాదం జరిగిన సమయంలో ఇంట్లో మొత్తం పది మంది ఉన్నట్లు పోలీసులు తెలిపారు. మంటల్లో చిక్కుకున్న ఆరుగురు ప్రాణాలు కోల్పోగా.. మిగిలిన నలుగురిని సహాయక బృందాలు సురక్షితంగా బయటకు తీసుకొచ్చాయి. వారిని చికిత్స నిమిత్తం ఆస్పత్రికి తరలించారు. ఈ ప్రమాదంలో కుందన్ లాల్ సోనీ (75), ఆయన భార్య రాజ్‌కుమారి సోనీ (65), రీతూ సోనీ (42), స్మృతి సోనీ (40), సూర్య సోనీ (45), ఆదిత్య సోనీ (16) మరణించినట్లు పోలీసులు వెల్లడించారు. మృతుల్లో ముగ్గురు మహిళలు, ఒక మైనర్ ఉన్నారు. ఈ ఘటనతో స్థానిక ప్రజలు తీవ్ర భయాందోళనలకు గురయ్యారు. అగ్నిమాపక సిబ్బంది, రెస్క్యూ బృందాలు ఘటనా స్థలంలో మంటలను అదుపులోకి తీసుకొచ్చాయి. అయితే, ఇంతటి భారీ అగ్నిప్రమాదం ఎలా సంభవించిందనే విషయం ఇంకా తెలియరాలేదు. అగ్నిప్రమాదానికి గల కారణాలపై పోలీసులు దర్యాప్తు చేస్తున్నారు. దీపావళి వేళ ఒకే కుటుంబానికి చెందిన ఆరుగురు ప్రాణాలు కోల్పోవడంతో ఛపారా ప్రాంతంలో విషాదఛాయలు అలుముకున్నాయి.