Jasprit Bumrah : జ‌స్‌ప్రీత్‌ బుమ్రా గాయంపై మెక్‌గ్రాత్ కీల‌క వ్యాఖ్య‌లు..

Jasprit Bumrah : స్టార్ పేస‌ర్ జ‌స్‌ప్రీత్ బుమ్రా గాయాలు భార‌త క్రికెట్ జ‌ట్టును క‌ల‌వ‌ర‌పెడుతూనే ఉన్నాయి. శ్రీలంకతో జరగబోయే రెండు మ్యాచ్‌ల టెస్ట్ సిరీస్‌కు ఈ పేసర్‌ను జట్టులోకి ఎంపిక చేసినప్పటికీ, అతని భాగస్వామ్యం బీసీసీఐ సెంటర్ ఆఫ్ ఎక్సలెన్స్ నుండి ఫిట్‌నెస్ క్లియరెన్స్‌పై ఆధారపడి ఉంది. ఇటీవల ఇంగ్లాండ్ పర్యటనలో రెండో వన్డేలో ఫీల్డింగ్ చేస్తుండ‌గా బుమ్రాకు మోకాలికి గాయం అయింది. ప్ర‌స్తుతం బుమ్రా ఈ గాయం నుంచి కోలుకుంటున్నాడు. కాగా.. బుమ్రా గాయాల పై ఆస్ట్రేలియా దిగ్గజ మాజీ పేసర్ గ్లెన్ మెక్‌గ్రాత్‌ ఆసక్తికర వ్యాఖ్యలు చేశారు. బుమ్రా తన కెరీర్‌ను మరికొన్ని సంవత్సరాలు కొనసాగించేందుకు సరైన మార్గాన్ని కనుగొనాలని సూచించారు. ”ఇది పూర్తిగా బుమ్రా నిర్ణయంపైనే ఆధారపడి ఉంటుంది. ఇప్పుడు అతని వయసు 31–32 సంవత్సరాలు మాత్రమే. అతను ఇంకా చాలా కాలం క్రికెట్ ఆడగలడు. అత‌డు త‌న కెరీర్ పొడిగించుకునేందుకు ఓ మార్గం వెతకాలి. దురదృష్టవశాత్తూ అతనికి కొన్ని గాయాలు అయ్యాయి. అయినప్పటికీ అతను ప్రపంచ స్థాయి బౌలర్. అతను టెస్ట్ క్రికెట్‌పైనే దృష్టి పెట్టాలనుకుంటాడా? లేక టీ20లకే పరిమితం కావాలనుకుంటాడా? అనేది అతని నిర్ణయం. అంతేకాదు..అతని శరీరం ఎంతవరకు సహకరిస్తుందనేదీ ముఖ్యమే. బుమ్రా బౌలింగ్ యాక్షన్‌లో చేయి ఎక్కువగా వెనక్కి వంగడం వల్ల మోచేతిపై ఎక్కువ ఒత్తిడి పడుతుంది. అందుకే భవిష్యత్తులో ఏమి జరుగుతుందో చూడాలి.’ అని మెక్‌గ్రాత్ అన్నాడు. ఫాస్ట్ బౌలర్లకు తరచుగా విశ్రాంతి ఇవ్వాలనే విధానాన్ని మెక్‌గ్రాత్‌ సమర్థించలేదు. ‘ఫాస్ట్ బౌల‌ర్ల‌కు గాయాలు కావ‌డం ఆట‌లో స‌హ‌జం. అయితే.. ఈ రోజుల్లో ఫాస్ట్ బౌలర్లను అతిగా జాగ్రత్తగా చూసుకుంటున్నారు. వారిని పూర్తిగా కోలుకునే వరకు విశ్రాంతి ఇస్తున్నారు. నా అభిప్రాయం ప్రకారం.. ఫాస్ట్ బౌలింగ్ వల్ల శరీరంపై పడే ఒత్తిడిని తట్టుకునేలా మరింత బలంగా తయారవ్వాలి. నెలల తరబడి కేవలం రీహ్యాబ్‌లో ఉండటం వల్ల ఫిట్‌నెస్, బలం రెండూ తగ్గిపోతాయి. ఆ తర్వాత మళ్లీ మ్యాచ్ ఫిట్‌నెస్ సాధించడం చాలా కష్టమవుతుంది.’ అని మెక్ గ్రాత్ చెప్పుకొచ్చాడు.