ಮೈಸೂರು, ಬೆಂಗಳೂರಿಗೂ ಬಂದಿದ್ದ ಬಂಧಿತ ಅಮೆರಿಕ ನೌಕಾಪಡೆಯ ಮಾಜಿ ಸಿಬ್ಬಂದಿ – ಸ್ಫೋಟಕ ರಹಸ್ಯ ಬಯಲು

– ಭಾರತದ 100 ದಿನಗಳ ರೂಟ್ ಮ್ಯಾಪ್ ಆಧರಿಸಿ ತೀವ್ರ ವಿಚಾರಣೆ – 8 ತಿಂಗಳು ಗೋವಾದಲ್ಲಿದ್ದು ಬಳಿಕ ಬೆಂಗಳೂರಿಗೆ ಬಂದಿದ್ದ ಬ್ರೌನ್‌ ವಾಷಿಂಗ್ಟನ್‌/ನವದೆಹಲಿ/ಬೆಂಗಳೂರು: ಭಾರತದಿಂದ ನೇಪಾಳಕ್ಕೆ (Nepal) ಪ್ರವೇಶಿಸಲು ಯತ್ನಿಸುತ್ತಿದ್ದ ವೇಳೆ ಸಿಕ್ಕಿಬಿದ್ದ ಯುಎಸ್ ನೌಕಾಪಡೆಯ ಮಾಜಿ ಸಿಬ್ಬಂದಿ ಜೋರ್ಡನ್ ಬ್ರೌನ್‌ (Jordan Brown) ವಿರುದ್ಧ ತನಿಖೆ ಮತ್ತಷ್ಟು ತೀವ್ರಗೊಂಡಿದೆ. ಕಳೆದ 100 ದಿನಗಳಲ್ಲಿ ಜೋರ್ಡನ್‌ ಭಾರತದ ವಿವಿಧ ರಾಜ್ಯಗಳಲ್ಲಿ ಸಂಚಾರ ನಡೆಸಿದ ಪೂರ್ಣ ವಿವರಗಳನ್ನು ಭದ್ರತಾ ಸಂಸ್ಥೆಗಳು ಮರುಪರಿಶೀಲಿಸುತ್ತಿವೆ. ಜೋರ್ಡನ್‌ ಚಲನವಲನಗಳ ಮೇಲೂ ತೀವ್ರ ನಿಗಾ ವಹಿಸಿದ್ದು, ಸ್ಫೋಟಕ ರಹಸ್ಯಗಳನ್ನು ಬಯಲಿಗೆಳಿದಿವೆ. ಭಾರತಕ್ಕೆ (India) ಬಂದಿದ್ದ ಬ್ರೌನ್‌, ಅತ್ಯಂತ ಕಡಿಮೆ ಅವಧಿಯಲ್ಲಿ ಭಾರತದ ದಕ್ಷಿಣ, ಮಧ್ಯ ಹಾಗೂ ಉತ್ತರ ಭಾಗಗಳನ್ನ ಅತ್ಯಂತ ಕಡಿಮೆ ಅವಧಿಯಲ್ಲಿ ಸುತ್ತಿದ್ದ. ಈತನ ಪ್ರವಾಸದ ಮಾದರಿ ನೋಡಿದ್ರೆ ಸಾಮಾನ್ಯ ವಿದೇಶಿ ಪ್ರವಾಸಿಗರಂತೆ ಕಾಣುತ್ತಿಲ್ಲ ಎಂದು ತನಿಖಾ ಮೂಲಗಳು ಸಂಶಯ ವ್ಯಕ್ತಪಡಿಸಿವೆ. ಮೈಸೂರು, ಬೆಂಗಳೂರಿಗೂ ಬಂದಿದ್ದ ಬ್ರೌನ್‌ ಕಳೆದ ಮಾರ್ಚ್ 28 ರಿಂದ ಮೇ 7ರ ವರೆಗೆ ಬ್ರೌನ್‌ ಗೋವಾದ (Goa) ಕನಕೋಣ ಪ್ರದೇಶದಲ್ಲಿ ವಾಸವಿದ್ದ. ನಂತರ ಮೇ 14 ರಿಂದ ಜುಲೈ 7ರ ವರೆಗೆ ಕರ್ನಾಟಕದ ಮೈಸೂರಿನಲ್ಲಿ ಉಳಿದಿದ್ದ. ಜುಲೈ 8 ರಂದು ಬೆಂಗಳೂರಿಗೆ ಬಂದಿದ್ದು, ಜುಲೈ 9ರಂದು ಹೈದರಾಬಾದ್‌ಗೆ ತೆರಳಿದ್ದ. ಜುಲೈ 10 ರಂದು ಒಂದೇ ದಿನ ಮಧ್ಯಪ್ರದೇಶದ ಬಂಡೋಲ್, ಸಿಯೋನಿ ಮಾರ್ಗವಾಗಿ ಉತ್ತರ ಪ್ರದೇಶದ ಪ್ರಯಾಗರಾಜ್‌ಗೆ ತಲುಪಿರುವುದು ತನಿಖಾಧಿಕಾರಿಗಳ ಗಮನ ಸೆಳೆದಿದೆ. ಜುಲೈ 11 ರಂದು ಉತ್ತರ ಪ್ರದೇಶದ (Uttar Pradesh) ಸೋನೌಲಿ ಗಡಿ ಸಮೀಪದ ಭಗವಾನ್‌ಪುರದಲ್ಲಿ ಕೊನೆಯದಾಗಿ ಕಾಣಿಸಿಕೊಂಡಿದ್ದ ಜೋರ್ಡನ್‌, ಅಲ್ಲಿಂದ ನೇಪಾಳಕ್ಕೆ ಅನಧಿಕೃತ ಮಾರ್ಗದ ಮೂಲಕ ಪ್ರವೇಶಿಸಲು ಯತ್ನಿಸಿದ್ದಾನೆ. ಇದೇ ವೇಳೆ ಆತನನ್ನ ಬಂಧಿಸಲಾಗಿದೆ. ಕಡಿಮೆ ಸಮಯ – ಬಹುರಾಜ್ಯಗಳ ಪ್ರವಾಸ ಮೂಡಿಸಿದ ಕಳವಳ ಗುಪ್ತಚರ ಮೂಲಗಳ ಪ್ರಕಾರ, ಜೋರ್ಡನ್ ಬ್ರೌನ್‌ನ ಅತ್ಯಂತ ವೇಗ ಹಾಗೂ ಬಹು-ರಾಜ್ಯಗಳ ಪ್ರವಾಸದ ಕ್ರಮ ಸಾಮಾನ್ಯ ವಿದೇಶಿ ಪ್ರವಾಸಿಗರಿಗಿಂತ ಭಿನ್ನವಾಗಿದೆ. ಪ್ರಮುಖ ನಗರಗಳ ಜೊತೆಗೆ ಸಣ್ಣ ಪಟ್ಟಣಗಳಿಗೂ ಬ್ರೌನ್‌ ತ್ವರಿತವಾಗಿ ಸಂಚರಿಸಿದ್ದಾನೆ. ಇದರ ಹಿಂದಿನ ಉದ್ದೇಶ ಏನೆಂಬುದನ್ನು ತನಿಖಾ ಸಂಸ್ಥೆಗಳು ಪರಿಶೀಲಿಸುತ್ತಿವೆ. ಈ ಪ್ರಕರಣದ ತನಿಖೆಗೆ ಈಗಾಗಲೇ ಕೇಂದ್ರೀಯ ಸಂಸ್ಥೆಗಳೂ ಸೇರಿಕೊಂಡಿವೆ. ಸ್ಥಳೀಯ ಪೊಲೀಸರು ದಾಖಲಿಸಿರುವ ವಿಚಾರಣಾ ವರದಿಯಲ್ಲಿ ಹಲವು ಅನುಮಾನಾಸ್ಪದ ಅಂಶಗಳು ಬೆಳಕಿಗೆ ಬಂದಿವೆ. ವಿಚಾರಣೆಯ ವೇಳೆ ಜೋರ್ಡನ್ ಬ್ರೌನ್ ಅವರ ವರ್ತನೆ ಅಸಹಜವಾಗಿದೆ. ಇದು ಯುದ್ಧದ ಅನುಭವದಿಂದ ಉಂಟಾಗುವ ಪೋಸ್ಟ್ ಟ್ರಾಮಾಟಿಕ್ ಸ್ಟ್ರೆಸ್ ಡಿಸಾರ್ಡರ್ (PTSD) ಅಥವಾ ಗಂಭೀರ ಮಾನಸಿಕ ಆಘಾತದ ಲಕ್ಷಣಗಳಾಗಿರಬಹುದೇ ಎಂಬ ಅನುಮಾನದಲ್ಲಿ ಪೊಲೀಸರು ಪರಿಶೀಲಿಸುತ್ತಿದ್ದಾರೆ. ದೀರ್ಘಕಾಲದ ಮಾದಕ ವಸ್ತುಗಳ ಸೇವನೆಯೂ ಅವರ ವರ್ತನೆಗೆ ಕಾರಣವಾಗಿದೆಯೇ ಎಂಬ ದಿಕ್ಕಿನಲ್ಲಿಯೂ ತನಿಖೆ ಮುಂದುವರಿದಿದೆ. ಅಲ್ಲದೇ ತನಿಖೆ ವೇಳೆ ತನ್ನ ಪಾಸ್‌ಪೋರ್ಟ್‌ ಹಾಗೂ ಇತರ ಪ್ರಯಾಣ ದಾಖಲೆಗಳು ಕಳೆದುಹೋಗಿವೆ ಎಂದು ಜೋರ್ಡನ್ ಬ್ರೌನ್ ತನಿಖಾಧಿಕಾರಿಗಳಿಗೆ ಹೇಳಿಕೊಂಡಿದ್ದಾನೆ. ಅಷ್ಟೇ ಅಲ್ಲ, ಆಗಾಗ್ಗೆ ನಾನು ಗೋವಾ ಪಾರ್ಟಿಗೆ ಬರುತ್ತಿದ್ದೆ, ಮಾದಕ ವಸ್ತುಗಳ ಸೇವನೆಗಾಗಿ ಬರುತ್ತಿದ್ದೆ ಎಂದು ಹೇಳಿದ್ದಾನೆ. ಇದು ಹಲವು ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿವೆ. ಹಾಗಾಗಿ ದಾಖಲೆಗಳು ನಿಜವಾಗಿಯೂ ಕಳೆದುಹೋಗಿವೆಯೇ ಅಥವಾ ಉದ್ದೇಶಪೂರ್ವಕವಾಗಿ ಮರೆಮಾಚಲಾಗಿದೆಯೇ ಎಂಬುದನ್ನ ಪರಿಶೀಲಿಸಲಾಗುತ್ತಿದೆ. ಮತ್ತೊಂದು ಕಡೆ ಜೋರ್ಡನ್‌ ನೇಪಾಳ ಗಡಿಯಲ್ಲಿ ಭದ್ರತಾ ಸಿಬ್ಬಂದಿಯನ್ನ ಕಂಡ ಕೂಡಲೇ ಓಡಲು ಯತ್ನಿಸಿದ್ದಾರೆ, ಇದರ ಬಗ್ಗೆಯೂ ತನಿಖೆ ನಡೆಯುತ್ತಿದೆ. ಒಟ್ಟಾರೆ ಅಮೆರಿಕ ನೌಕಾಪಡೆಯ ಮಾಜಿ ಸಿಬ್ಬಂದಿಯ ನಿಗೂಢ ಸಂಚಾರದ ಹಿಂದಿನ ನಿಜವಾದ ಉದ್ದೇಶವೇನು ಎಂಬ ಪ್ರಶ್ನೆಗೆ ಉತ್ತರ ಹುಡುಕುವ ಕಾರ್ಯವನ್ನು ಭದ್ರತಾ ಸಂಸ್ಥೆಗಳು ಮುಂದುವರಿಸಿವೆ. ಅಮೆರಿಕ ಪ್ರಜೆ ಜೋರ್ಡನ್ ಬ್ರೌನ್ ಯಾರು? ನೇಪಾಳ ಗಡಿಯಲ್ಲಿ ಅನುಮಾನಾಸ್ಪದವಾಗಿ ಬಂಧಿಸಲ್ಪಟ್ಟಿರುವ ಅಮೆರಿಕದ ನೌಕಾಪಡೆಯ ಮಾಜಿ ಸಿಬ್ಬಂದಿ ಜೋರ್ಡನ್ ಬ್ರೌನ್ ಪ್ರಕರಣ ದಿನದಿಂದ ದಿನಕ್ಕೆ ಹೊಸ ತಿರುವು ಪಡೆದುಕೊಳ್ಳುತ್ತಿದೆ. ವಿಚಾರಣೆ ವೇಳೆ ಆತ ತನ್ನ ಬಗ್ಗೆ ಹಲವು ಮಾಹಿತಿಗಳನ್ನ ನೀಡಿದ್ದರೂ, ಅವುಗಳನ್ನು ಸಾಬೀತುಪಡಿಸುವ ಯಾವುದೇ ದಾಖಲೆ ಸಲ್ಲಿಸಲು ವಿಫಲನಾಗಿದ್ದಾನೆ. ಪೊಲೀಸರ ಪ್ರಕಾರ, 36 ವರ್ಷ ವಯಸ್ಸಿನ ಜೋರ್ಡನ್‌ ಬ್ರೌನ್‌ ಸುಮಾರು 6 ವರ್ಷಗಳ ಕಾಲ ಅಮೆರಿಕದ ನೌಕಾಪಡೆಯಲ್ಲಿ ಸೇವೆ ಸಲ್ಲಿಸಿದ್ದಾನೆ. ಈತ ಕ್ಯಾಲಿಫೋರ್ನಿಯಾ ನಿವಾಸಿಯಾಗಿದ್ದು, ಕ್ಯಾಲಿಫೋರ್ನಿಯಾ ವಿವಿಯಲ್ಲಿ ವಿದ್ಯಾಭ್ಯಾಸ ಮಾಡಿದ್ದಾಗಿಯೂ ಹೇಳಿಕೊಂಡಿದ್ದಾನೆ. ಆದ್ರೆ ಈ ಹೇಳಿಕೆಗಳನ್ನು ದೃಢೀಕರಿಸುವ ಯಾವುದೇ ದಾಖಲೆಗಳು ಆತನ ಬಳಿಯಿಲ್ಲ. ಕಳೆದ ಶನಿವಾರ ಉತ್ತರ ಪ್ರದೇಶದ ಸೋನೌಲಿ ಪೊಲೀಸ್ ಠಾಣೆ ವ್ಯಾಪ್ತಿಯ ಮೈನಿಹ್ವಾ ಪ್ರದೇಶದಲ್ಲಿ, ಭಾರತ–ನೇಪಾಳ ಗಡಿಯ 516ನೇ ಗಡಿ ಕಂಬದ ಸಮೀಪ ಎಸ್‌ಎಸ್‌ಬಿಯ 22ನೇ ಬೆಟಾಲಿಯನ್ ಸಿಬ್ಬಂದಿ ನಿಯಮಿತ ಗಸ್ತು ನಡೆಸುತ್ತಿದ್ದ ವೇಳೆ ಜೋರ್ಡನ್ ಬ್ರೌನ್ ಪತ್ತೆಯಾಗಿದ್ದಾನೆ. ಭದ್ರತಾ ಸಿಬ್ಬಂದಿ ಆತನಿಗೆ ನಿಲ್ಲುವಂತೆ ಸೂಚಿಸಿದ್ರೂ, ತಪ್ಪಿಸಿಕೊಳ್ಳಲು ಯತ್ನಿಸಿದ್ದಾನೆ ಎನ್ನಲಾಗಿದೆ. ಬಳಿಕ ಎಸ್‌ಎಸ್‌ಬಿ ಸಿಬ್ಬಂದಿ ಆತನನ್ನು ವಶಕ್ಕೆ ಪಡೆದು ವಿಚಾರಣೆಗೆ ಒಳಪಡಿಸಿದ್ದಾರೆ. ತಪಾಸಣೆ ವೇಳೆ ಆತನ ಬಳಿ 31,460 ರೂ. ನಗದು ಹಾಗೂ ಎರಡು ಮೊಬೈಲ್ ಫೋನ್‌ಗಳು ಪತ್ತೆಯಾಗಿವೆ. ಆದರೆ ಪಾಸ್‌ಪೋರ್ಟ್, ವೀಸಾ ಅಥವಾ ಯಾವುದೇ ಮಾನ್ಯ ಗುರುತಿನ ಚೀಟಿ ಸಿಕ್ಕಿಲ್ಲ. ಇದು ತನಿಖಾಧಿಕಾರಿಗಳ ಅನುಮಾನಕ್ಕೆ ಪ್ರಮುಖ ಕಾರಣವಾಗಿದೆ. ವಿಚಾರಣೆ ವೇಳೆ ದ್ವಂದ್ವ ಹೇಳಿಕೆ ವಿಚಾರಣೆ ವೇಳೆ ಜೋರ್ಡನ್ ಬ್ರೌನ್ ದ್ವಂದ್ವ ಹೇಳಿಕೆಗಳನ್ನ ನೀಡಿದ್ದಾಗಿ ಪೊಲೀಸರು ತಿಳಿಸಿದ್ದಾರೆ. ಮೊದಲು ಪ್ರವಾಸಿ ವೀಸಾದ ಮೇಲೆ ಥಾಯ್ಲೆಂಡ್‌ಗೆ ತೆರಳಿದ್ದಾನೆ, ಅಲ್ಲಿ ತನ್ನ ಪಾಸ್‌ಪೋರ್ಟ್ ಕಳೆದುಕೊಂಡಿದ್ದಾನೆ. ನಂತರ ಸಮುದ್ರ ಮಾರ್ಗದ ಮೂಲಕ ಶ್ರೀಲಂಕಾಗೆ ತೆರಳಿ, ಅಲ್ಲಿಂದ 2025ರ ನವೆಂಬರ್ 2ರಂದು ಸಮುದ್ರ ಮಾರ್ಗದಲ್ಲೇ ಭಾರತ ಪ್ರವೇಶಿಸಿದ್ದಾನೆ. ಅಲ್ಲಿಂದ ಸುಮಾರು 8 ತಿಂಗಳ ಕಾಲ ಗೋವಾದಲ್ಲಿ ವಾಸವಿದ್ದು, ಗೋವಾದಿಂದ ಬೆಂಗಳೂರಿಗೆ, ಅಲ್ಲಿಂದ ಉತ್ತರ ಪ್ರದೇಶಕ್ಕೆ ತೆರಳಿದ್ದಾನೆ. ಅಲ್ಲಿಂದ ನೇಪಾಳ ಪ್ರವೇಶಿಸಲು ಯತ್ನಿಸುತ್ತಿದ್ದಾಗ ಎಸ್‌ಎಸ್‌ಬಿ ಸಿಬ್ಬಂದಿ ಆತನನ್ನು ಬಂಧಿಸಿದ್ದಾರೆ ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ. ಜೋರ್ಡನ್ ಬ್ರೌನ್ ನೀಡಿರುವ ಎಲ್ಲಾ ಹೇಳಿಕೆಗಳ ಸತ್ಯಾಸತ್ಯತೆಯನ್ನು ಅಧಿಕಾರಿಗಳು ಪರಿಶೀಲಿಸುತ್ತಿದ್ದಾರೆ.