ಹೋರಾಟಗಾರರು ಬಂದ್ ಕರೆ ಹಿಂಪಡೆಯಬೇಕು: ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್

ಮೈಸೂರು: ‘ಕಬಿನಿ ಜಲಾಶಯ ಭರ್ತಿ ಹಂತ ತಲುಪಿದ್ದು, ಮುಂದೆ ನಾವ್ಯಾರು ಕಾವೇರಿ ನೀರನ್ನು ಹಿಡಿದಿಡಲು ಆಗದು. ಹೋರಾಟಗಾರರು ರಾಜ್ಯದ ಗೌರವ ಕಾಪಾಡಲು ಬಂದ್ ಕರೆಯನ್ನು ಹಿಂಪಡೆಯಬೇಕು. ಕಾನೂನು ಪಾಲನೆಗೆ ಅವಕಾಶ ಮಾಡಿಕೊಡಬೇಕು’ ಎಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಕೋರಿದರು. ಇಲ್ಲಿನ ವಿಮಾನನಿಲ್ದಾಣದಲ್ಲಿ ಶನಿವಾರ ಪತ್ರಕರ್ತರ ಜೊತೆ ಮಾತನಾಡಿದ ಅವರು ‘ಸದ್ಯ ಒಳಹರಿವು 40 ಸಾವಿರ ಕ್ಯುಸೆಕ್‌ನಷ್ಟಿದೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ. ತಮಿಳುನಾಡಿಗೆ ನೀರು ಹರಿಸುವ ಸಂಬಂಧ ಭಾನುವಾರ ಸರ್ವಪಕ್ಷ ಸಭೆ ಕರೆದಿದ್ದು, ಅಲ್ಲಿ ಒಮ್ಮತದ ತೀರ್ಮಾನಕ್ಕೆ ಬರುತ್ತೇವೆ. ಅಲ್ಲಿವರೆಗೆ ಶಾಂತಿ ಕಾಪಾಡಬೇಕು’ ಎಂದರು. ವಿಜಯ್‌ಗೆ ಇನ್ನೊಮ್ಮೆ ಆಹ್ವಾನ: ‘ಕಾವೇರಿ ನೀರು ಹಂಚಿಕೆ ಸಂಬಂಧ ಪರಸ್ಪರ ಮಾತುಕತೆಗೆ ತಮಿಳುನಾಡು ಮುಖ್ಯಮಂತ್ರಿ ವಿಜಯ್ ಆ. 3ರಂದು ಬೆಂಗಳೂರಿಗೆ ಬರಬೇಕಿತ್ತು. ಆದರೆ ಸದ್ಯ ರಾಜ್ಯದಲ್ಲಿ ಪ್ರತಿಭಟನೆಗಳು ನಡೆದಿದ್ದು, ಪರಿಸ್ಥಿತಿ ತಿಳಿಯಾದ ನಂತರ ಮತ್ತೊಮ್ಮೆ ಬರುವಂತೆ ಕೋರಿದ್ದೇನೆ’ ಎಂದರು. ‘ಕಳೆದ ವರ್ಷ ಇದೇ ಅವಧಿಯಲ್ಲಿ ತಮಿಳಿನಾಡಿಗೆ 16 ಟಿಎಂಸಿ ಅಡಿಯಷ್ಟು ನೀರು ಹರಿಸಲಾಗಿತ್ತು. ಈ ವರ್ಷ ಸಂಕಷ್ಟದ ಪರಿಸ್ಥಿತಿ ಹಿನ್ನೆಲೆಯಲ್ಲಿ ತಮಿಳುನಾಡು ನಿತ್ಯ 9 ಸಾವಿರ ಕ್ಯುಸೆಕ್‌ಗೆ ಬೇಡಿಕೆ ಇಟ್ಟಿದ್ದು, ಪ್ರಾಧಿಕಾರ 3500 ಕ್ಯುಸೆಕ್ ಮಾತ್ರ ಹರಿಸಲು ಆದೇಶಿಸಿದೆ. ಹೀಗಾಗಿ ನಾವು ಹೆಚ್ಚು ಆತಂಕ ಪಡುವ ಅಗತ್ಯವಿಲ್ಲ’ ಎಂದರು. ‌ಕಬಿನಿ ಜಲಾಶಯಕ್ಕೆ ಬಾಗಿನ ಅರ್ಪಿಸುವ ಕುರಿತು ಪ್ರತಿಕ್ರಿಯಿಸಿದ ಅವರು, ‘ಬೇಡ ತಡೆಯಿರಿ. ಈಗಲೇ ಏನೂ ಇಲ್ಲದೆಯೇ ಬಿಜೆಪಿಯವರು ನನ್ನ ಪ್ಯಾಂಟು–ಶರ್ಟು ಹರಿದು ಹಾಕುತ್ತಿದ್ದಾರೆ. ಒಂದು ಕಡೆ ಯಡಿಯೂರಪ್ಪ, ಬಿ.ವೈ. ವಿಜಯೇಂದ್ರ, ಅಶೋಕ್ ಬಂದು ನುಗ್ಗುತ್ತಿದ್ದಾರೆ. ಇನ್ನೊಂದೆಡೆ, ಕರ್ನಾಟಕದ ಹಿತಾಸಕ್ತಿ ರಕ್ಷಣೆಗಾಗಿ ಬಿಜೆಪಿ ಸಚಿವರು–ಸಂಸದರು ದೆಹಲಿಯಲ್ಲಿ ನಮ್ಮೊಂದಿಗೆ ಕೇಂದ್ರ ಸಚಿವರನ್ನು ಭೇಟಿ ಮಾಡಿ, ಅವರ ಪ್ರಾಮಾಣಿಕ ಪ್ರಯತ್ನ ಮಾಡಿದ್ದಾರೆ. ಇದಕ್ಕೆ ನಾನು ಏನು ಹೇಳಲಿ’ ಎಂದರು. ‘ಹೋರಾಟಗಾರರು ಬಂದ್‌ಗೆ ಕರೆ ಕೊಟ್ಟಿದ್ದಾರೆ. ಪ್ರಜಾಪ್ರಭುತ್ವ ವ್ಯವಸ್ಥೆಯಲ್ಲಿ ಹೋರಾಟ ಎಲ್ಲರ ಹಕ್ಕು. ಆದರೆ ಅದು ಕೇವಲ ಮಾಧ್ಯಮಗಳ ಮುಂದೆ ಸೀಮಿತ ಆಗಬಾರದು. ಆಸ್ತಿಪಾಸ್ತಿಗೆ ತೊಂದರೆ ಆಗುವುದಾದರೆ ಸರ್ಕಾರ ಅದನ್ನು ಒಪ್ಪುವುದಿಲ್ಲ. ನಾವೆಲ್ಲ ಒಂದೇ ದೇಶದವರು. ತಮಿಳುನಾಡಿಗೂ ತೊಂದರೆ ಆಗಬಾರದು ’ ಎಂದರು. ‘ನಮ್ಮೆಲ್ಲ ಹೋರಾಟಗಳು ಸೌಹಾರ್ದಯುತವಾಗಿ ನಡೆಯಬೇಕು. ಮಾತುಕತೆಯಲ್ಲಿ ಈ ವಿವಾದ ಬಗೆಹರಿಸಲು ನಮ್ಮ ಸ್ವಾಗತವಿದೆ. ತಮಿಳುನಾಡು ಹಕ್ಕಿಗೆ ನಾವು ಅಡ್ಡಬರುವುದಿಲ್ಲ. ನ್ಯಾಯಾಲಯ ನಮಗೆ ಯಾವ ತೀರ್ಪು ನೀಡಿದೆಯೋ ಅದನ್ನು ಕಾಪಾಡಿಕೊಳ್ಳಲು ಬದ್ಧರಿದ್ದೇವೆ’ ಎಂದರು. ‘ತಮಿಳುನಾಡಿಗೆ 177 ಟಿಎಂಸಿ ನೀಡಬೇಕೆಂಬ ಪ್ರಾಧಿಕಾರ ಹಾಗೂ ಸುಪ್ರೀಂ ಕೋರ್ಟ್ ತೀರ್ಪು ಎರಡೂ ರಾಜ್ಯಕ್ಕೂ ವರ. ಸಮನಾಂತರ ಜಲಾಶಯ ನಿರ್ಮಾಣದ ವಿಚಾರದಲ್ಲಿ ಸುಪ್ರೀಂ ಕೋರ್ಟ್‌ನಲ್ಲಿ ನಮಗೆ ದೊಡ್ಡ ಜಯವಾಗಿದ್ದು, ಕೇಂದ್ರ ಸರ್ಕಾರ ಸಹ ಮೇಕೆದಾಟು ಪರವಾಗಿ ನಿಂತಿದೆ. ಅಣೆಕಟ್ಟೆ ನಿರ್ಮಾಣಕ್ಕೆ ಹಸಿರು ನಿಶಾನೆ ತೋರಿದೆ. ತಮಿಳುನಾಡಿನ ಸಂಸತ್‌ ಸದಸ್ಯರು, ಶಾಸಕರು ಅವರ ರಾಜಕೀಯ ಅಸ್ತಿತ್ವಕ್ಕೆ ಹೋರಾಟ ಮಾಡುತ್ತಿದ್ದು, ಅವರಿಗೂ ಎಲ್ಲದರ ಅರಿವಿದೆ. ಒಂದು ಕಾಲದಲ್ಲಿ ತಮಿಳುನಾಡು ಸರ್ಕಾರ ಸಮನಾಂತರ ಜಲಾಶಯಕ್ಕೆ ಒಪ್ಪಿಗೆ ಸೂಚಿಸಿ ಅಫಿಡವಿಟ್ ಸಹ ನೀಡಿತ್ತು’ ಎಂದು ಸ್ಮರಿಸಿದರು. ತುಂಗಭದ್ರಾ ನದಿಗೆ ಸಮತೋಲನ ಜಲಾಶಯ: ‘ತುಂಗಭದ್ರಾ ನದಿಗೆ ಸಮತೋಲನ ಜಲಾಶಯ ನಿರ್ಮಾಣ ಸಂಬಂಧ ಸಿ.ಎಂ. ಪಾಟೀಲ ನೇತೃತ್ವದಲ್ಲಿ ಮೂರು ರಾಜ್ಯಗಳ ಮುಖ್ಯಮಂತ್ರಿಗಳು ಸೇರಿ ಒಮ್ಮತದ ನಿರ್ಧಾರ ಕೈಗೊಂಡಿದ್ದು, ಈ ಸಂಬಂಧ ಸಮಿತಿ ಸಹ ರಚಿಸಲಾಗುತ್ತಿದೆ. ದೇಶದಲ್ಲೇ ಇದೊಂದು ಐತಿಹಾಸಿಕ ಹೆಜ್ಜೆ’ ಎಂದು ವಿವರಿಸಿದರು.