ಹಸುಗಳ ವಿಮೆ ಹಣದಲ್ಲಿ 16.5 ಕೋಟಿ ಗುಳುಂ – ರಾಬಕೊವಿ ಹಾಲು ಒಕ್ಕೂಟದಲ್ಲಿ ಭಾರೀ ಭ್ರಷ್ಟಾಚಾರ ಆರೋಪ

ಬಳ್ಳಾರಿ: ಇಲ್ಲಿನ (Ballari) ರಾಬಕೊವಿ ಹಾಲು ಒಕ್ಕೂಟದಲ್ಲಿ ಸತ್ತ ಹಸುಗಳ ವಿಮೆ ಹಣದಲ್ಲಿ ಬ್ರಹ್ಮಾಂಡ ಭ್ರಷ್ಟಾಚಾರ (Corruption) ನಡೆದಿರುವ ಗಂಭೀರ ಆರೋಪ ಕೇಳಿ ಬಂದಿದೆ. ಜಾನುವಾರ ವಿಮೆ ಮತ್ತು ಪರಿಹಾರದ 16.5 ಕೋಟಿ ರೂ. ಹಣವನ್ನ ಅಧಿಕಾರಿಗಳು ಗುಳುಂ ಮಾಡಿದ್ದಾರೆ ಎಂದು ರಾಬಕೊವಿ (RABAKOV) ಸಂಘದ ಮಾಜಿ ನಿರ್ದೇಶಕ ಧನಂಜಯ ಹಮಾಲ್ ಆರೋಪಿಸಿದ್ದಾರೆ. ಈ ಸಂಬಂಧ ಅವರು ಬ್ರೂಸ್‌ಪೇಟೆ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದರು. ದೂರಿನ ಅನ್ವಯ ಒಕ್ಕೂಟದ ಎಂಡಿ ಸೇರಿದಂತೆ ಆರು ಜನರ ವಿರುದ್ಧ ಎಫ್‌ಐಆರ್‌ ದಾಖಲಾಗಿದೆ. ಇದನ್ನೂ ಓದಿ: ಭ್ರಷ್ಟಾಚಾರ ಆರೋಪಿಗೆ ರಾಜಾತಿಥ್ಯ – ನ್ಯಾಯಾಧೀಶರ ದಿಢೀರ್ ರೇಡ್‌ನಲ್ಲಿ ಅಕ್ರಮ ಬಯಲು 2018 ರಿಂದ 2026ರ ನಡುವಿನ ಅವಧಿಯಲ್ಲಿ ಈ ಅಕ್ರಮ ನಡೆದಿದೆ. ಡೈರಿಗೆ ಹಾಲು ಹಾಕುವ ರೈತರ ಜಾನುವಾರುಗಳಿಗೆ ಖಾಸಗಿ ವಿಮಾ ಕಂಪನಿಗಳ ಮೂಲಕ ವಿಮೆ ಮಾಡಿಸಲಾಗುತ್ತಿತ್ತು. ಇದರಲ್ಲಿ ಒಕ್ಕೂಟದ ಕಡೆಯಿಂದ 60% ಹಾಗೂ ರೈತರ ಕಡೆಯಿಂದ 40% ರಷ್ಟು ಹಣವನ್ನು ಪಾವತಿಸಲಾಗುತ್ತಿತ್ತು. ಜಾನುವಾರುಗಳು ಮೃತಪಟ್ಟಾಗ ವಿಮಾ ಕಂಪನಿಗಳು ನೀಡುವ ಪರಿಹಾರದ ಹಣವನ್ನು ರೈತರಿಗೆ ತಲುಪಿಸಬೇಕಿತ್ತು. ಆದರೆ ಆರೋಪಿಗಳು ರೈತರಿಗೆ ಬರಬೇಕಿದ್ದ ವಿಮಾ ಹಣ ಹಾಗೂ ರೈತ ಕಲ್ಯಾಣ ಟ್ರಸ್ಟ್‌ನ ಹಣ ಸೇರಿದಂತೆ ಒಟ್ಟು 16.5 ಕೋಟಿ ರೂ. ಹಣಕ್ಕೂ ಅಧಿಕ ಮೊತ್ತವನ್ನು ಅರ್ಹ ರೈತರಿಗೆ ನೀಡದೆ ವಂಚನೆ ಮಾಡಲಾಗಿದೆ. ಈ ಹಣವನ್ನು ತಮ್ಮ ಪರಿಚಯಸ್ಥರಾದ ಕೆ. ಬಸವರಾಜ, ಕೆ. ಈರಮ್ಮ, ಸಾಗರಬಾಬು, ಸಾಗಯ್ಯ ರಾಣಿ ಸೇರಿದಂತೆ ಇತರರ ಖಾತೆಗಳಿಗೆ ಅಕ್ರಮವಾಗಿ ಜಮಾ ಮಾಡಿಲಾಗಿದೆ. ಆ ಹಣವನ್ನು ಸ್ವಂತ ಲಾಭಕ್ಕೆ ಬಳಸಿಕೊಂಡು ಸಂಸ್ಥೆ ಮತ್ತು ರೈತರಿಗೆ ನಂಬಿಕೆ ದ್ರೋಹ ಎಸಗಿದ್ದಾರೆ ಎಂದು ಎಫ್‌ಐಆರ್‌ನಲ್ಲಿ ಉಲ್ಲೇಖಿಸಲಾಗಿದೆ. ಈ ಸಂಬಂಧ ಒಕ್ಕೂಟದ ಮಾಜಿ ಉಪ ವ್ಯವಸ್ಥಾಪಕ ಹಾಗೂ ಹಾಲು ಒಕ್ಕೂಟದ ನಿರ್ದೇಶಕ ಹೆಚ್. ಮರುಳಸಿದ್ದಪ್ಪ, ಎಂಡಿ ಎಸ್. ಸುದರ್ಶನ ರೆಡ್ಡಿ, ಆಡಳಿತ ಮತ್ತು ಯೋಜನೆಗಳ ಉಪ ವ್ಯವಸ್ಥಾಪಕ ವೆಂಕಟೇಶ್ ಜವಳಿ, ಪಶು ವೈದ್ಯಾಧಿಕಾರಿ ಶಂಭುಕುಮಾರ್, ಉಪ ವ್ಯವಸ್ಥಾಪಕ ಹನುಮಂತ ಗೌಡ, ಲೆಕ್ಕ ಸಹಾಯಕಿ ಉಮಾಮಹೇಶ್ವರಿ ಹಾಗೂ ಇತರರ ವಿರುದ್ಧ ಪ್ರಕರಣ ದಾಖಲಾಗಿದೆ. ಇದನ್ನೂ ಓದಿ: KPSC Scam | ಗ್ಯಾನೇಂದ್ರ ವಿರುದ್ಧ ಭ್ರಷ್ಟಾಚಾರ ನಿಯಂತ್ರಣ ಕಾಯ್ದೆಯಡಿ ಕೇಸ್‌ ದಾಖಲು