ಸ್ವಜಾತಿ ನಾಯಕರಿಂದಲೇ ಟಾರ್ಗೆಟ್ ಆಗಿದ್ದರಿಂದ ಬಿಜೆಪಿಯಿಂದ ದೂರ ಉಳಿದಿದ್ದೇನೆ: ಶಿವರಾಮ್ ಹೆಬ್ಬಾರ್

– ಮುಂದೆ ಯಾವ ಪಕ್ಷ ಸೇರಬೇಕು ಅಂತ ಸೂಕ್ತ ನಿರ್ಧಾರ ಎಂದ ಬಂಡಾಯ ಶಾಸಕ ಕಾರವಾರ: ಸ್ವಜಾತಿ ನಾಯಕರಿಂದಲೇ ಟಾರ್ಗೆಟ್ ಆಗಿದ್ದರಿಂದ ಬಿಜೆಪಿ ಪಕ್ಷದಿಂದ ದೂರ ಉಳಿದಿದ್ದೇನೆ ಎಂದು ಬಿಜೆಪಿ ಬಂಡಾಯ ಶಾಸಕ ಶಿವರಾಮ್‌ ಹೆಬ್ಬಾರ್‌ (Shivaram Hebbar) ಪ್ರತಿಕ್ರಿಯಿಸಿದ್ದಾರೆ. ಶಿರಸಿಯಲ್ಲಿ ‘ಪಬ್ಲಿಕ್ ಟಿವಿ’ ಜೊತೆ ಮಾತನಾಡಿದ ಅವರು, ಯಾರೂ ಸುಮ್ಮ ಸುಮ್ಮನೆ ಪಾರ್ಟಿ ಬಿಡಲು ಸಾಧ್ಯವಿಲ್ಲ. ಪಾರ್ಟಿಯನ್ನು ಬಿಡಬೇಕಾದರೆ ಅದರದ್ದೇ ಆದ ಕಾರಣ ಇರುತ್ತದೆ. ಯತ್ನಾಳ್‌ಗೆ ಯಡಿಯೂರಪ್ಪ ಹಾಗೂ ಮಗನ ತೊಂದರೆ ಆಗಿರಬಹುದು. ನಮಗೆ ಜಿಲ್ಲೆಯಲ್ಲಿ ಇನ್ನೊಬ್ಬರ ತೊಂದರೆಯಾಗಿರಬಹುದು. ತೊಂದರೆ ಇರದೇ ಯಾರು ಕೂಡ ಪಾರ್ಟಿಯಿಂದ ದೂರವಾಗಲು ಯಾವ ಕಾರಣಕ್ಕೂ ಪ್ರಯತ್ನ ಮಾಡುವುದಿಲ್ಲ. ಯತ್ನಾಳ್‌ ಅವರಿಗೆ ಏನು ತೊಂದರೆಯಾಗಿದೆ ಅಂತ ನನಗೆ ಗೊತ್ತಿದೆ. ನನಗೆ ಏನು ತೊಂದರೆಯಾಗಿದೆ ಅಂತ ಅವರಿಗೂ ಗೊತ್ತಿದೆ. ನಾವೆಲ್ಲಾ ಸಮಾನ ಮನಸ್ಕರು. ಒಂದೇ ಟೇಬಲ್ ಮೇಲೆ ನಾನು, ಸೋಮಶೇಖರ್, ಯತ್ನಾಳ್ ಜೊತೆ ಕುಳಿತವರು. ಅದರ ಸಾಲಿನಲ್ಲಿ ಮೈಸೂರಿನ ಜಿ.ಟಿ.ದೇವೇಗೌಡರೂ ಬರುತ್ತಾರೆ. ಹಾಗಾಗಿ ನಮ್ಮದೇ ಒಂದು ದೊಡ್ಡ ಪಾರ್ಟಿಯೇ ಇದೆ ಎಂದು ತಿಳಿಸಿದರು. ಇದನ್ನೂ ಓದಿ: ಸಿದ್ದರಾಮಯ್ಯರಿಗೆ ಬ್ಲ್ಯಾಕ್‌ಮೇಲ್‌ ಮಾಡಲು ಯತ್ನ, ಸ್ಟಿಂಗ್‌ನಲ್ಲಿ ಕಾಂಗ್ರೆಸ್‌ ಮಹಿಳೆಯೇ ಇದ್ದಾಳೆ: ಯತೀಂದ್ರ ಸ್ಫೋಟಕ ಹೇಳಿಕೆ ಚುನಾವಣೆ ಸಮೀಪ ಬರ್ತಾ ಇದೆ. ಹೀಗಾಗಿ, ಪಕ್ಷಕ್ಕೆ ಕರೆತರಲು ಪ್ರಯತ್ನ ನಡೀತಾ ಇದೆ. ಹೇಗಾದರೂ ಮಾಡಿ 2028 ರಲ್ಲಿ ಬರುವ ಚುನಾವಣೆ ಗೆಲ್ಲಬೇಕು ಅಂತ ಏನೇನೋ ಪ್ರಯತ್ನ ಸಾಗಿದೆ. ಯತ್ನಾಳ್ ಅವರು ಯಾವ ಕಾರಣಕ್ಕೂ ಬಿಜೆಪಿಯಿಂದ ಕಾಲು ಹೊರಕ್ಕೆ ತೆಗೆದೇ ಇಲ್ಲ. ವೈಯಕ್ತಿಕವಾಗಿ ದ್ವೇಶ, ಭಿನ್ನಾಭಿಪ್ರಾಯ ಇರುವಂತದ್ದು. ಯಡಿಯೂರಪ್ಪ ಮತ್ತು ವಿಜಯೇಂದ್ರ ವಿರುದ್ಧ ಅಷ್ಟೇ. ನಮ್ಮದು ಆ ಭಿನ್ನಾಭಿಪ್ರಾಯ ಇಲ್ಲ. ನಮ್ಮದು ಜಿಲ್ಲೆಯ ಬಿನ್ನಾಭಿಪ್ರಾಯ ಇದೆ. ಜಿಲ್ಲೆಯ ಸಂಘಟನೆಯಲ್ಲಿ ಬಹಳ ದೊಡ್ಡ ಲೋಪ ಇದೆ ಬೇಸರ ವ್ಯಕ್ತಪಡಿಸಿದರು. ಚುನಾವಣೆಯಲ್ಲಿ ಯಾವ ಪಕ್ಷದಿಂದ ಸ್ಪರ್ಧೆ ಮಾಡಿದ್ದೆನೋ, ಅದೇ ಪಕ್ಷವು ಹಗಲು-ರಾತ್ರಿ ಶ್ರಮಪಟ್ಟು ಸೋಲಿಸಬೇಕು ಎಂಬ ಪ್ರಯತ್ನ ಮಾಡಿತು. ಈ ಸಮಾಜದಿಂದ (ಬ್ರಾಹ್ಮಣ ಸಮಾಜ) ಗೆದ್ದು ಬಂದರೆ ತಮಗೆ ತಮ್ಮ ಸಮಾಜದಿಂದ ಸಿಗುವ ಮಂತ್ರಿ ಪಟ್ಟ ತಪ್ಪಿಹೋಗುತ್ತೆ ಎಂಬ ಯಕ್ಷ ಪ್ರಶ್ನೆಯಿಂದ ಸೋಲಿಸಲು ಪ್ರಯತ್ನ ಮಾಡಿದರು. ಅದಕ್ಕೆ ಪಶ್ಚಾತಾಪ ಅವರೇ ಪಟ್ಟುಕೊಳ್ಳಬೇಕಾಯಿತು ಎಂದರು. 65ರ ವಯಸ್ಸಿಗೆ ಬಂದವರೆಲ್ಲಾ ಸರ್ಕಾರ ಮಾಡುತ್ತೇವೆ ಎಂಬ ಕನಸು ಕಾಣುತ್ತಾರೆ. ಆ ಅನುಭವ ಕೊರತೆ ಕಾರಣದಿಂದ ಕರ್ನಾಟಕದಲ್ಲಿ ಬಿಜೆಪಿ ಹಾಳಾಯ್ತು. ಸ್ವಜಾತಿ ನಾಯಕರಿಂದಲೇ ಟಾರ್ಗೆಟ್ ಆದ್ದರಿಂದ ಬಿಜೆಪಿ ಪಕ್ಷದಿಂದ ದೂರ ಉಳಿದಿದ್ದೇನೆ. ಇವರಿಗೆ ನಾವು ಬೇಡ ಎಂದಾಗ ನಮಗೇನು ಅವಶ್ಯಕತೆ ಇದೆ. ಅವರಿಗೆ ನಾವು ಬೇಕು ಎಂದರೆ, ನಮಗೂ ಅವರು ಬೇಕು. ಬೇಡ ಅಂದ್ಮೇಲೆ ನಮಗೆ ಅವಶ್ಯಕತೆ ಇಲ್ಲ. ಮುಂದೆ ಯಾವ ಪಕ್ಷ ಸೇರಬೇಕು ಎಂಬ ಬಗ್ಗೆ ಸೂಕ್ತ ಸಮಯದಲ್ಲಿ ಸರಿಯಾದ ನಿರ್ಧಾರ ತೆಗೆದುಕೊಳ್ಳುತ್ತೇನೆ ಎಂದು ಹೇಳಿದರು.