ಜಿಯೊ ಐಪಿಒಗೆ ₹7.40 ಲಕ್ಷ ಕೋಟಿ ಬಿಡ್‌; ಅರ್ಜಿಗಳ ಸಂಖ್ಯೆಯಲ್ಲಿ ವಿಶ್ವ ದಾಖಲೆ
ಮುಂಬೈ: ಭಾರತದ ಅತಿದೊಡ್ಡ ಐಪಿಒ ಎಂಬ ಐತಿಹಾಸಿಕ ದಾಖಲೆಯೊಂದಿಗೆ ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಮುಕ್ತಾಯವಾಗಿದ್ದು, ಆ್ಯಂಕರ್ ಬೇಡಿಕೆ ಸೇರಿದಂತೆ ಒಟ್ಟು ಸುಮಾರು ₹7.40 ಲಕ್ಷ ಕೋಟಿ ಮೌಲ್ಯದ ಬಿಡ್‌ಗಳನ್ನು ಸೆಳೆದಿದೆ. ಜಿಯೊ ಪ್ಲಾಟ್‌ಫಾರ್ಮ್ಸ್‌ನ ₹30,213 ಕೋಟಿ ಮೌಲ್ಯದ ಈ ಐಪಿಒ ಹೂಡಿಕೆದಾರರ ಅರ್ಜಿಗಳ ವಿಷಯದಲ್ಲೂ ವಿಶ್ವ ದಾಖಲೆ ನಿರ್ಮಿಸಿದೆ. ಮೂರು ದಿನಗಳಲ್ಲಿ
ಮುಂಬೈ: ಭಾರತದ ಅತಿದೊಡ್ಡ ಐಪಿಒ ಎಂಬ ಐತಿಹಾಸಿಕ ದಾಖಲೆಯೊಂದಿಗೆ ಜಿಯೋ ಪ್ಲಾಟ್‌ಫಾರ್ಮ್ಸ್ ಐಪಿಒ ಮುಕ್ತಾಯವಾಗಿದ್ದು, ಆ್ಯಂಕರ್ ಬೇಡಿಕೆ ಸೇರಿದಂತೆ ಒಟ್ಟು ಸುಮಾರು ₹7.40 ಲಕ್ಷ ಕೋಟಿ ಮೌಲ್ಯದ ಬಿಡ್‌ಗಳನ್ನು ಸೆಳೆದಿದೆ. ಜಿಯೊ ಪ್ಲಾಟ್‌ಫಾರ್ಮ್ಸ್‌ನ ₹30,213 ಕೋಟಿ ಮೌಲ್ಯದ ಈ ಐಪಿಒ ಹೂಡಿಕೆದಾರರ ಅರ್ಜಿಗಳ ವಿಷಯದಲ್ಲೂ ವಿಶ್ವ ದಾಖಲೆ ನಿರ್ಮಿಸಿದೆ. ಮೂರು ದಿನಗಳಲ್ಲಿ 1.38 ಕೋಟಿಗೂ ಹೆಚ್ಚು ಅರ್ಜಿಗಳು ಬಂದಿದ್ದು, ಇದು ಜಗತ್ತಿನ ಯಾವುದೇ ಐಪಿಒಗೆ ಬಂದ ಅತಿ ಹೆಚ್ಚು ಅರ್ಜಿಗಳಾಗಿವೆ. ಶುಕ್ರವಾರ ರಾತ್ರಿ 7 ಗಂಟೆಗೆ ಬಿಡ್ಡಿಂಗ್ ಮುಕ್ತಾಯವಾದಾಗ, ಈ ಬಿಡುಗಡೆಯು 22 ಪಟ್ಟು ಚಂದಾದಾರಿಕೆ ಪಡೆದಿತ್ತು. ಒಟ್ಟು ಬೇಡಿಕೆಯಲ್ಲಿ ಸುಮಾರು ₹4.90 ಲಕ್ಷ ಕೋಟಿ ಆ್ಯಂಕರ್ ಅಲ್ಲದ ಬಿಡ್‌ಗಳು ಮತ್ತು ₹2.50 ಲಕ್ಷ ಕೋಟಿ ಆ್ಯಂಕರ್ ಬೇಡಿಕೆ ಸೇರಿವೆ. ಜಿಯೊ ಐಪಿಒಗೆ ರೀಟೇಲ್ ಹೂಡಿಕೆದಾರರೂ ಬಲವಾದ ಆಸಕ್ತಿ ತೋರಿಸಿದ್ದಾರೆ. ರೀಟೇಲ್ ಹೂಡಿಕೆದಾರರಿಗೆ ಮೀಸಲಿಟ್ಟಿದ್ದ ಸುಮಾರು 8.5 ಕೋಟಿ ಷೇರುಗಳಿಗೆ ಪ್ರತಿಯಾಗಿ 23 ಕೋಟಿಗೂ ಹೆಚ್ಚು ಷೇರುಗಳಿಗೆ ಬಿಡ್‌ಗಳು ಬಂದಿದ್ದು, ಈ ವರ್ಗದಲ್ಲಿ ಚಂದಾದಾರಿಕೆ 2.72 ಪಟ್ಲು ಆಗಿದೆ. ಈಗ ಎಷ್ಟು ಹೂಡಿಕೆದಾರರಿಗೆ ಷೇರು ಹಂಚಿಕೆಯಾಗುತ್ತದೆ ಎಂಬುದೇ ದೊಡ್ಡ ಪ್ರಶ್ನೆ. ಆದರೆ, ಚಂದಾದಾರಿಕೆಯ ಪಟ್ಟು ಮಾತ್ರವೇ ಹೂಡಿಕೆದಾರರಿಗೆ ಷೇರು ಸಿಗುವ ಸಾಧ್ಯತೆಯನ್ನು ನಿರ್ಧರಿಸುವುದಿಲ್ಲ. ಹಂಚಿಕೆಯು ಮಾನ್ಯ ಅರ್ಜಿಗಳು, ಕನಿಷ್ಠ ಲಾಟ್ ಗಾತ್ರ ಮತ್ತು ಅನ್ವಯವಾಗುವ ಹಂಚಿಕೆ ಪ್ರಕ್ರಿಯೆಯನ್ನು ಅವಲಂಬಿಸಿರುತ್ತದೆ. ಸಾಂಸ್ಥಿಕ ಹೂಡಿಕೆದಾರರು ಬೇಡಿಕೆಯಲ್ಲಿ ಮುಂಚೂಣಿಯಲ್ಲಿದ್ದು, ಅರ್ಹ ಸಾಂಸ್ಥಿಕ ಖರೀದಿದಾರರ (QIB) ವಿಭಾಗವು 70.55 ಪಟ್ಟು ಚಂದಾದಾರಿಕೆ ಪಡೆದಿದೆ. ಸಾಂಸ್ಥಿಕೇತರ ಹೂಡಿಕೆದಾರರ (NII) ವರ್ಗವು 14 ಪಟ್ಟು, ಅರ್ಹ ರಿಲಯನ್ಸ್ ಇಂಡಸ್ಟ್ರೀಸ್ ಷೇರುದಾರರಿಗೆ ಮೀಸಲಾದ ಭಾಗವು 7.60 ಪಟ್ಟು ಚಂದಾದಾರಿಕೆ ಪಡೆದಿದೆ. ಉದ್ಯೋಗಿಗಳ ಭಾಗವು 2.93 ಪಟ್ಟು ಚಂದಾದಾರಿಕೆ ಕಂಡಿದೆ. ಘೋಷಿತ ವೇಳಾಪಟ್ಟಿಯ ಪ್ರಕಾರ, ಷೇರು ಹಂಚಿಕೆ ಅಕ್ಟೋಬರ್ 26ರಂದು ನಡೆಯಲಿದ್ದು, ಡಿಮ್ಯಾಟ್ ಖಾತೆಗಳಿಗೆ ಜಮೆ ಅಕ್ಟೋಬರ್ 27ರಂದು ಆಗಲಿದೆ. ಜಿಯೊ ಪ್ಲಾಟ್‌ಫಾರ್ಮ್ಸ್ ಅಕ್ಟೋಬರ್ 28ರಂದು ಬಿಎಸ್ಇ (BSE) ಮತ್ತು ಎನ್ಎಸ್ಇ (NSE)ಯಲ್ಲಿ ಲಿಸ್ಟಿಂಗ್ ಆಗಲಿದೆ. ಐಪಿಒ ಅರ್ಜಿಗಳ ಹಿಂದಿನ ದಾಖಲೆಯು ವಾರೀ ಎನರ್ಜೀಸ್ ಹೆಸರಿನಲ್ಲಿತ್ತು; ಅದು 2024ರ ಅಕ್ಟೋಬರ್ ನಲ್ಲಿ 97.3 ಲಕ್ಷ ಅರ್ಜಿಗಳನ್ನು ಪಡೆದಿತ್ತು. ಜಿಯೋ ಆ ಮೈಲುಗಲ್ಲನ್ನು ಸುಮಾರು ಶೇ 42ರಷ್ಟು ಮೀರಿಸಿದೆ. ಐಪಿಒಗೆ ಮೊದಲ ದಿನ ಸುಮಾರು 30.5 ಲಕ್ಷ ಅರ್ಜಿಗಳು ಬಂದಿದ್ದವು, ಎರಡನೇ ದಿನದ ಅಂತ್ಯಕ್ಕೆ ಈ ಸಂಖ್ಯೆ 75 ಲಕ್ಷ ದಾಟಿತ್ತು. ಕೊನೆಯ ದಿನ ಹೂಡಿಕೆದಾರರ ಭಾಗವಹಿಸುವಿಕೆ ಇನ್ನಷ್ಟು ವೇಗ ಪಡೆಯಿತು. ಐಪಿಒದ ಐತಿಹಾಸಿಕ ಮುಕ್ತಾಯವು ಜಿಯೋ ಪ್ಲಾಟ್‌ಫಾರ್ಮ್ಸ್‌ನ ವ್ಯವಸ್ಥಾಪಕ ನಿರ್ದೇಶಕ ಆಕಾಶ್ ಅಂಬಾನಿ ಅವರ ಜನ್ಮದಿನದ ಜೊತೆಗೆ ಆಗಿದೆ; ಅವರ ಜನ್ಮದಿನ ಅಕ್ಟೋಬರ್ 23ರಂದು ಶುಕ್ರವಾರ ಇತ್ತು.