ಚಿನ್ನದ ನಾಣ್ಯದಂತ ಸಿಹಿತಿಂಡಿ: ಒಂದು ಕೆಜಿಗೆ ₹1.23 ಲಕ್ಷ!

ಜೈಪುರ: ಇಲ್ಲಿನ ಸಿಹಿ ಮಾರಾಟ ಮಳಿಗೆಯೊಂದು ದೀಪಾವಳಿ ಪ್ರಯುಕ್ತ ಚಿನ್ನದ ನಾಣ್ಯದ ರೂಪದ ಸಿಹಿ ತಿನಿಸು ಪರಿಚಯಿಸಿದೆ.ಒಂಬತ್ತು  ಗ್ರಾಂನ ಈ ಸಿಹಿ ತಿನಿಸಿಗೆ ಬರೋಬ್ಬರಿ ₹1,111 ಬೆಲೆ ನಿಗದಿ ಪಡಿಸಿದ್ದು, ಒಂದು ಕೆಜಿ ಸಿಹಿ ತಿನಿಸಿಗೆ ₹1.23 ಲಕ್ಷವಾಗಲಿದೆ.ಸಿಹಿ ತಿನಿಸಿಗೆ ‘ತ್ಯೋಹಾರ್‌ ಅಶಾರ್ಫಿ’ ಎಂದು ಹೆಸರಿಡಲಾಗಿದ್ದು, ಅದರ ತಿರುಳನ್ನು ಬಾದಾಮಿಯಿಂದ ಮಾಡಲಾಗಿದೆ. ಒಳಗೆ ಸ್ವರ್ಣ ಭಾಷಂ ಎಂಬ ಖಾದ್ಯ ತುಂಬಿಸಲಾಗಿದ್ದು, ಮೇಲ್ಭಾಗವನ್ನೂ ಎಲೆಗಳಂತೆ ರಚಿಸಿ, ಕೇಸರಿಯಿಂದ ಅಲಂಕರಿಸಲಾಗಿದೆ.‘ತ್ಯೋಹಾರ್‌ ಅಶಾರ್ಫಿ‘ ಎಂಬ ಮಳಿಗೆ ಈ ಸಿಹಿಯನ್ನು ಪರಿಚಯಿಸಿದ್ದು, ಅದರ ಸಂಸ್ಥಾಪಕಿ ಅಂಜಲಿ ಜೈನ್‌ ಅವರು ಈ ಕುರಿತು ಮಾಹಿತಿ ಹಂಚಿಕೊಂಡಿದ್ದಾರೆ.‘ಈ ಸಿಹಿ ತಿನಿಸು ದೀಪಾವಳಿಗೆ ಕೊಡಬಹುದಾದ ಐಷಾರಾಮಿ ಉಡುಗೊರೆಯಾಗಿದ್ದು, ಸಮೃದ್ಧಿ ಮತ್ತು ಶಾಂತಿಯನ್ನು ಪ್ರತಿನಿಧಿಸುತ್ತದೆ. ಒಂಬತ್ತು ಸಿಹಿ ತುಂಡುಗಳಿರುವ ಬಾಕ್ಸ್‌ ಕೂಡ ಲಭ್ಯವಿರಲಿದ್ದು, ಅದರ ಬೆಲೆ 9,999 ಆಗಿರಲಿದೆ’ ಎಂದೂ ಅಂಜಲಿ ಹೇಳಿದ್ದಾರೆ.