ട്രാക്ടർ വിപണിയിൽ വൻ കുതിപ്പ്; പിന്നിലെ രഹസ്യമെന്ത്?

രാജ്യത്തെ ട്രാക്ടർ വിപണി 2026 ജൂണിൽ ശ്രദ്ധേയ വളർച്ച രേഖപ്പെടുത്തി. ഖാരിഫ് സീസൺ ആരംഭിച്ചതോടെ കാർഷിക മേഖലയിൽ പ്രവർത്തനങ്ങൾ സജീവമായതും മികച്ച മൺസൂൺ പ്രതീക്ഷയും ട്രാക്ടർ വിൽപ്പനയ്ക്ക് വലിയ കരുത്തായി. കഴിഞ്ഞ മാസം രാജ്യത്താകെ 99,751 ട്രാക്ടറുകളാണ് റീട്ടെയിൽ വിപണിയിൽ വിറ്റഴിഞ്ഞത്. 2025 ജൂണിൽ ഇത് 79,442 യൂണിറ്റുകളായിരുന്നു. ഇതോടെ വാർഷികാടിസ്ഥാനത്തിൽ 25.56 ശതമാനം വളർച്ച രേഖപ്പെടുത്തി.വിൽപ്പനയിൽ മഹീന്ദ്ര വീണ്ടും ഒന്നാം സ്ഥാനം നിലനിർത്തിജൂണിൽ മാത്രം മഹീന്ദ്ര കമ്പനി 24,320 ട്രാക്ടറുകൾ വിറ്റഴിച്ചു. വിപണി വിഹിതം 24.38 ശതമാനമായി ഉയർന്നു. 18,854 യൂണിറ്റുകളുമായി സ്വരാജ് രണ്ടാം സ്ഥാനവും 13,179 യൂണിറ്റുകളുമായി സൊണാലിക മൂന്നാം സ്ഥാനവും സ്വന്തമാക്കി. മാസി ഫെർഗൂസണും എസ്കോർട്ട്സ് കുബോട്ടയും ആദ്യ അഞ്ച് സ്ഥാനങ്ങളിൽ ഇടം നേടി. മാസി ഫെർഗൂസൺ വാർഷികാടിസ്ഥാനത്തിൽ ഏകദേശം 23 ശതമാനം വളർച്ചയും രേഖപ്പെടുത്തി.2026-27 സാമ്പത്തിക വർഷത്തിന്റെ ആദ്യ പാദത്തിലും ട്രാക്ടർ വിപണി മികച്ച പ്രകടനമാണ് കാഴ്ചവച്ചത്. ഏപ്രിൽ മുതൽ ജൂൺ വരെയുള്ള മൂന്ന് മാസക്കാലയളവിൽ രാജ്യത്ത് 2,61,349 ട്രാക്ടറുകൾ വിറ്റഴിഞ്ഞു. കഴിഞ്ഞ വർഷത്തെ അപേക്ഷിച്ച് ഇത് 21.9 ശതമാനം വളർച്ചയാണ്. ഈ കാലയളവിൽ 61,139 യൂണിറ്റുകളുടെ വിൽപ്പനയുമായി മഹീന്ദ്ര ഒന്നാം സ്ഥാനത്ത് തുടരുകയും സ്വരാജ്, സൊണാലിക, മാസി ഫെർഗൂസൺ, എസ്കോർട്ട്സ് കുബോട്ട എന്നിവർ പിന്നാലെയെത്തുകയും ചെയ്തു.സംസ്ഥാനങ്ങളുടെ വിൽപ്പന കണക്കുകൾ പരിശോധിക്കുമ്പോൾ 15,424 ട്രാക്ടറുകളുടെ വിൽപ്പനയുമായി രാജസ്ഥാൻ ഒന്നാം സ്ഥാനത്താണ്. 12,645 യൂണിറ്റുകളുമായി ഉത്തർപ്രദേശും, 11,399 യൂണിറ്റുകളുമായി മധ്യപ്രദേശും തൊട്ടുപിന്നിലുണ്ട്. ഉത്തർപ്രദേശിൽ ഏറ്റവും കൂടുതൽ വിറ്റ ട്രാക്ടർ ബ്രാൻഡ് സ്വരാജാണ്. ഗുജറാത്തും മഹാരാഷ്ട്രയും ട്രാക്ടർ വിൽപ്പനയിൽ മികച്ച പ്രകടനം തുടരുന്ന സംസ്ഥാനങ്ങളാണ്.സർക്കാരിന്റെ കാർഷിക യന്ത്രവൽക്കരണ പദ്ധതികൾ, കർഷകർക്ക് ലഭ്യമായ എളുപ്പ വായ്പകൾ, മികച്ച മഴ പ്രതീക്ഷ, ഖാരിഫ് കൃഷിക്കുള്ള തയ്യാറെടുപ്പുകൾ എന്നിവയാണ് ട്രാക്ടർ ആവശ്യകത വർധിപ്പിച്ചതെന്ന് വിദഗ്ധർ വിലയിരുത്തുന്നു. ഗ്രാമീണ മേഖലകളിലെ വരുമാനം ഉയരുന്നതും ആധുനിക കാർഷിക ഉപകരണങ്ങളുടെ ഉപയോഗം വർധിക്കുന്നതും വിപണിക്ക് കൂടുതൽ കരുത്താകുന്നുണ്ട്.വരാനിരിക്കുന്ന ഉത്സവ സീസണും വിളവെടുപ്പിന് ശേഷമുള്ള ആവശ്യകതയും ട്രാക്ടർ വിൽപ്പനയെ കൂടുതൽ മുന്നോട്ടുകൊണ്ടുപോകുമെന്നാണ് വ്യവസായ വിദഗ്ധരുടെ പ്രതീക്ഷ. മൺസൂൺ അനുകൂലമായി തുടരുകയും കാർഷിക വരുമാനം മെച്ചപ്പെടുകയും ചെയ്താൽ 2026-27 സാമ്പത്തിക വർഷം ട്രാക്ടർ വ്യവസായത്തിന് മറ്റൊരു റെക്കോർഡ് വർഷമാകാനാണ് സാധ്യത.