'എന്തൊരു അനുസരണ'; ബെംഗളൂരുവിൽ സീബ്രാ ക്രോസിംഗിലൂടെ റോഡ് മുറിച്ചുകടന്ന് തെരുവുനായ്ക്കൾ; വൈറലായി ഡാഷ്‌ക്യാം ദൃശ്യം

ബെംഗളൂരുവിലെ തിരക്കേറിയ റോഡിൽ ഗതാഗത നിയമങ്ങൾ പാലിക്കുന്നതുപോലെ സീബ്രാ ക്രോസിംഗ് ഉപയോഗിച്ച് കൂട്ടമായി റോഡ് മുറിച്ചുകടക്കുന്ന തെരുവുനായ്ക്കളുടെ ദൃശ്യം സമൂഹ മാധ്യമങ്ങളിൽ വൈറലായി. ഒരു വാഹനത്തിന്‍റെ ഡാഷ്‌ ക്യാമിൽ പതിഞ്ഞ വീഡിയോയാണ് നിരവധി പേരുടെ കൗതുകത്തിന് ഇടയാക്കിയത്.അമ്പരപ്പിച്ച കാഴ്ചവീഡിയോയുടെ തുടക്കത്തിൽ വാഹനങ്ങൾ സാധാരണ രീതിയിൽ സഞ്ചരിക്കുന്നതാണ് കാണുന്നത്. മുന്നിലുണ്ടായിരുന്ന ഒരു ട്രക്ക് കടന്നുപോയതോടെ, അതിന് പിന്നിൽ നിന്ന് നിരവധി നായ്ക്കൾ ഒരുമിച്ച് സീബ്രാ ക്രോസിംഗിലൂടെ ഒന്നിന് പിന്നാലെ മറ്റൊന്ന് എന്ന ക്രമത്തിൽ വളരെ അനുസരണയോടെ റോഡ് മുറിച്ചുകടക്കുന്നതാണ് ദൃശ്യങ്ങളിലുള്ളത്. വാഹനങ്ങളുടെ ഇടയിലൂടെ ഓടിക്കയറാതെ, കാൽനടയാത്രക്കാർക്കായി ഒരുക്കിയ ഭാഗം തന്നെ തെരഞ്ഞെടുത്ത് തെരുവ് നായ്ക്കൾ നടക്കുന്നത് കണ്ട് പലരും അമ്പരന്നു. Dogesh using the Zebra crossing, Bengaluru pic.twitter.com/V3nfcGDUJN— Ghar Ke Kalesh (@gharkekalesh) July 16, 2026 സമൂഹ മാധ്യമ പ്ലാറ്റ്ഫോമിൽ പങ്കുവെച്ച വീഡിയോയ്ക്ക് പിന്നാലെ നിരവധി രസകരമായ പ്രതികരണങ്ങളും എത്തി. ഗതാഗത നിയമങ്ങൾ പാലിക്കുന്നതിൽ ചില മനുഷ്യരെക്കാൾ തെരുവ് നായ്ക്കൾ മാതൃകയാണെന്ന് ചിലർ അഭിപ്രായപ്പെട്ടു. കാൽനടയാത്രക്കാർക്കായി ഒരുക്കിയ സീബ്രാ ക്രോസിംഗിന്‍റെ പ്രാധാന്യം മൃഗങ്ങൾ പോലും തിരിച്ചറിയുമ്പോൾ പലരും അത് അവഗണിക്കുന്നുവെന്ന വിമർശനവും ഉയർന്നു.വൈറലായി വീഡിയോമൃഗങ്ങൾക്ക് ചുറ്റുപാടുകളെ വിലയിരുത്താനുള്ള കഴിവ് മികച്ചതാണെന്നും നഗരജീവിതവുമായി അവ സ്വാഭാവികമായി പൊരുത്തപ്പെടുന്നതിന്‍റെ ഉദാഹരണമാണ് ഈ സംഭവമെന്നുമുള്ള അഭിപ്രായങ്ങളും കമന്‍റ് വിഭാഗത്തിൽ പ്രത്യക്ഷപ്പെട്ടു. ചിലർ തമാശരൂപേണ നായ്ക്കളെ "ഡോഗേഷ്" എന്ന് വിശേഷിപ്പിച്ചും വീഡിയോ പങ്കുവെച്ചു. ചുരുങ്ങിയ ദൈർഘ്യമുള്ള ഈ ദൃശ്യം മണിക്കൂറുകൾക്കകം വ്യാപകമായി പ്രചരിച്ചതോടെ വിവിധ സമൂഹ മാധ്യമ അക്കൗണ്ടുകൾ വീണ്ടും പങ്കുവെക്കുകയും ചെയ്തു. റോഡ് സുരക്ഷ, കാൽനടയാത്രക്കാരുടെ അവകാശം, ഗതാഗത നിയമങ്ങളോടുള്ള പൊതുബോധം എന്നിവയെക്കുറിച്ചുള്ള ചർച്ചകൾക്കും വീഡിയോ വഴിവെച്ചിരിക്കുകയാണ്.