ബെംഗളൂരുവിൽ നടപ്പാതയിലൂടെ വണ്ടിയോടിച്ചാൽ കീശ കീറും; നിയമലംഘകർക്ക് 5,000 രൂപ പിഴ ചുമത്താൻ നീക്കം

ബെംഗളൂരു: ബെംഗളൂരുവിൽ നടപ്പാതയിലൂടെ വാഹനമോടിക്കുന്നവർക്കെതിരെ കടുത്ത പിഴ ചുമത്താൻ നീക്കം. നടപ്പാതയിലൂടെ ഇരുചക്ര വാഹമോടിക്കുന്നവ‍ർക്കെതിരായ പിഴ 500 രൂപയിൽനിന്ന് 5,000 രൂപയായി ഉയർത്തണെമന്ന് ആവശ്യപ്പെട്ട് ബെംഗളൂരു വികസന വകുപ്പ് മന്ത്രി കൃഷ്ണ ബൈരെ ഗൗഡ ​ഗതാ​ഗത വകുപ്പ് മന്ത്രി ബൈരാതി സുരേഷിന് കത്ത് നൽകി. നിയമലംഘനങ്ങൾ ഒഴിവാക്കാനും കൽനടയാത്രക്കാരുടെ സുരക്ഷയ്ക്കുമായി ക‍ടുത്ത ശിക്ഷ ആവശ്യമാണെന്ന് മന്ത്രി കൃഷ്ണ ബൈരെ ഗൗഡ കത്തിൽ ​പറഞ്ഞു.ബെം​ഗളൂരു ന​ഗര പരിധിയിൽ നടപ്പാതയിലൂടെ ഇരുചക്ര വാഹനമോടിക്കുന്നവരുടെ എണ്ണം ദിനംപ്രതി വ‍ർധിച്ചുവരികയാണെന്ന് മന്ത്രി കത്തിൽ ചൂണ്ടിക്കാട്ടി. ഇത് കാൽനടയാത്രക്കാരുടെ സുരക്ഷയ്ക്കും ജീവനും ഭീഷണിയാണെന്നും മന്ത്രി പറഞ്ഞു.നടപ്പാതകളിലെ കൈയേറ്റം ഒഴിപ്പിച്ചതിന് പിന്നാലെ ഇരുചക്രവാഹ​ന യാത്രക്കാ‍ർ നടപ്പാതകളിലൂടെ വാഹനമോടിക്കുന്നുവെന്ന പരാതികൾ ലഭിച്ചതായി മന്ത്രി കൃഷ്ണ ബൈരെ ഗൗഡ മാധ്യമങ്ങളോട് പറഞ്ഞു. ബെം​ഗളൂരു ട്രാഫിക് പൊലീസിലെ മുതി‍ന്ന ഉദ്യോ​ഗസ്ഥരുമായി നടന്ന കൂടിക്കാഴ്ചയ്ക്ക് ശേഷം സംസാരിക്കുകയായിരുന്നു അദ്ദേഹം. സുപ്രീംകോടതി ഉത്തരവനുസരിച്ചു നടപ്പാതകളിലെ കൈയേറ്റം ഒഴിപ്പിച്ചതിനെ തുട‍ർന്ന് ജനങ്ങളിൽനിന്ന് പ്രശംസ ലഭിച്ചു. നടപ്പാതകളിലൂടെ വാഹ​നമോടിക്കുന്നവ‍ർക്കെതിരെ കർശന നടപടിയെടുക്കാൻ പൊലീസിനോട് നിർദേശിച്ച മന്ത്രി, ഇത്തരം നിയമലംഘനങ്ങളെ തുടർന്ന് കാൽനട യാത്രക്കാർക്ക് പരിക്ക് പറ്റിയാൽ ആര് ഉത്തരവാദിത്തം ഏറ്റെടുക്കുമെന്നും ചോദിച്ചു.ജൂലൈ ഒന്നുമുതൽ 10 വരെ നീണ്ട സ്പെഷ്യൽ ഡ്രൈവിൽ ബെം​ഗളൂരു ന​ഗരത്തിലെ 490.5 കിലോമീറ്റർ നടപ്പാതയിലെ കൈയേറ്റം ​ഗ്രേറ്റർ ബെം​ഗളൂരു അതോറിറ്റി ഒഴിപ്പിച്ചിരുന്നു. ബെം​ഗളൂരു വെസ്റ്റ് സിറ്റി കോ‍ർപറേഷൻ പരിധിയിലാണ് ഏറ്റവും കൂടുതൽ നടപ്പാത ഒഴിപ്പിച്ചത്, 122.62 കിലോമീറ്റർ. ബെം​ഗളൂരു നോർത്ത് സിറ്റിയിൽ 11.35 കിലോമീറ്ററും സൗത്ത് സിറ്റിയിൽ 94.01 കിലോമീറ്ററും ഈസ്റ്റ് സിറ്റിയിൽ 88 കിലോമീറ്ററും സെൻട്രൽ സിറ്റി കോർപറേഷനിൽ 70 കിലോമീറ്ററും നടപ്പാത ഒഴിപ്പിച്ചു.