പുതിയ ബ്രെസ എത്തി: ടർബോ കരുത്തും കിടിലൻ ലുക്കും! വില 7.40 ലക്ഷം രൂപ മുതൽ

ഇന്ത്യൻ വാഹന വിപണിയിൽ പുതിയ 2026 മാരുതി സുസുക്കി ബ്രെസ ഫെയ്‌സ്‌ലിഫ്റ്റ് അവതരിപ്പിച്ചു. 7.40 ലക്ഷം രൂപ (എക്‌സ്-ഷോറൂം) പ്രാരംഭ വിലയിലാണ് പുതിയ കോംപാക്ട് എസ്‌യുവി എത്തിയിരിക്കുന്നത്. എൻട്രി ലെവൽ എൽഎക്‌സ്‌ഐ ടർബോ പെട്രോൾ വേരിയന്റിന്റെ വില മാത്രമാണ് കമ്പനി നിലവിൽ പുറത്തുവിട്ടിരിക്കുന്നത്. മറ്റ് വേരിയന്റുകളുടെ വില പിന്നീട് പ്രഖ്യാപിക്കും. ഡിസൈൻ, ഫീച്ചറുകൾ, എഞ്ചിൻ എന്നിവയിൽ വലിയ മാറ്റങ്ങളുമായാണ് പുതിയ ബ്രെസ്സ എത്തുന്നത്. പുതിയ 1.0 ലിറ്റർ ടർബോ പെട്രോൾ എഞ്ചിനാണ് വാഹനത്തിന്റെ ഏറ്റവും വലിയ പ്രത്യേകത.പുതിയ രൂപത്തിൽ മാരുതി ബ്രെസ 2026 ബ്രെസ്സയുടെ പുറം രൂപത്തിൽ ശ്രദ്ധേയമായ മാറ്റങ്ങളാണ് നൽകിയിരിക്കുന്നത്. പുതുക്കിയ ഫ്രണ്ട് ഗ്രിൽ, പുതിയ എൽഇഡി ഹെഡ്‌ലാമ്പുകൾ, എൽ ആകൃതിയിലുള്ള ഡേ ടൈം റണ്ണിംഗ് ലൈറ്റുകൾ, പുതിയ അലോയ് വീലുകൾ, പരിഷ്‌കരിച്ച പിൻ ബമ്പർ, കണക്റ്റഡ് എൽഇഡി ടെയിൽ ലാമ്പുകൾ എന്നിവയാണ് പ്രധാന മാറ്റങ്ങൾ. ടർബോ പെട്രോൾ വേരിയന്റുകൾക്ക് ബ്ലാക്ക്-ഔട്ട് ഗ്രിൽ നൽകിയിട്ടുണ്ട്. ഇത് വാഹനത്തിന് കൂടുതൽ സ്പോർട്ടി ഭാവം നൽകുന്നു.കൂടുതൽ പ്രീമിയം ക്യാബിൻ അകത്തളത്തിലും പുതിയ ബ്രെസ്സയിൽ മാറ്റങ്ങൾ വരുത്തിയിട്ടുണ്ട്. ഡ്യുവൽ ടോൺ ബ്ലാക്ക്-ബ്രൗൺ ഇന്റീരിയർ തീം, പുതിയ സീറ്റ് അപ്ഹോൾസ്റ്ററി, മെച്ചപ്പെടുത്തിയ ട്രിമ്മുകൾ എന്നിവ ക്യാബിന്റെ പ്രീമിയം അനുഭവം വർധിപ്പിക്കുന്നു. ഡാഷ്‌ബോർഡിന്റെ മധ്യഭാഗത്ത് 10.1 ഇഞ്ച് സ്മാർട്ട്‌പ്ലേ പ്രോ പ്ലസ് ടച്ച്‌സ്‌ക്രീൻ ഇൻഫോടെയ്ൻമെന്റ് സംവിധാനം നൽകിയിട്ടുണ്ട്. വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, അലക്സാ പിന്തുണ, ബിൽറ്റ്-ഇൻ നാവിഗേഷൻ എന്നിവ ഈ സംവിധാനത്തിലുണ്ട്.പുതിയ ഫീച്ചറുകൾ പുതിയ ബ്രെസയിൽ വെന്റിലേറ്റഡ് ഫ്രണ്ട് സീറ്റുകൾ, 64 കളർ ആംബിയന്റ് ലൈറ്റിംഗ്, പിഎം 2.5 എയർ പ്യൂരിഫയർ, ആക്ടീവ് കൂളിംഗോടുകൂടിയ വയർലെസ് ഫോൺ ചാർജർ തുടങ്ങിയ ഫീച്ചറുകളും ഉൾപ്പെടുത്തിയിട്ടുണ്ട്. സുരക്ഷാ സംവിധാനങ്ങളിൽ ബ്ലൈൻഡ് സ്പോട്ട് മോണിറ്റർ, ടയർ പ്രഷർ മോണിറ്ററിംഗ് സിസ്റ്റം, റിയർ ക്രോസ് ട്രാഫിക് അലർട്ട്, ഫ്രണ്ട് പാർക്കിംഗ് സെൻസറുകൾ, സേഫ് എക്സിറ്റ് അലർട്ട് എന്നിവ ലഭിക്കും. എന്നാൽ നിരവധി എതിരാളി മോഡലുകളിൽ ലഭിക്കുന്ന അഡ്വാൻസ്ഡ് ഡ്രൈവർ അസിസ്റ്റൻസ് സിസ്റ്റംസ് (എഡിഎഎസ്) സാങ്കേതികവിദ്യ പുതിയ ബ്രെസ്സയിലും നൽകിയിട്ടില്ല.മൂന്ന് പവർട്രെയിൻ ഓപ്ഷനുകൾ പുതിയ ബ്രെസ്സയിൽ ആദ്യമായി 1.0 ലിറ്റർ ടർബോചാർജ്ഡ് പെട്രോൾ എഞ്ചിൻ അവതരിപ്പിച്ചിരിക്കുകയാണ്. 110 ബിഎച്ച്പി കരുത്തും 170 എൻഎം ടോർക്കും നൽകുന്ന ഈ എഞ്ചിൻ 6 സ്പീഡ് മാനുവൽ ഗിയർബോക്‌സുമായി മാത്രമാണ് ലഭിക്കുക. ഇതിന് പുറമെ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിനും സിഎൻജി പതിപ്പും തുടരും.മികച്ച മൈലേജ് ടർബോ പെട്രോൾ മോഡലിന് 20.47 കിലോമീറ്റർ/ലിറ്റർ, 1.5 ലിറ്റർ പെട്രോൾ മോഡലിന് 21.09 കിലോമീറ്റർ/ലിറ്റർ, സിഎൻജി പതിപ്പിന് 26.90 കിലോമീറ്റർ/കിലോഗ്രാം വരെ മൈലേജ് ലഭിക്കുമെന്ന് മാരുതി സുസുക്കി അവകാശപ്പെടുന്നു. പുതിയ എഞ്ചിൻ, കൂടുതൽ ആധുനിക ഫീച്ചറുകൾ, മെച്ചപ്പെടുത്തിയ ക്യാബിൻ എന്നിവയിലൂടെ സബ്-കോംപാക്ട് എസ്‌യുവി വിഭാഗത്തിലെ മത്സരം ശക്തമാക്കുകയാണ് മാരുതി സുസുക്കിയുടെ ലക്ഷ്യം.