മൂന്ന് കാറുകൾ മാത്രം വിറ്റിരുന്ന കാലം മറന്നു; ഇന്ന് ലോകം വാങ്ങാൻ മത്സരിക്കുന്ന ഇന്ത്യൻ നിർമിത കാർ

ഇന്ത്യയിൽ നിർമിക്കുന്ന നിരവധി വാഹനങ്ങൾ ലോകത്തിന്റെ വിവിധ ഭാഗങ്ങളൽ ഉള്ള വിപണികളിലേക്ക് കയറ്റുമതി ചെയ്യുന്നുണ്ട്. മാരുതി, ഹ്യുണ്ടായി, ടാറ്റ, മഹീന്ദ്ര, ഫോക്‌സ്‌വാഗൺ, റെനോ തുടങ്ങിയ പ്രമുഖ കമ്പനികളുടെ 40ൽ അധികം മോഡലുകൾ ഈ പട്ടികയിലുണ്ട്. ഈ നിരയിൽ സ്കോഡ സ്ലാവിയയും ശ്രദ്ധേയമായ മുന്നേറ്റവുമായി ഇടംപിടിച്ചിരിക്കുകയാണ്. 2026 കലണ്ടർ വർഷത്തിന്റെ രണ്ടാം പാദത്തിൽ (ഏപ്രിൽ മുതൽ ജൂൺ വരെ) ഏറ്റവും ഉയർന്ന വാർഷിക വളർച്ച നേടിയ ഇന്ത്യൻ നിർമിത കാറായി സ്ലാവിയ മാറിയെന്നാണ് കണക്കുകൾ വ്യക്തമാക്കുന്നത്.2026 രണ്ടാം പാദത്തിൽ സ്കോഡ സ്ലാവിയയുടെ 483 യൂണിറ്റുകളാണ് കയറ്റുമതി ചെയ്തത്. എന്നാൽ 2025ലെ ഇതേ കാലയളവിൽ കയറ്റുമതി ചെയ്തത് വെറും 3 യൂണിറ്റുകൾ മാത്രമായിരുന്നു. അതായത് ഒരു വർഷത്തിനിടെ 480 യൂണിറ്റുകളുടെ വർധനവാണ് ഉണ്ടായത്. ഇതോടെ കയറ്റുമതിയിൽ 16,000% വളർച്ചയാണ് സ്ലാവിയ സ്വന്തമാക്കിയത്.ഓഗസ്റ്റ് 18ന് പുതിയ സ്ലാവിയ ഫെയ്‌സ്‌ലിഫ്റ്റ് എത്തും2022 ഫെബ്രുവരിയിലാണ് സ്കോഡ സ്ലാവിയ ആദ്യമായി ഇന്ത്യൻ വിപണിയിൽ അവതരിപ്പിച്ചത്. ഏകദേശം നാലര വർഷങ്ങൾക്ക് ശേഷം, 2026 ഓഗസ്റ്റ് 18ന് സ്ലാവിയയുടെ ഫെയ്‌സ്‌ലിഫ്റ്റ് പതിപ്പ് അവതരിപ്പിക്കാൻ കമ്പനി ഒരുങ്ങുകയാണ്. പുതിയ മോഡലിൽ പുറം രൂപകൽപനയിൽ നിരവധി മാറ്റങ്ങളുണ്ടാകും. എൽ.ഇ.ഡി. ഘടകങ്ങൾ ഉൾപ്പെടുത്തിയ പുതിയ ഫ്രണ്ട് ഗ്രിൽ, പുതുക്കിയ മുൻ-പിൻ ലൈറ്റുകൾ, പുനർരൂപകൽപന ചെയ്ത ബമ്പറുകൾ എന്നിവ പ്രധാന മാറ്റങ്ങളാണ്. പുതിയ അലോയ് വീൽ ഡിസൈൻ, മുൻവശത്തെ പാർക്കിംഗ് സെൻസറുകൾ തുടങ്ങിയ ഫീച്ചറുകളും ലഭിക്കുമെന്ന് പ്രതീക്ഷിക്കുന്നു.പുതിയ ഇന്റീരിയറും കൂടുതൽ ഫീച്ചറുകളുംസ്ലാവിയ ഫെയ്‌സ്‌ലിഫ്റ്റിന്റെ അകത്തളത്തിലും മാറ്റങ്ങൾ പ്രതീക്ഷിക്കുന്നുണ്ട്. കുഷാഖ് ഫെയ്‌സ്‌ലിഫ്റ്റിന് സമാനമായ പുതിയ ക്യാബിൻ അപ്ഹോൾസ്റ്ററി, പിൻസീറ്റുകൾക്കുള്ള മസാജ് ഫംഗ്ഷൻ എന്നിവ ലഭിച്ചേക്കും. ഇതിനൊപ്പം വലിയ 10.25 ഇഞ്ച് ഡിജിറ്റൽ ഡ്രൈവർ ഡിസ്‌പ്ലേയും ഉൾപ്പെടുത്താൻ സാധ്യതയുണ്ട്. സുരക്ഷാ സംവിധാനങ്ങളിൽ ലെവൽ-2 എ.ഡി.എ.എസ്. ലഭിക്കുന്നത് വാഹനത്തിന്റെ പ്രധാന ആകർഷണങ്ങളിലൊന്നായിരിക്കും.സ്കോഡ നേപ്പാൾ പുറത്തുവിട്ട ടീസർപുതിയ സ്ലാവിയ ഫെയ്‌സ്‌ലിഫ്റ്റിന്റെ ആദ്യ ചിത്രം അടുത്തിടെ പുറത്തുവന്നിരുന്നു. രസകരമായ കാര്യം, ഈ ചിത്രം പുറത്തുവിട്ടത് സ്കോഡ ഇന്ത്യയല്ല, സ്കോഡ നേപ്പാളായിരുന്നു. ഇന്ത്യയിൽ നിർമിക്കുന്ന സ്ലാവിയ ഫെയ്‌സ്‌ലിഫ്റ്റ് ഇന്ത്യയ്ക്ക് മുമ്പ് നേപ്പാളിൽ അവതരിപ്പിക്കുമെന്ന സൂചനയും ഇതോടെ ലഭിച്ചു. എന്നാൽ പിന്നീട് ഈ ടീസർ നീക്കം ചെയ്തു. പുറത്തുവന്ന ചിത്രം എ.ഐ. ഉപയോഗിച്ച് സൃഷ്ടിച്ചതാണെന്നും റിപ്പോർട്ടുകളുണ്ട്.രൂപകൽപനയിൽ വലിയ മാറ്റങ്ങൾപുതിയ സ്ലാവിയ ഫെയ്‌സ്‌ലിഫ്റ്റ് നിലവിലെ മോഡലിന്റെ ചെറിയ പരിഷ്‌കരണം മാത്രമല്ലെന്നാണ് പുറത്തുവന്ന വിവരങ്ങൾ സൂചിപ്പിക്കുന്നത്. വാഹനത്തിന്റെ ഷീറ്റ് മെറ്റലിൽ തന്നെ വലിയ മാറ്റങ്ങൾ വരുത്തിയിട്ടുണ്ട്. നിലവിലെ മോഡലിലെ സിംഗിൾ കർവ് രൂപകൽപനയിൽ നിന്ന് വ്യത്യസ്തമായ ഡോർ ഡിസൈനാണ് പുതിയ പതിപ്പിന് ലഭിക്കുന്നത്. ഡോറിന് ചുറ്റുമുള്ള ബോഡി പാനലുകളിലും മാറ്റങ്ങളുണ്ടാകും. പുതിയ എൽ.ഇ.ഡി. ടെയിൽ ലാമ്പ് ഡിസൈൻ, ടെയിൽ ലാമ്പിന് താഴെയുള്ള സ്റ്റൈലിഷ് എൽ.ഇ.ഡി. ടേൺ ഇൻഡിക്കേറ്ററുകൾ, എൽ.ഇ.ഡി. റിവേഴ്‌സ് ലൈറ്റുകൾ തുടങ്ങിയവയും പ്രതീക്ഷിക്കുന്നു.പുതിയ സ്പോർട്ടി ലുക്ക്ടെയിൽ ലാമ്പുകൾക്കിടയിലെ സ്കോഡ ലെറ്ററിങ് കൂടുതൽ വലുതാക്കിയിട്ടുണ്ട്. ടെയിൽഗേറ്റിൽ പുതിയ ബാഡ്ജുകളും കാണാം. പുതിയ റിയർ ബമ്പർ, പുതിയ റിഫ്ലക്ടറുകൾ, വ്യാജ ട്വിൻ എക്‌സ്‌ഹോസ്റ്റ് ഡിസൈൻ എന്നിവയും വാഹനത്തിന് കൂടുതൽ സ്പോർട്ടി ഭാവം നൽകും. പുതിയ അലോയ് വീലുകളും പിൻ ഡിസ്ക് ബ്രേക്കുകളുടെ സൂചനകളും പുറത്തുവന്ന ചിത്രങ്ങളിൽ കാണാനാകും. നിലവിലെ സ്ലാവിയയിലെ വശങ്ങളിലെ സ്വഭാവരേഖകൾ മാറ്റി ഡോർ ഹാൻഡിലുകൾക്ക് മുകളിലൂടെ കൂടുതൽ ശക്തമായ ഒരു ലൈൻ നൽകിയിട്ടുണ്ട്.പനോരമിക് സൺറൂഫ് ഇല്ല, എൻജിനിൽ മാറ്റമില്ലപുതിയ സ്ലാവിയയിൽ പനോരമിക് സൺറൂഫ് ലഭിക്കാൻ സാധ്യതയില്ലെന്നാണ് റിപ്പോർട്ടുകൾ. 360 ഡിഗ്രി ക്യാമറയ്ക്കുള്ള ഒ.ആർ.വി.എം. ക്യാമറ ബൾജുകളും ചിത്രങ്ങളിൽ കാണുന്നില്ല. എൻജിൻ വിഭാഗത്തിൽ നിലവിലെ 1.0 ലിറ്റർ ടി.എസ്.ഐ., 1.5 ലിറ്റർ ടി.എസ്.ഐ. പെട്രോൾ എൻജിനുകൾ തന്നെ തുടരുമെന്നാണ് പ്രതീക്ഷിക്കുന്നത്.മഹാരാഷ്ട്രയിലെ പ്ലാന്റിൽ നിർമാണംസ്കോഡ സ്ലാവിയ ഫെയ്‌സ്‌ലിഫ്റ്റ് നേപ്പാളിലല്ല, മഹാരാഷ്ട്രയിലെ ഛത്രപതി സംഭാജി നഗറിലുള്ള കമ്പനിയുടെ നിർമാണ പ്ലാന്റിലാണ് നിർമിക്കുക. ഇന്ത്യ 2.0 തന്ത്രത്തിന്റെ പ്രധാന മോഡലുകളിലൊന്നായ സ്ലാവിയ നേപ്പാൾ, വിയറ്റ്നാം തുടങ്ങിയ വിദേശ വിപണികളിലേക്കും കയറ്റുമതി ചെയ്യുന്നുണ്ട്.