പ്രളയബാധിതർക്ക് വീടും പശുക്കൾക്ക് തൊഴുത്തും നൽകി, സ്നേഹമാതൃകയായി പ്രസന്ന

തലവടി: പ്രളയബാധിതരായ കുടുംബങ്ങൾക്ക് സ്വന്തം വീട് തുറന്നുനൽകിയും വളർത്തുമൃഗങ്ങൾക്ക് സുരക്ഷിതമായി കഴിയാൻ തൊഴുത്ത് വിട്ടുനൽകിയും തലവടി ഗ്രാമപഞ്ചായത്ത് 11-ാം വാർഡിലെ ബാലവിഹാർ വീട്ടിൽ പ്രസന്ന നാടിന് മാതൃകയായി. വെള്ളപ്പൊക്കം രൂക്ഷമായതോടെ വീടുകളിൽ കഴിയാൻ സാധിക്കാതെ വന്ന രണ്ട് കുടുംബങ്ങൾക്കാണ് പ്രസന്ന സ്വന്തം വീട്ടിൽ താമസസൗകര്യമൊരുക്കിയത്. ഇവർക്കാവശ്യമായ ഭക്ഷണവും മറ്റ് അടിസ്ഥാന സൗകര്യങ്ങളും പ്രസന്നയും കുടുംബവും ഉറപ്പാക്കി. വെള്ളം ഉയർന്നതോടെ പ്രതിസന്ധിയിലായ കൊച്ചാഞ്ഞിലിവേലി ജോണിയുടെ നാല് പശുക്കൾക്കും പ്രസന്ന തുണയായി. സ്വന്തം പശുക്കളെ കെട്ടിയിരുന്ന തൊഴുത്ത് ഈ പശുക്കൾക്കും സുരക്ഷിതമായി കഴിയുന്നതിനായി വിട്ടുനൽകുകയായിരുന്നു. മിണ്ടാപ്രാണികൾക്ക് ആവശ്യമായ തീറ്റയും വെള്ളവും ലഭ്യമാക്കാനും കുടുംബം പ്രത്യേകം ശ്രദ്ധിച്ചു. ദുരിതബാധിതർക്ക് വീടിന്റെ വാതിൽ തുറന്നുനൽകിയതിനൊപ്പം മിണ്ടാപ്രാണികൾക്കും സുരക്ഷിതമായ ഇടമൊരുക്കിയ പ്രസന്നയുടെ കാരുണ്യപ്രവർത്തനം നാട്ടുകാരുടെ വലിയ പ്രശംസയാണ് നേടുന്നത്.