ഹോർമുസ് കടലിടുക്കിന് പുറത്തും കപ്പലുകൾ ആക്രമിക്കും: കടുത്ത ഭീഷണിയുമായി ഇറാൻ

പശ്ചിമേഷ്യൻ മേഖലയിൽ യുദ്ധസമാനമായ അന്തരീക്ഷം നിലനിൽക്കെ, അന്താരാഷ്ട്ര കപ്പൽ ഗതാഗതത്തിന് നേരെ കടുത്ത മുന്നറിയിപ്പുമായി ഇറാൻ. തന്ത്രപ്രധാനമായ ഹോർമുസ് കടലിടുക്കിന് പുറത്തുള്ള സമുദ്രമേഖലകളിലും മുൻകൂർ അനുമതിയില്ലാതെ സർവീസ് നടത്തുന്ന കപ്പലുകളെ ലക്ഷ്യമിട്ട് ആക്രമണം നടത്തുമെന്നാണ് ഇറാന്റെ ഭീഷണി. തങ്ങളുടെ പരമാധികാരം ചോദ്യം ചെയ്യുന്ന ഏതൊരു നീക്കത്തിനും ശക്തമായ തിരിച്ചടി നൽകുമെന്നും ഇറാന്റെ സൈനിക നേതൃത്വം വ്യക്തമാക്കിയിട്ടുണ്ട്.ഇറാന്റെ ഔദ്യോഗിക അനുമതിയില്ലാതെ മേഖലയിലൂടെ കടന്നുപോകാൻ ശ്രമിക്കുന്ന ഏത് വാണിജ്യ-ചരക്ക് കപ്പലുകളും ആക്രമിക്കപ്പെടുമെന്നാണ് മുന്നറിയിപ്പ്. കടലിടുക്കിലെ നിശ്ചിത അതിർത്തികൾക്ക് പുറമെ ഒമാൻ ഉൾക്കടൽ, പേർഷ്യൻ ഉൾക്കടലിന്റെ അനുബന്ധ മേഖലകൾ എന്നിവടങ്ങളിലേക്കും തങ്ങളുടെ നിരീക്ഷണവും ആക്രമണ പരിധിയും വ്യാപിപ്പിച്ചതായി ഇറാന്റെ വിപ്ലവ ഗാർഡ് അറിയിച്ചു. അനുമതിയില്ലാത്ത സർവീസുകൾ തടയുമെന്നും സുരക്ഷാ മാനദണ്ഡങ്ങൾ പാലിക്കാത്ത കപ്പലുകൾക്കെതിരെ തൽക്ഷണം സൈനിക നടപടിയുണ്ടാകുമെന്നുമാണ് ഇറാന്റെ നിലപാട്.ഇറാന്റെ ഈ പുതിയ പ്രഖ്യാപനം ആഗോള എണ്ണ വിപണിയെയും അന്താരാഷ്ട്ര വ്യാപാരത്തെയും കടുത്ത പ്രതിസന്ധിയിലേക്കാണ് തള്ളിയിട്ടിരിക്കുന്നത്. ലോകത്തെ പ്രധാന ഇന്ധന ഗതാഗത പാതയായ ഹോർമുസിനു പുറമേ സമീപ സമുദ്രമേഖലകളും അപകടഭീഷണിയിലായതോടെ കപ്പൽ കമ്പനികൾ പലതും സർവീസുകൾ നിർത്തിവെക്കുകയോ വഴിതിരിച്ചുവിടുകയോ ചെയ്യുകയാണ്. മേഖലയിൽ വർദ്ധിച്ചുവരുന്ന സംഘർഷാവസ്ഥയിൽ കടുത്ത ആശങ്ക പ്രകടിപ്പിച്ച അന്താരാഷ്ട്ര സമൂഹം, ഗതാഗത സ്വാതന്ത്ര്യത്തിന്മേലുള്ള കടന്നുകയറ്റങ്ങൾക്കെതിരെ ശക്തമായ പ്രതികരണത്തിന് സാധ്യതയുണ്ടെന്ന് മുന്നറിയിപ്പ് നൽകുന്നു.