പിടികൂടിയ മൂർഖൻ പാമ്പിനെ കുപ്പിയിലാക്കി വീട്ടിലേക്ക് കൊണ്ടുവന്നു, പുറത്തെടുക്കവേ കടിയേറ്റു; പാമ്പുപിടുത്തക്കാരന് ദാരുണാന്ത്യം

തിരുവനന്തപുരം: ചിറയൻകീഴിൽ പാമ്പുപിടിത്തക്കാരൻ പാമ്പുകടിയേറ്റ് മരിച്ചു. ഈഞ്ചക്കൽ വലിയ ഏലായിൽ താമസിക്കുന്ന സന്ദീപ് (കണ്ണൻ- 33) ആണ് മരിച്ചത്. ബുധനാഴ്ച രാത്രി വീട്ടിൽ വച്ചാണ് പാമ്പുകടിയേറ്റത്. കഴിഞ്ഞ ദിവസം പിടികൂടിയ മൂർഖൻ പാമ്പിനെ സന്ദീപ് വീട്ടിലേക്ക് കൊണ്ടുവന്നിരുന്നു. പാത്രത്തിൽ നിന്നും പുറത്തെടുക്കുന്നതിനിടെ ഈ പാമ്പാണ് സന്ദീപിനെ കടിച്ചതെന്നാണ് വിവരം. പാമ്പു കടിയേറ്റതിനു പിന്നാലെ സന്ദീപിനെ ചിറയിൻകീഴ് താലൂക്ക് ആശുപത്രിയിൽ പ്രവേശിപ്പിച്ചു. പിന്നീട് ആരോഗ്യ നില വഷളായതോടെ തിരുവനന്തപുരം മെഡിക്കൽ കോളെജ് ആശുപത്രിയിലേക്ക് മാറ്റിയെങ്കിലും ഇന്ന് രാവിലെ മരിച്ചു. രജനിയാണ് ഭാര്യ.