ടിസിഎസിൽ ജോലി വേണോ? എഐ വൈദഗ്ധ്യം ഇനി നിർബന്ധം!

ആർട്ടിഫിഷ്യൽ ഇന്‍റലിജൻസ് (എഐ) ബിസിനസ് വിപുലീകരിക്കാനൊരുങ്ങുന്ന പ്രമുഖ ഐടി സേവന കമ്പനിയായ ടാറ്റ കൺസൾട്ടൻസി സർവീസസ് (ടിസിഎസ്), വരും വർഷങ്ങളിൽ നിയമിക്കുന്ന ജീവനക്കാരിൽ ഭൂരിഭാഗത്തിനും എഐ, ഡിജിറ്റൽ സാങ്കേതികവിദ്യകളിൽ വൈദഗ്ധ്യം ഉണ്ടായിരിക്കണമെന്ന് വ്യക്തമാക്കി. ഭാവിയിലെ നിയമനങ്ങളിൽ ഏകദേശം 80% പേർക്കും ഇത്തരം കഴിവുകൾ ആവശ്യമായി വരുമെന്നാണ് കമ്പനിയുടെ വിലയിരുത്തൽ. ഐടി മേഖലയിൽ തൊഴിൽ ആവശ്യകതകൾ മാറുന്നതിന്റെ സൂചനയായാണ് ഈ നീക്കം വിലയിരുത്തപ്പെടുന്നത്. സെപ്റ്റംബർ പാദത്തിൽ ടിസിഎസിന്റെ ആകെ വരുമാനത്തിന്റെ 10% എഐയുമായി ബന്ധപ്പെട്ട പ്രവർത്തനങ്ങളിൽ നിന്നാണ് ലഭിച്ചത്. എഐ ബിസിനസ് കൂടുതൽ വളരുന്നതോടെ കമ്പനിയുടെ ലാഭമാർജിനും മെച്ചപ്പെടുമെന്നാണ് പ്രതീക്ഷിക്കുന്നത്.പുതിയ നിയമനങ്ങളിൽ എഐ വിദഗ്ധർക്ക് മുൻഗണനരണ്ടാം പാദത്തിൽ ടിസിഎസ് 4,500 ജീവനക്കാരെ നിയമിച്ചു. ഇതിൽ 25% മുതൽ 30% വരെ പേർക്ക് പ്രത്യേക എഐ വൈദഗ്ധ്യമുണ്ടായിരുന്നുവെന്ന് ചീഫ് ഓപ്പറേറ്റിങ് ഓഫീസർ ആരതി സുബ്രഹ്മണ്യൻ പിടിഐയോട് പറഞ്ഞതായി ഇന്ത്യാ ടുഡേ ടെക്ക് റിപ്പോർട്ട് ചെയ്യുന്നു. നിയമിതരായവരിൽ ഏകദേശം 80% പേരും പുതുതലമുറ സാങ്കേതികവിദ്യകളിൽ പ്രാവീണ്യമുള്ളവരാണെന്നും അവർ വ്യക്തമാക്കി. വരും കാലത്തും ഈ നിയമനരീതി തുടരുമെന്നാണ് കമ്പനി പ്രതീക്ഷിക്കുന്നത്. ആവശ്യമായ വൈദഗ്ധ്യമുള്ള ഉദ്യോഗാർഥികൾ തൊഴിൽവിപണിയിൽ ലഭ്യമാണെന്നും ടിസിഎസ് ചൂണ്ടിക്കാട്ടുന്നു. എഐ, ഡിജിറ്റൽ സാങ്കേതികവിദ്യകൾക്ക് പ്രാധാന്യം വർധിക്കുന്നതോടെ പുതിയ ബിരുദധാരികൾക്കും ഈ മേഖലയിൽ കൂടുതൽ അവസരങ്ങൾ ലഭിച്ചേക്കും.പുതുമുഖങ്ങൾ മാത്രമല്ല, പരിചയസമ്പന്നർക്കും അവസരംഎഐ വൈദഗ്ധ്യത്തിന്റെ ആവശ്യകത പുതിയ ഉദ്യോഗാർഥികളിൽ മാത്രം ഒതുങ്ങുന്നതല്ലെന്നാണ് ടിസിഎസിന്റെ നിലപാട്. മാറുന്ന സാങ്കേതികവിദ്യകൾ പഠിക്കാനും അവയുമായി പൊരുത്തപ്പെടാനുമുള്ള മനോഭാവമാണ് പ്രധാന ഘടകം എന്ന് കമ്പനിയുടെ ചീഫ് എക്സിക്യൂട്ടീവ് ഓഫീസറും മാനേജിങ് ഡയറക്ടറുമായ കെ. കൃതിവാസൻ പറയുന്നു. “പഠിക്കാൻ തയ്യാറുള്ള ഒരു മിഡ്-ലെവൽ എൻജിനീയർക്ക് ഇത് വലിയ നേട്ടമാണ്. സാങ്കേതികവിദ്യയുടെ നിലവിലെ സാഹചര്യത്തെക്കുറിച്ചും ബന്ധപ്പെട്ട മേഖലയെക്കുറിച്ചും അവർക്ക് ഇതിനകം ധാരണയുണ്ടാകും,” കൃതിവാസൻ പറഞ്ഞു.എഐയുടെ വളർച്ചയ്ക്കിടയിലും ബിസിനസ് ആവശ്യങ്ങളും നിലവിലുള്ള സാങ്കേതിക സംവിധാനങ്ങളും മനസിലാക്കുന്ന പരിചയസമ്പന്നരായ ജീവനക്കാർക്ക് ആവശ്യകത തുടരുമെന്നാണ് ഇതിലൂടെ വ്യക്തമാകുന്നത്. പ്രത്യേക വൈദഗ്ധ്യമുള്ള ജീവനക്കാരെ കണ്ടെത്തുന്നതിനൊപ്പം ലയനങ്ങൾ, ഏറ്റെടുക്കലുകൾ, പങ്കാളിത്തങ്ങൾ എന്നിവയിലൂടെയും എഐ ശേഷി വർധിപ്പിക്കാനാണ് ടിസിഎസിന്റെ നീക്കം.എഐ ബിസിനസ് ലാഭമാർജിൻ ഉയർത്തുമോ?കമ്പനിയുടെ ലാഭക്ഷമത മെച്ചപ്പെടുത്തുന്നതിനുള്ള പ്രധാന ഘടകമായും എഐയെ ടിസിഎസ് കാണുന്നു. എഐ കരാറുകളുടെ എണ്ണം വർധിക്കുന്നതോടെ ലാഭമാർജിനിൽ പുരോഗതിയുണ്ടാകാമെന്ന് കൃതിവാസൻ വ്യക്തമാക്കി. ഉപഭോക്താക്കൾ തുടക്കത്തിൽ ഒരു പ്രത്യേക വിഭാഗത്തിൽ ചെറിയ എഐ പദ്ധതികളാണ് നടപ്പാക്കുന്നത്. നിക്ഷേപത്തിലൂടെ നേട്ടമുണ്ടാകുന്നുവെന്ന് ബോധ്യപ്പെട്ടാൽ മറ്റ് പ്രവർത്തന മേഖലകളിലേക്കും ഇത്തരം പദ്ധതികൾ വ്യാപിപ്പിക്കാറുണ്ട്. എഐ കരാറുകളെ പ്രത്യേകമായി തരംതിരിക്കുന്നതിൽ കമ്പനി ജാഗ്രത പുലർത്തുന്നുണ്ടെങ്കിലും ടിസിഎസ് ഏറ്റെടുക്കുന്ന മിക്ക ജോലികളിലും ഇപ്പോൾ എഐയുടെ പങ്കുണ്ടെന്ന് കൃതിവാസൻ പറഞ്ഞു. സെപ്റ്റംബർ പാദത്തിൽ കമ്പനിയുടെ മൊത്തം കരാർ മൂല്യം 9.6 ബില്യൺ ഡോളറായിരുന്നു. ഇതിൽ എഐയുമായി ബന്ധപ്പെട്ട കരാറുകളുടെ വിഹിതം കമ്പനി പ്രത്യേകം വെളിപ്പെടുത്തിയിട്ടില്ല.അമേരിക്കയിലെ തൊഴിൽ അനിശ്ചിതത്വവും വെല്ലുവിളിഎഐ ബിസിനസ് വികസിപ്പിക്കാനുള്ള ടിസിഎസിന്റെ നീക്കം, അമേരിക്കയിലെ കുടിയേറ്റ നിയമങ്ങളുമായി ബന്ധപ്പെട്ട അനിശ്ചിതത്വങ്ങൾ ഇന്ത്യൻ ഐടി കമ്പനികളെ ബാധിക്കുന്നതിനിടയിലാണ്. ടിസിഎസ്, ഇൻഫോസിസ്, വിപ്രോ, എച്ച്‌സിഎൽടെക് എന്നിവയുൾപ്പെടെ എട്ട് സാങ്കേതിക കമ്പനികളുടെ സ്ഥിരം തൊഴിൽ സാക്ഷ്യപ്പെടുത്തൽ അപേക്ഷകൾക്കായുള്ള പെർം (പിഇആർഎം) നടപടികൾ അമേരിക്കൻ സർക്കാർ അടുത്തിടെ താൽക്കാലികമായി നിർത്തിവച്ചിരുന്നു. തൊഴിൽ അടിസ്ഥാനത്തിലുള്ള നിരവധി ഗ്രീൻ കാർഡ് അപേക്ഷകളിൽ നിർണായക ഘട്ടമാണ് പെർം.എന്നാൽ ഈ നടപടി തങ്ങളുടെ ജീവനക്കാരുടെ നിയമന പദ്ധതികളെയോ ഉപഭോക്തൃ സേവനങ്ങളെയോ ബാധിക്കില്ലെന്നാണ് ടിസിഎസിന്റെ നിലപാട്. കഴിഞ്ഞ രണ്ട് വർഷത്തിനിടെ പെർം അപേക്ഷകളുടെ എണ്ണം ഒറ്റ അക്കത്തിലായിരുന്നുവെന്നും കമ്പനി വ്യക്തമാക്കിയിട്ടുണ്ട്. അതിനിടെ, അമേരിക്കയിൽ തൊഴിൽ അനിശ്ചിതത്വം നേരിടുന്ന ഇന്ത്യൻ പ്രൊഫഷണലുകൾ നാട്ടിലേക്ക് മടങ്ങി ഇന്ത്യയുടെ സാങ്കേതിക മേഖലയെ ശക്തിപ്പെടുത്തണമെന്ന് സോഹോ സ്ഥാപകൻ ശ്രീധർ വെമ്പു ആവശ്യപ്പെട്ടു. എഐ നിക്ഷേപങ്ങൾ വർധിപ്പിക്കുന്നതിനൊപ്പം നിയമനരീതികൾ പുനഃപരിശോധിക്കുകയും വിദേശ തൊഴിൽവിപണിയിലെ മാറ്റങ്ങളെ നേരിടുകയും ചെയ്യേണ്ട സാഹചര്യത്തിലാണ് ഇന്ത്യൻ ഐടി മേഖല. വരും വർഷങ്ങളിൽ എഐ വൈദഗ്ധ്യം തൊഴിൽ അവസരങ്ങൾ നിർണയിക്കുന്ന പ്രധാന ഘടകങ്ങളിലൊന്നായി മാറുമെന്ന സൂചനയാണ് ടിസിഎസിന്റെ പുതിയ നിലപാട് നൽകുന്നത്.