ദില്ലിയിലെ വായുമലിനീകരണം കുറയ്ക്കാൻ 104 കോടിയുടെ പദ്ധതി; സ്വകാര്യ കമ്പനികളും സ്റ്റാർട്ടപ്പുകളും കൈകോർക്കുന്നു

ദില്ലി: തലസ്ഥാന നഗരിയിലെ വായുമലിനീകരണം തടയുന്നതിനായി സ്വകാര്യ കമ്പനികളെയും സ്റ്റാർട്ടപ്പുകളെയും പങ്കാളികളാക്കി 104 കോടി രൂപയുടെ പൈലറ്റ് പദ്ധതിയുമായി ദില്ലി സർക്കാർ. നഗരത്തിലെ 40 പ്രധാന കേന്ദ്രങ്ങളിൽ PM10, PM2.5 നിരക്കുകൾ 20 ശതമാനം വരെ കുറയ്ക്കുകയാണ് പദ്ധതിയിലൂടെ ലക്ഷ്യമിടുന്നത്.ഡൽഹി പൊല്യൂഷൻ കൺട്രോൾ കമ്മിറ്റിയാണ് (DPCC) ഒരു വർഷം ദൈർഘ്യമുള്ള ഈ പദ്ധതി നടപ്പിലാക്കുന്നത്. ഖാൻ മാർക്കറ്റ്, കണോട്ട് പ്ലേസ്, ഡിഫൻസ് കോളനി തുടങ്ങിയ തുറസായതും ഭാഗികമായി അടച്ചതുമായ പൊതുസ്ഥലങ്ങളാണ് ഇതിനായി തിരഞ്ഞെടുത്തിട്ടുള്ളത്. ഓരോ കേന്ദ്രത്തിലും ഒന്നു മുതൽ ഒന്നര ഏക്കർ വരെയുള്ള പ്രദേശങ്ങളിൽ അന്തരീക്ഷ മലിനീകരണം കുറയ്ക്കുന്നതിനുള്ള വിവിധ സാങ്കേതികവിദ്യകൾ പരീക്ഷിക്കും.40 കേന്ദ്രങ്ങൾ, 5 പ്രധാന വിഭാഗങ്ങൾപദ്ധതി നടപ്പിലാക്കുന്ന 40 സ്ഥലങ്ങളെ അഞ്ച് വിഭാഗങ്ങളായാണ് തിരിച്ചിരിക്കുന്നത്. വ്യാപാര കേന്ദ്രങ്ങൾ (Marketplaces) വാണിജ്യ വ്യവസായ കേന്ദ്രങ്ങൾ (Commercial & Business Hubs) ഗതാഗത കേന്ദ്രങ്ങൾ (Transportation Hubs) വിനോദസഞ്ചാര കേന്ദ്രങ്ങൾ (Tourist Destinations) ആശുപത്രികളും വിദ്യാഭ്യാസ സ്ഥാപനങ്ങളുംഇതിൽ 29 സ്ഥലങ്ങളും (72.5%) വാണിജ്യ മേഖലകളിലാണ്. സെൻട്രൽ, സൗത്ത് ഡൽഹി മേഖലകളിൽ മാത്രം 19 കേന്ദ്രങ്ങളുണ്ട്. കണോട്ട് പ്ലേസിലെ സെൻട്രൽ പാർക്ക്, ഇന്ത്യാ ഗേറ്റ് ചിൽഡ്രൻസ് പാർക്ക്, ലോട്ടസ് ടെമ്പിൾ കൊറിഡോർ, കശ്മീരി ഗേറ്റ്, ആനന്ദ് വിഹാർ, സാരായ് കാലേ ഖാൻ ഐഎസ്ബിടികൾ എന്നിവയും ജി ബി പന്ത്, ദീൻ ദയാൽ ഉപാധ്യായ ഉൾപ്പെടെയുള്ള നാല് ആശുപത്രികളും ഇതിൽ ഉൾപ്പെടുന്നു. ഡൽഹി യൂണിവേഴ്സിറ്റി ആർട്സ് ഫാക്കൽറ്റിയാണ് പദ്ധതിയിൽ ഉൾപ്പെട്ട ഏക വിദ്യാഭ്യാസ സ്ഥാപനം. ചന്ദ്നി ചൗക്ക് മെയിൻ റോഡ്, ബാബാ ഖരക് സിംഗ് മാർഗ് തുടങ്ങിയ മൂന്ന് പ്രധാന റോഡുകളിലും സംവിധാനങ്ങൾ ഏർപ്പെടുത്തും.നൂതന സാങ്കേതികവിദ്യയും നിരീക്ഷണവുംഔട്ട്ഡോർ എയർ പ്യൂരിഫയറുകൾ, മിസ്റ്റ് അധിഷ്ഠിത സ്ക്രബ്ബറുകൾ, ഇലക്ട്രോസ്റ്റാറ്റിക് പ്രെസിപിറ്റേറ്ററുകൾ തുടങ്ങിയ ഏത് തരം സാങ്കേതികവിദ്യകളും കമ്പനികൾക്ക് ഉപയോഗിക്കാം. എന്നാൽ ഇവ സർക്കാർ ലബോറട്ടറിയുടെ അംഗീകാരമുള്ളതും ഓസോൺ ഉദ്‌വമനം, അമിത ശബ്ദം തുടങ്ങിയ പാർശ്വഫലങ്ങൾ ഉണ്ടാക്കാത്തതുമാകണം. സെൻസറുകൾ ഉപയോഗിച്ച് പ്രതിദിന വായുനിലവാരം ഡിപിസിസി നേരിട്ട് നിരീക്ഷിക്കും. കൂടാതെ പദ്ധതിയുടെ ഫലപ്രാപ്തി വിലയിരുത്താൻ സ്വതന്ത്ര സമിതിയെയും ചുമതലപ്പെടുത്തിയിട്ടുണ്ട്.