ഇന്ത്യ-അമേരിക്ക വ്യാപാര കരാറിൽ ശുഭ വാർത്ത ഉടൻ, മാർക്കോ റൂബിയോ മുംബൈയിൽ; എസ് ജയശങ്കറുമായി കൂടിക്കാഴ്ച, നിർണായക പ്രഖ്യാപനത്തിന് സാധ്യത

മുംബൈ: ഇന്ത‌്യ - യു എസ് വ്യാപാര കരാറിൽ ശുഭ വാർത്ത ഉടനെന്ന് അമേരിക്കൻ സ്റ്റേറ്റ് സെക്രട്ടറി മാർക്കോ റൂബിയോ. ഇന്ത്യ സന്ദർശനത്തിനെത്തിയ റൂബിയോ മുംബൈയിൽ വിദേശകാര്യ മന്ത്രി എസ് ജയശങ്കറുമായി കൂടിക്കാഴ്ച നടത്തുകയാണ്. വ്യാപാര കരാറിൽ നല്ല വാർത്ത വൈകാതെ പ്രതീക്ഷിക്കാം എന്നാണ് കൂടിക്കാഴ്ചയ്ക്ക് മുന്നേ റൂബിയോ മാധ്യമങ്ങളോട് പ്രതികരിച്ചത്. വളരെക്കുറച്ച് കാര്യങ്ങളെ ഇനി പരിഹരിക്കാനുള്ളു എന്നും റൂബിയോ വ്യക്തമാക്കി. ഇന്ത്യ - യു എസ് വ്യാപാര കരാർ തന്നെയാണ് റൂബിയോ - ജയശങ്കർ കൂടിക്കാഴ്ചയിലെ പ്രധാന ചർച്ചാ വിഷയം. റഷ്യയിൽ നിന്നുള്ള എണ്ണ ഇറക്കുമതിയിലെ തീരുവ കാര്യങ്ങളും ചർച്ചയാകും. റഷ്യയിൽ നിന്ന് എണ്ണ വാങ്ങുന്നതിന് 100% വരെ അധിക താരിഫ് ഏർപ്പെടുത്താനുള്ള നീക്കം അമേരിക്ക രണ്ട് മാസത്തേക്ക് മരവിപ്പിച്ചിരുന്നു. ഊർജ്ജ രംഗത്തെ സഹകരണവും ഇരു രാജ്യങ്ങളും ചർച്ച ചെയ്യും. റഷ്യ - യുക്രൈൻ സംഘർഷം, പശ്ചിമേഷ്യൻ സംഘർഷം എന്നിവ പരിഹരിക്കുന്നതിനുള്ള നടപടികളും വിലയിരുത്തും. കൂടിക്കാഴ്ചക്ക് ശേഷം നിർണായക പ്രഖ്യാപനം ഉണ്ടാകാൻ സാധ്യതയുണ്ട്. അതേസമയം വൈകിട്ട് അമേരിക്കൻ സ്വാതന്ത്ര്യത്തിൻറെ ഇരുനൂറ്റിയമ്പതാം വാർഷികാഘോഷങ്ങളുടെ ഭാഗമായ ചടങ്ങും മുംബൈയിൽ നടക്കും. നാളെ മുംബൈയിൽ നിന്ന് ജാംനഗറിലേക്ക് പോകുന്ന മാർക്കോ റൂബിയോ റിലയൻസിന്റെ റിഫൈനറിയടക്കം സന്ദർശിക്കുന്നുണ്ട്.2 മാസത്തേക്ക് റഷ്യൻ എണ്ണയിൽ ആശങ്ക വേണ്ടഅതേസമയം റഷ്യയിൽ നിന്ന് എണ്ണ വാങ്ങുന്ന രാജ്യങ്ങൾക്ക് അധിക തീരുവയിൽ ട്രംപ് ഭരണകൂടം നൽകിയ ഇളവ് രണ്ട് മാസത്തേക്കാണെന്ന് സ്റ്റേറ്റ് സെക്രട്ടറി മാർക്കോ റൂബിയോ ഇന്നലെ വ്യക്തമാക്കിയിരുന്നു. പകരം ഇന്ധനം മറ്റിടങ്ങളിൽ നിന്ന് വാങ്ങാനുള്ള നടപടികൾ പൂർത്തിയാക്കാനാണ് രണ്ട് മാസം നൽകിയതെന്നും മാർക്കോ റൂബിയോ വിശദീകരിച്ചു. ഇന്ത്യ അടക്കമുള്ള സുഹൃദ് രാജ്യങ്ങൾക്ക്, റഷ്യൻ എണ്ണക്ക് പകരം സംവിധാനം ഏർപ്പെടുത്താനുള്ള സമയമാണ് നൽകിയിരിക്കുന്നത് എന്നും യു എസ് സ്റ്റേറ്റ് സെക്രട്ടറി വിവരിച്ചു. അതേസമയം അധിക താരിഫ് തൽക്കാലമില്ല എന്ന് അമേരിക്ക പ്രഖ്യാപിച്ച സാഹചര്യത്തിൽ യു എസിലെ ഫ്ലോറിഡയിൽ നടക്കുന്ന ജി 20 ഉച്ചകോടിക്ക് പ്രധാനമന്ത്രി നരേന്ദ്ര മോദി പോകും എന്ന് ഉറപ്പായി. അധിക താരിഫ് രണ്ട് രാജ്യങ്ങൾക്കും ഇടയിലുള്ള ബന്ധത്തെ ബാധിക്കുമെന്ന് നേരത്തെ ഇന്ത്യ താക്കീത് നൽകിയിരുന്നു. പ്രസിഡന്റ് ഡോണൾഡ് ട്രംപിനെ ജി 20 ഉച്ചകോടിക്കിടെ കാണുമ്പോൾ പ്രധാനമന്ത്രി താരിഫ് വിഷയം ഉന്നയിക്കാനാണ് സാധ്യത.