സിജെപി നേതാക്കൾക്ക് നിയമത്തോട് ബഹുമാനമില്ലെന്ന് എക്സിക്യൂട്ടീവ് മജിസ്ട്രേറ്റ്; രണ്ട് ദിവസത്തേക്ക് കൂടി ജുഡീഷ്യൽ കസ്റ്റഡിയിൽ

ദില്ലി: സിജെപി നേതാക്കളായ സൗരവ് ദാസിനും അശുതോഷ് റാങ്കയ്ക്കും നിയമത്തോട് യാതൊരു ബഹുമാനവുമില്ലെന്ന് സ്പെഷ്യൽ എക്സിക്യൂട്ടീവ് മജിസ്ട്രേറ്റ്. ഇരുവരുടെയും ജുഡീഷ്യൽ കസ്റ്റഡി രണ്ട് ദിവസത്തേക്ക് കൂടി നീട്ടിക്കൊണ്ടുള്ള ഉത്തരവിലാണ് മജിസ്ട്രേറ്റ് ഋതു രാജ് ഇക്കാര്യം പരാമർശിച്ചത്. ഭാരതീയ നാഗരിക് സുരക്ഷാ സംഹിതയുടെ (BNSS) 126, 170 വകുപ്പുകൾ പ്രകാരം ആരംഭിച്ച നടപടികളുടെ ഭാഗമായാണ് ഉത്തരവ്.ഒക്ടോബർ 19-ന് പുറപ്പെടുവിച്ച ഉത്തരവിൽ, ഒക്ടോബർ 11-ന് ഇരുവരും ഒപ്പിട്ട ബോണ്ടിലെ വ്യവസ്ഥകൾ മനഃപൂർവം ലംഘിക്കുകയും പിന്നാലെ സമാധാനലംഘനം നടത്തുകയും ചെയ്തതായി മജിസ്ട്രേറ്റ് നിരീക്ഷിച്ചു. ഡി-നോട്ടിഫൈ ചെയ്ത മേഖലകളിൽ ആവർത്തിച്ച് പ്രതിഷേധത്തിന് ആഹ്വാനം ചെയ്യുന്നത് നിയമത്തോടുള്ള അനാദരവാണ്. ഭാവിയിൽ സമാനമായ നിയമലംഘനങ്ങൾ ആവർത്തിക്കില്ലെന്ന് വിശ്വസിക്കാൻ ഇരുവരുടെയും പെരുമാറ്റവും ഹിയറിങ്ങിനിടെ നടത്തിയ പ്രസ്താവനകളും മതിയായ ഉറപ്പുനൽകുന്നില്ലെന്നും ഉത്തരവിൽ ചൂണ്ടിക്കാട്ടി.ഇരുവരുടെയും ജുഡീഷ്യൽ കസ്റ്റഡി അഞ്ച് ദിവസത്തേക്ക് കൂടി നീട്ടണമെന്നാവശ്യപ്പെട്ട് ഡൽഹി പൊലീസ് നൽകിയ അപേക്ഷ പരിഗണിക്കവെയാണ് മജിസ്ട്രേറ്റിന്റെ നിരീക്ഷണങ്ങൾ. കേസുമായി ബന്ധപ്പെട്ട സംഭവവികാസങ്ങളുടെ പശ്ചാത്തലത്തിൽ സമാധാനലംഘനത്തിന് അടിയന്തര സാധ്യതയുണ്ടെന്ന് അന്വേഷണ ഉദ്യോഗസ്ഥൻ കോടതിയെ അറിയിച്ചു. അതേസമയം, തങ്ങൾക്കെതിരായ നടപടിയെ അടിയന്തരാവസ്ഥയോടാണ് ഉപമിക്കുന്നതെന്ന് സിജെപി നേതാവ് സൗരവ് ദാസ് ഒരു മാധ്യമത്തോട് പ്രതികരിച്ചു.