ഇറാൻ യുദ്ധത്തിൽ ട്രംപിനോട് ഇടഞ്ഞ് മകൻ; പിതാവിനോട് നേരിട്ട് വിയോജിപ്പ് അറിയിച്ചതായി റിപ്പോർട്ട്

വാഷിങ്ടൺ: യുഎസ് പ്രസിഡന്റ് ഡൊണാൾഡ് ട്രംപിന്റെ മകൻ ഡൊണാൾഡ് ട്രംപ് ജൂനിയർ ഇറാൻ യുദ്ധത്തിൽ തനിക്കുള്ള എതിർപ്പ് പിതാവിനെ അറിയിച്ചിരുന്നതായി റിപ്പോർട്ട്. ഡൊണാൾഡ് ട്രംപ് ജൂനിയറുടെ അടുത്ത വൃത്തങ്ങളെ ഉദ്ധരിച്ച് ദി അറ്റ്ലാന്റിക് ആണ് ഇക്കാര്യം റിപ്പോർട്ട് ചെയ്തത്.ഇറാനിലെ സൈനിക ഇടപെടലിനെ ഡൊണാൾഡ് ട്രംപ് ജൂനിയർ ശക്തമായി എതിർത്തിരുന്നതായാണ് റിപ്പോർട്ട്. ഇക്കാര്യം പിതാവായ ഡൊണാൾഡ് ട്രംപിനെ അദ്ദേഹം സ്വകാര്യമായി അറിയിക്കുകയുംചെയ്തു. എന്നാൽ, പിതാവുമായുള്ള അഭിപ്രായവ്യത്യാസം പരസ്യമാക്കാൻ ഡൊണാൾഡ് ട്രംപ് ജൂനിയർ ആ​ഗ്രഹിച്ചിരുന്നില്ലെന്നും അദ്ദേഹവുമായി അടുപ്പമുള്ളവർ വ്യക്തമാക്കി.പശ്ചിമേഷ്യയിൽ വീണ്ടും ഒരു സൈനിക സംഘർഷത്തിൽ ഏർപ്പെടുന്നതിൽനിന്ന് അമേരിക്ക മാറിനിൽക്കണമെന്നതായിരുന്നു ഡൊണാൾഡ് ട്രംപ് ജൂനിയറിന്റെ നിലപാട്. വിദേശരാജ്യങ്ങളിലുള്ള അമേരിക്കൻ സൈനിക ഇടപെടലിനെ ഏറെക്കാലമായി എതിർത്തുവരുന്നയാളാണ് അദ്ദേഹം. ഇസ്രയേലുമായി ചേർന്ന് പിതാവ് ഡൊണാൾഡ് ട്രംപ് ഇറാനെതിരേ സൈനിക നീക്കം ആരംഭിച്ചപ്പോഴും ഡൊണാൾഡ് ട്രംപ് ജൂനിയർ തന്റെ എതിർപ്പ് അറിയിച്ചിരുന്നതായും റിപ്പോർട്ടിൽ പറയുന്നു.നേരത്തേ 2024-ൽ ട്രംപിന്റെ തെരഞ്ഞെടുപ്പ് പ്രചരണത്തിനിടെ അമേരിക്ക ഇനി പശ്ചിമേഷ്യയിൽ സൈനികനീക്കം നടത്തില്ലെന്ന് ട്രംപ് വാ​ഗ്ദാനം ചെയ്തിരുന്നു. ഈ വാ​ഗ്ദാനത്തെ ശക്തമായി പിന്തുണച്ചിരുന്നയാളാണ് ഡൊണാൾഡ് ട്രംപ് ജൂനിയർ. അതേസമയം, ഇറാൻ യുദ്ധവുമായി ബന്ധപ്പെട്ട് ട്രംപിന്റെ മാ​ഗാ(MAGA- Make America Great Again) പ്രസ്ഥാനത്തിലും ഭിന്നതകൾ രൂക്ഷമാണെന്നാണ് റിപ്പോർട്ട്. വിദേശത്തെ സൈനിക ഇടപെടലുകൾ രാജ്യത്തെ ദോഷകരമായി ബാധിക്കുന്നുവെന്നാണ് ഒരുവിഭാ​ഗത്തിന്റെ വാദം. എന്നാൽ, എതിരാളികൾക്കെതിരേ ശക്തമായ സൈനിക നീക്കം നടത്തണമെന്ന് വാദിക്കുന്നവരുമുണ്ട്. ഡൊണാൾഡ് ട്രംപ് ജൂനിയർ, വൈസ് പ്രസിഡന്റ് ജെ ഡി വാൻസ് തുടങ്ങിയവർ വിദേശ ഇടപെടലുകളെ എതിർക്കുന്നവരാണെന്നാണ് റിപ്പോർട്ടുകളിൽ പറയുന്നത്. ഇസ്രയേലുമായി ചേർന്ന് ഇറാനെതിരേ ആരംഭിച്ച സൈനികനീക്കത്തെ ജെ ഡി വാൻസ് നേരത്തേ സ്വകാര്യമായി എതിർത്തിരുന്നതായും റിപ്പോർട്ടുകളിൽ പറയുന്നു.