ഇമെയിൽ പരിശോധിക്കാൻ എഐ -യോട് പറഞ്ഞു; വർഷം 9,000 ഡോളർ സബ്‌സ്‌ക്രിപ്ഷൻ ചെലവെന്ന് സിസ്‌കോ പ്രസിഡന്റ്
ഡിജിറ്റൽ കാലത്ത് നമ്മുടെ സാമ്പത്തിക കാര്യങ്ങൾ കൈകാര്യം ചെയ്യുന്നത് പലപ്പോഴും പ്രതീക്ഷിക്കുന്നതിലും സങ്കീർണമാണ്. ഉപയോഗിക്കാത്തതോ മറന്നുപോയതോ ആയ സബ്‌സ്‌ക്രിപ്ഷനുകളുടെ ആവർത്തിച്ചുള്ള നിരക്കുകൾ കാലക്രമേണ വലിയ ചെലവായി മാറാം. ടെക്നോളജി രംഗത്തെ ഉന്നത ഉദ്യോഗസ്ഥർക്കും ഈ പ്രശ്‌നത്തിൽ നിന്ന് ഒഴി
ഡിജിറ്റൽ കാലത്ത് നമ്മുടെ സാമ്പത്തിക കാര്യങ്ങൾ കൈകാര്യം ചെയ്യുന്നത് പലപ്പോഴും പ്രതീക്ഷിക്കുന്നതിലും സങ്കീർണമാണ്. ഉപയോഗിക്കാത്തതോ മറന്നുപോയതോ ആയ സബ്‌സ്‌ക്രിപ്ഷനുകളുടെ ആവർത്തിച്ചുള്ള നിരക്കുകൾ കാലക്രമേണ വലിയ ചെലവായി മാറാം. ടെക്നോളജി രംഗത്തെ ഉന്നത ഉദ്യോഗസ്ഥർക്കും ഈ പ്രശ്‌നത്തിൽ നിന്ന് ഒഴിവില്ലെന്ന് തെളിയിക്കുകയാണ് സിസ്‌കോ പ്രസിഡന്റ് ജീതു പട്ടേലിന്റെ അനുഭവം. പേഴ്സണൽ എഐ ഏജന്റ് തന്റെ ഇമെയിൽ ഇൻബോക്‌സ് പരിശോധിച്ചപ്പോഴാണ് പ്രതിവർഷം 9,000 ഡോളറിന്റെ ആവർത്തിച്ചുള്ള സബ്‌സ്‌ക്രിപ്ഷൻ ചെലവുകൾ കണ്ടെത്തിയത്.ബിസിനസ് ഇൻസൈഡറിന് നൽകിയ അഭിമുഖത്തിലാണ് പട്ടേൽ ഇക്കാര്യം വെളിപ്പെടുത്തിയത്. മെറ്റയുടെ മ്യൂസ്, ഓപ്പൺ എഐയുടെ ഡോട്‌സ് എന്നിവയുൾപ്പെടെ നിരവധി പേഴ്സണൽ എഐ ഏജന്റുകൾ താൻ ഉപയോഗിക്കുന്നുണ്ടെന്ന് അദ്ദേഹം പറഞ്ഞു. വാർത്തകൾ ഒരുമിച്ച് ക്രോഡീകരിക്കുക, ഫോൺ കോളുകളുടെ സംഗ്രഹം തയ്യാറാക്കുക, മകൾക്കായി സംഗീത പരിപാടികളുടെ ടിക്കറ്റുകൾ ബുക്ക് ചെയ്യുക തുടങ്ങിയ കാര്യങ്ങൾക്ക് ഇവയുടെ സഹായം തേടാറുണ്ടെന്നും പട്ടേൽ വ്യക്തമാക്കി.എന്നാൽ, തന്റെ സബ്‌സ്‌ക്രിപ്ഷൻ ചെലവുകൾ പരിശോധിച്ച് കുറയ്ക്കാൻ എഐ ഏജന്റ് സഹായിച്ചതാണ് അദ്ദേഹത്തെ ഏറെ അത്ഭുതപ്പെടുത്തിയത്.ഇമെയിൽ പരിശോധിക്കാൻ എഐ ഏജന്റിന് അനുമതി നൽകിയതിനു പിന്നാലെ, പ്രതിവർഷം 9,000 ഡോളറിന്റെ സബ്‌സ്‌ക്രിപ്ഷനുകൾക്കായി പണം ചെലവഴിക്കുന്നുണ്ടെന്നും അവയെല്ലാം ആവശ്യമാണോ എന്ന് പുനഃപരിശോധിക്കണമെന്നും ഏജന്റ് അറിയിച്ചതായി പട്ടേൽ പറഞ്ഞു.തുടർന്ന്, താൻ ഉപയോഗിക്കുന്ന എല്ലാ സബ്‌സ്‌ക്രിപ്ഷനുകളും ഒരു പട്ടികരൂപത്തിൽ തയ്യാറാക്കാൻ അദ്ദേഹം എഐ ഏജന്റിനോട് ആവശ്യപ്പെട്ടു. ഇതോടെ, ആവശ്യമില്ലാത്ത ചില സബ്‌സ്‌ക്രിപ്ഷനുകളും ഒരേ സമയം രണ്ട് വ്യത്യസ്ത പ്ലാനുകൾക്ക് അബദ്ധത്തിൽ പണം നൽകുന്നുണ്ടെന്ന കാര്യവും വ്യക്തമായി. തുടർന്ന്, ചില സബ്‌സ്‌ക്രിപ്ഷനുകൾ റദ്ദാക്കാനും അദ്ദേഹം എഐ ഏജന്റിനോട് നിർദേശിച്ചു.“ഇത്ര എളുപ്പത്തിൽ ഇതെല്ലാം ചെയ്യാൻ കഴിഞ്ഞത് അൽപ്പം ഭയപ്പെടുത്തുന്ന അനുഭവമായിരുന്നു” എന്ന് പട്ടേൽ ബിസിനസ് ഇൻസൈഡറിനോട് പറഞ്ഞു. പ്രതിമാസം 20 ഡോളർ ചെലവുള്ള എഐ ഏജന്റിന്റെ പ്ലാനിനായി നൽകിയ തുകയുടെ പലമടങ്ങ് ഇതിനകം ലാഭിക്കാൻ കഴിഞ്ഞുവെന്നും പട്ടേൽ വിശദീകരിച്ചു.എഐ സാങ്കേതികവിദ്യയുടെ വളർച്ച തൊഴിൽ മേഖലയിലുണ്ടാക്കുന്ന മാറ്റങ്ങളെക്കുറിച്ചും പട്ടേൽ നേരത്തേ അഭിപ്രായപ്പെട്ടിരുന്നു. കഴിഞ്ഞ മാസം എബിസിക്ക് നൽകിയ അഭിമുഖത്തിൽ, സാങ്കേതികവിദ്യാ മേഖലയിലെ പിരിച്ചുവിടലുകൾ തുടരുന്നുണ്ടെങ്കിലും എഐ ഭാവിയിൽ കൂടുതൽ തൊഴിലവസരങ്ങൾ സൃഷ്ടിക്കുമെന്നാണ് തന്റെ വിശ്വാസമെന്ന് അദ്ദേഹം പറഞ്ഞു.അമേരിക്കൻ സാങ്കേതികവിദ്യാ കമ്പനിയായ സിസ്‌കോ കമ്പ്യൂട്ടർ നെറ്റ്‌വർക്കിങ് ഉൽപ്പന്നങ്ങൾക്കും അനുബന്ധ സാങ്കേതികവിദ്യകൾക്കും പേരുകേട്ട സ്ഥാപനമാണ്.