വിപണിയിലെത്തി ദിവസങ്ങൾക്കുള്ളിൽ ഐഫോൺ ഡുവോയ്ക്ക് പണി കിട്ടി! സ്‌ക്രീൻ പൊട്ടുന്നു, പകരം ഫോൺ നൽകുമെന്ന് ആപ്പിൾ

ആപ്പിളിന്റെ ആദ്യ മടക്കാവുന്ന സ്മാർട്ട്ഫോണായ ഐഫോൺ ഡുവോ വിപണിയിലെത്തി ദിവസങ്ങൾക്കുള്ളിൽ സ്‌ക്രീൻ തകരാർ റിപ്പോർട്ട് ചെയ്തതോടെ ഉപഭോക്താക്കൾ ആശങ്കയിൽ. ഫോണിന്റെ അകത്തെ ഡിസ്‌പ്ലേയിൽ വിള്ളലുകളും വരകളും പ്രത്യക്ഷപ്പെടുന്നതായാണ് പരാതി. പ്രശ്നം സ്ഥിരീകരിച്ച ആപ്പിൾ, തകരാർ നേരിടുന്ന ഫോണുകൾ മാറ്റിനൽകുമെന്ന് അറിയിച്ചു.കഴിഞ്ഞ ആഴ്ചയാണ് ഏറെ പ്രതീക്ഷയോടെ കാത്തിരുന്ന ഐഫോൺ ഡുവോയുടെ വിതരണം ആപ്പിൾ ആരംഭിച്ചത്. പാസ്‌പോർട്ട് തുറക്കുന്നതുപോലെ മടക്കിവെക്കാനും നിവർത്താനും കഴിയുന്ന ഫോണിന് വിപണിയിൽ വലിയ സ്വീകാര്യതയാണ് ലഭിച്ചത്. ഓൺലൈൻ വിൽപ്പന ആരംഭിച്ച് മിനിറ്റുകൾക്കുള്ളിൽ സ്റ്റോക്ക് തീർന്നു. പരിമിതമായ സ്റ്റോക്കിൽ ഫോൺ വാങ്ങാനായി വിവിധ രാജ്യങ്ങളിൽ ഉപഭോക്താക്കൾ കടകൾക്ക് മുന്നിൽ ക്യൂ നിൽക്കുകയും ചെയ്തു. എന്നാൽ, ആദ്യമായി ഫോൺ വാങ്ങിയ ചിലർക്ക് ദിവസങ്ങൾക്കുള്ളിൽ തന്നെ സ്‌ക്രീൻ തകരാർ നേരിടേണ്ടിവന്നു. പ്രശ്നം പരിഹരിക്കാൻ ആപ്പിൾ നടപടിയെടുത്തതായാണ് റിപ്പോർട്ട്.ഐഫോൺ ഡുവോയുടെ സ്‌ക്രീനിൽ എന്താണ് സംഭവിക്കുന്നത്?വാരാന്ത്യത്തിൽ സാമൂഹിക മാധ്യമങ്ങളിലൂടെ ഐഫോൺ ഡുവോയുടെ അകത്തെ സ്‌ക്രീൻ പൊട്ടിയതിന്റെ ചിത്രങ്ങളും പരാതികളും വ്യാപകമായി പ്രചരിച്ചു. ഫോൺ മടക്കുന്ന ഭാഗമായ മധ്യഭാഗത്തെ ഹിഞ്ചിനോട് ചേർന്നാണ് കൂടുതലായും വിള്ളലുകളും വരകളും പ്രത്യക്ഷപ്പെടുന്നത്. ഫോൺ ആദ്യമായി തുറന്ന് ഉപയോഗിച്ച് അധികം വൈകാതെ തന്നെ സ്‌ക്രീനിന് കേടുപാടുകൾ സംഭവിച്ചതായി ചില ഉപഭോക്താക്കൾ പരാതിപ്പെട്ടു.തിങ്കളാഴ്ച പ്രശ്നം ഔദ്യോഗികമായി സ്ഥിരീകരിച്ച ആപ്പിൾ, ഐഫോൺ ഡുവോയുടെ ചെറിയൊരു വിഭാഗം ഫോണുകളെയാണ് തകരാർ ബാധിച്ചതെന്ന് വ്യക്തമാക്കി. ഫോണിന്റെ നിർമാണത്തിലെ സങ്കീർണത കാരണം നേരത്തേ തന്നെ വിതരണത്തിൽ കുറവുണ്ടാകാമെന്ന് നിരീക്ഷകർ മുന്നറിയിപ്പ് നൽകിയിരുന്നു. പുതിയ സ്‌ക്രീൻ പ്രശ്നം കമ്പനിക്ക് മറ്റൊരു വെല്ലുവിളിയായിരിക്കുകയാണ്.സ്‌ക്രീൻ പൊട്ടാൻ കാരണം എന്ത്?ഡിസ്‌പ്ലേ തകരാറിന്റെ കൃത്യമായ കാരണം ആപ്പിൾ ഇതുവരെ വ്യക്തമാക്കിയിട്ടില്ല. എന്നാൽ, ഉപകരണങ്ങൾ അഴിച്ചുപരിശോധിക്കുന്നതിൽ ശ്രദ്ധേയമായ സ്ഥാപനമായ ഐഫിക്സിറ്റിന്റെ വിശകലനം ചില സൂചനകൾ നൽകുന്നുണ്ട്. ഫോണിന്റെ അകത്തെ ഘടനയുടെ ദൃശ്യങ്ങൾ, പേറ്റന്റുകൾ, സി.ടി. സ്കാനുകൾ എന്നിവ പരിശോധിച്ച ഐഫിക്സിറ്റ്, ഐഫോൺ ഡുവോയുടെ ഹിഞ്ചിന്റെ ത്രീഡി മോഡൽ തയ്യാറാക്കി. ഡിസ്‌പ്ലേ കേബിളിന് തൊട്ടുതാഴെയും ഹിഞ്ചിനുള്ളിലെ മധ്യഭാഗത്തെ പിന്തുണാ ബാറിന് സമീപവുമാണ് കേടുപാടുകൾ കൂടുതലായി കാണപ്പെടുന്നതെന്ന് പരിശോധനയിൽ കണ്ടെത്തി.ഫോൺ മടക്കുമ്പോൾ ഈ പിന്തുണാ ബാർ ഡിസ്‌പ്ലേയിൽ സമ്മർദം ചെലുത്താത്ത വിധത്തിൽ മാറണം. എന്നാൽ, അത് കൃത്യമായി പ്രവർത്തിച്ചില്ലെങ്കിൽ സ്‌ക്രീനിൽ അധിക സമ്മർദമുണ്ടാകുകയും ആന്തരികമായി വിള്ളലുകൾ രൂപപ്പെടുകയും ചെയ്യാമെന്നാണ് വിലയിരുത്തൽ. അതേസമയം, ഇത്രയും സങ്കീർണമായ ഘടനയുള്ള ഫോണാണെങ്കിലും താൻ ഇതുവരെ പരിശോധിച്ച മടക്കാവുന്ന ഫോണുകളിൽ അറ്റകുറ്റപ്പണി നടത്താൻ ഏറ്റവും എളുപ്പമുള്ളത് ഐഫോൺ ഡുവോയാണെന്ന് ഐഫിക്സിറ്റ് വിലയിരുത്തിയിട്ടുണ്ട്.തകരാറുള്ള ഫോൺ എങ്ങനെ മാറ്റിവാങ്ങാം?ഐഫോൺ ഡുവോയുടെ അകത്തെ ഡിസ്‌പ്ലേയിൽ വിള്ളലുകളോ മറ്റ് തകരാറുകളോ ശ്രദ്ധയിൽപ്പെട്ടാൽ ആപ്പിൾകെയറുമായി ബന്ധപ്പെടാനാണ് കമ്പനി നിർദേശിച്ചിരിക്കുന്നത്. തകരാർ ബാധിച്ച ഫോണുകൾക്ക് പകരം മറ്റൊരു ഫോൺ നൽകുമെന്ന് ആപ്പിൾ അറിയിച്ചു. ഈ പ്രത്യേക നിർമാണ തകരാറിന് പകരം ഫോൺ ലഭിക്കാൻ ആപ്പിൾകെയർ പ്ലസ് സബ്സ്ക്രിപ്ഷൻ നിർബന്ധമല്ലെന്നും റിപ്പോർട്ടിൽ പറയുന്നു. മൊബൈൽ സേവനദാതാക്കൾ വഴി ഫോൺ വാങ്ങിയവർക്കും സേവനദാതാവിനെ സമീപിക്കുന്നതിന് പകരം നേരിട്ട് ആപ്പിൾകെയറുമായി ബന്ധപ്പെടാം.