ഇറാനിലെ യുഎസ് വ്യോമാക്രമണം; 'നയതന്ത്ര ചർച്ചകൾക്കുള്ള വാതിൽ തുറന്നിരിക്കുകയാണെന്ന് ട്രംപ്, സൈനിക നടപടി പെട്ടന്നില്ല

ടെഹ്റാൻ: ഹോർമുസ് കടലിടുക്കിന് സമീപമുള്ള ഇറാന്‍റെ ഖെഷ്ം ദ്വീപിലും സമീപ പ്രദേശത്തും ശക്തമായ സ്ഫോടനങ്ങൾ നടന്നതായി റിപ്പോർട്ട്. യുഎസ് വ്യോമാക്രമണം നടത്തുകയും ഇറാന്‍റെ വ്യോമ പ്രതിരോധ സംവിധാനം തിരിച്ചടിക്കുകയും ചെയ്തതിനെ തുടർന്നാണ് സംഘർഷം രൂക്ഷമായത്. ഇറാനെതിരെ പെട്ടെന്ന് സൈനിക നടപടി സ്വീകരിക്കാൻ തിടുക്കമില്ലെന്നും അതേസമയം നയതന്ത്ര ചർച്ചകൾക്കുള്ള വാതിലുകൾ തുറന്നിട്ടിട്ടുണ്ടെന്നും യുഎസ് പ്രസിഡന്‍റ് ഡൊണാൾഡ് ട്രംപ് വ്യക്തമാക്കി. അമേരിക്ക ഏർപ്പെടുത്തിയ സാമ്പത്തിക ഉപരോധങ്ങൾ ഇറാന്റെ സമ്പദ്‌വ്യവസ്ഥയെയും സാമ്പത്തിക ശേഷിയെയും സാരമായി ബാധിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.ഇറാൻ വിഷയത്തിൽ യുഎസിലെ ഉന്നതർക്കിടയിൽ വ്യത്യസ്ത അഭിപ്രായങ്ങളാണ് നിലനിൽക്കുന്നത്. ഉപരാഷ്ട്രപതി ജെ.ഡി വാൻസ്, വൈറ്റ് ഹൗസ് പ്രതിനിധി സ്റ്റീവ് വിറ്റ്കോഫ് എന്നിവർ നയതന്ത്ര ചർച്ചകളെ പിന്തുണയ്ക്കുമ്പോൾ, ഡെപ്യൂട്ടി പ്രതിരോധ സെക്രട്ടറി പീറ്റ് ഹെഗ്സെത്ത്, ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹു എന്നിവർ കടുത്ത സൈനിക നടപടിയെയാണ് അനുകൂലിക്കുന്നത്. സാമ്പത്തിക ഉപരോധം ശക്തിപ്പെടുത്താനാണ് വിദേശകാര്യ സെക്രട്ടറി മാർക്കോ റൂബിയോ അടക്കമുള്ളവരുടെ നിർദ്ദേശം.സംഘർഷം ലഘൂകരിച്ച് യുഎസ്-ഇറാൻ ചർച്ചകൾ പുനരാരംഭിക്കുന്നതിനായി ഖത്തർ സജീവമായി രംഗത്തുണ്ട്. ഇതിനായി മൂന്ന് ദിവസത്തെ ആശ്വാസ നടപടികൾ ഉൾപ്പെടുത്തിയുള്ള നിർദ്ദേശം ഖത്തർ ഇരുരാജ്യങ്ങൾക്കും മുന്നിൽ വെച്ചിട്ടുണ്ട്. ചർച്ചകൾ പുനരാരംഭിക്കാൻ ചൈനയും റഷ്യയും പ്രോത്സാഹിപ്പിക്കുന്നുണ്ട്. ഇറാന്‍റെ സമ്പുഷ്ടീകരിച്ച യുറേനിയം ശേഖരം ഏറ്റെടുക്കാൻ തയ്യാറാണെന്ന് റഷ്യൻ പ്രസിഡന്റ് വ്ലാഡിമിർ പുടിൻ വ്യക്തമാക്കിയിട്ടുണ്ട്. നയതന്ത്ര ചർച്ചകൾ പുരോഗമിക്കുന്ന പശ്ചാത്തലത്തിൽ, വിപണിയിലെ ആശങ്കകൾ കുറയുകയും അന്താരാഷ്ട്ര വിപണിയിൽ അസംസ്കൃത എണ്ണവിലയിൽ ബാരലിന് ഏകദേശം 10 ഡോളറിന്‍റെ കുറവ് രേഖപ്പെടുത്തുകയും ചെയ്തു.