വിപണി പിടിക്കാൻ ടാറ്റയുടെ രഹസ്യ ആയുധം; വരുന്നു പുതിയ ഇവി

ഇലക്ട്രിക് വാഹന വിപണിയിൽ കൂടുതൽ കരുത്താർജിക്കാൻ പുതിയ മോഡലുമായി ടാറ്റ മോട്ടോഴ്‌സ്. ടാറ്റ കുനോ എന്ന കോഡ് നാമത്തിൽ വികസിപ്പിക്കുന്ന കോംപാക്ട് ഇലക്ട്രിക് എസ്‌യുവി ഉടൻ വിപണിയിലെത്തിക്കാനാണ് കമ്പനിയുടെ നീക്കം. എംജി വിൻഡ്‌സർ ഇവിക്ക് നേരിട്ടുള്ള എതിരാളിയായാണ് പുതിയ വാഹനം എത്തുക. 2027 അല്ലെങ്കിൽ 2028ൽ വാഹനം വിപണിയിലെത്തുമെന്നാണ് പ്രതീക്ഷിക്കുന്നത്. എന്നാൽ ലോഞ്ച് തീയതി സംബന്ധിച്ച് കമ്പനി ഔദ്യോഗിക പ്രഖ്യാപനം നടത്തിയിട്ടില്ല. നിലവിൽ ടിയാഗോ ഇവി, പഞ്ച് ഇവി, നെക്‌സോൺ ഇവി, ഹാരിയർ ഇവി, സിയറ ഇവി തുടങ്ങിയ മോഡലുകളിലൂടെ ഇലക്ട്രിക് വാഹന വിപണിയിൽ ശക്തമായ സാന്നിധ്യമാണ് ടാറ്റയ്ക്കുള്ളത്. ഈ നിരയിലേക്ക് പുതിയ കോംപാക്ട് എസ്‌യുവി കൂടി എത്തുന്നതോടെ വിപണിയിലെ സാന്നിധ്യം കൂടുതൽ ശക്തമാക്കുകയാണ് ലക്ഷ്യം.ഉൽപ്പാദനത്തിന് തയ്യാറാകുന്ന പതിപ്പിന് കുനോ എന്ന കോഡ് നാമത്തിന് പകരം പുതിയ പേര് നൽകുമെന്നാണ് റിപ്പോർട്ടുകൾ. ടാറ്റയുടെ നിലവിലെ മോഡൽ നിരയിൽ നെക്‌സോൺ ഇവിക്കും സിയറ ഇവിക്കും ഇടയിലായിരിക്കും പുതിയ വാഹനത്തിന്റെ സ്ഥാനം. ഗുജറാത്തിലെ സാനന്ദ് പ്ലാന്റിലായിരിക്കും ഉൽപ്പാദനം.ആക്റ്റി.ഇവി പ്ലാറ്റ്‌ഫോമിൽ പുതിയ എസ്‌യുവിടാറ്റയുടെ ആക്റ്റി.ഇവി ആർക്കിടെക്ചറിനെ അടിസ്ഥാനമാക്കിയായിരിക്കും കുനോ ഇലക്ട്രിക് എസ്‌യുവി നിർമിക്കുക. ക്യാബിനുള്ളിലെ സ്ഥലം പരമാവധി പ്രയോജനപ്പെടുത്തുന്നതിനും ഊർജക്ഷമത വർധിപ്പിക്കുന്നതിനും സഹായിക്കുന്ന പ്ലാറ്റ്‌ഫോമാണിതെന്നാണ് കമ്പനിയുടെ അവകാശവാദം.ആന്തരിക ജ്വലന എൻജിൻ വാഹനങ്ങൾക്കും ഇലക്ട്രിക് വാഹനങ്ങൾക്കും അനുയോജ്യമായ രീതിയിലാണ് ഈ ആർക്കിടെക്ചർ വികസിപ്പിച്ചിരിക്കുന്നത്. വ്യത്യസ്ത ബാറ്ററി പാക്കുകൾ, വാഹന വലുപ്പങ്ങൾ, ഡ്രൈവ് സംവിധാനങ്ങൾ, ചാർജിങ് സൗകര്യങ്ങൾ എന്നിവ ഉൾപ്പെടുത്താൻ ഇതിലൂടെ സാധിക്കും. ഈ പ്ലാറ്റ്‌ഫോമിൽ നിർമിക്കുന്ന ഇലക്ട്രിക് വാഹനങ്ങൾക്ക് ഒറ്റ ചാർജിൽ 600 കിലോമീറ്റർ വരെ സഞ്ചരിക്കാനാകുമെന്നാണ് ടാറ്റയുടെ അവകാശവാദം. 11 കിലോവാട്ട് എസി ചാർജിങ്ങും 150 കിലോവാട്ട് വരെ ശേഷിയുള്ള ഡിസി ഫാസ്റ്റ് ചാർജിങ്ങും പിന്തുണയ്ക്കും. ഫ്രണ്ട് വീൽ ഡ്രൈവ്, റിയർ വീൽ ഡ്രൈവ്, ഓൾ വീൽ ഡ്രൈവ് സംവിധാനങ്ങളും പ്ലാറ്റ്‌ഫോമിൽ ഉൾപ്പെടുത്താനാകും.കർവ്വ് ഇവിയുടെ പവർട്രെയിൻ ലഭിക്കുമോ?പുതിയ റിപ്പോർട്ടുകൾ പ്രകാരം ടാറ്റ കുനോയ്ക്ക് കർവ്വ് ഇവിയുടെയോ സിയറ ഇവിയുടെയോ പവർട്രെയിൻ ലഭിക്കാൻ സാധ്യതയുണ്ട്. നിലവിൽ 55 കിലോവാട്ട് അവർ ബാറ്ററി പാക്കോടെയാണ് കർവ്വ് ഇവി വിപണിയിലുള്ളത്. മുൻ ആക്‌സിലിൽ ഘടിപ്പിച്ച ഇലക്ട്രിക് മോട്ടോറാണ് വാഹനത്തിലുള്ളത്. ഒറ്റ ചാർജിൽ 502 കിലോമീറ്റർ റേഞ്ചാണ് കമ്പനി അവകാശപ്പെടുന്നത്. അതേസമയം, ടാറ്റ സിയറ ഇവിയിൽ 65 കിലോവാട്ട് അവർ റിയർ വീൽ ഡ്രൈവ്, 75 കിലോവാട്ട് അവർ റിയർ വീൽ ഡ്രൈവ്, 75 കിലോവാട്ട് അവർ ഡ്യുവൽ മോട്ടോർ ഓൾ വീൽ ഡ്രൈവ് എന്നിങ്ങനെ വ്യത്യസ്ത പവർട്രെയിൻ ഓപ്ഷനുകളുണ്ട്. 665 കിലോമീറ്റർ വരെയാണ് കമ്പനി അവകാശപ്പെടുന്ന റേഞ്ച്.ടാറ്റ കുനോയുടെ വില എത്രയായിരിക്കും?ടാറ്റ കുനോയുടെ വില കർവ്വ് ഇവിയുടെയും സിയറ ഇവിയുടെയും വിലനിലവാരവുമായി സാമ്യമുള്ളതായിരിക്കുമെന്നാണ് പ്രതീക്ഷ. നിലവിൽ കർവ്വ് ഇവിയുടെ എക്‌സ് ഷോറൂം വില 17.19 ലക്ഷം രൂപ മുതൽ 19.39 ലക്ഷം രൂപ വരെയാണ്. സിയറ ഇവിക്ക് 18.79 ലക്ഷം രൂപ മുതൽ 25.99 ലക്ഷം രൂപ വരെയും വിലയുണ്ട്.പ്രധാന എതിരാളിയായ എംജി വിൻഡ്‌സർ ഇവിയുടെ വില 14.85 ലക്ഷം രൂപ മുതൽ 19.15 ലക്ഷം രൂപ വരെയാണ്. ഈ വിലനിലവാരം പരിഗണിക്കുമ്പോൾ ടാറ്റ കുനോയുടെ വിലയും സമാനമായ വിഭാഗത്തിലായിരിക്കുമെന്നാണ് സൂചന. എന്നാൽ ബാറ്ററി ശേഷി, പവർട്രെയിൻ, വേരിയന്റുകൾ, അന്തിമ വില എന്നിവ സംബന്ധിച്ച ഔദ്യോഗിക വിവരങ്ങൾ ടാറ്റ പുറത്തുവിട്ടിട്ടില്ല. 2027-2028 കാലയളവിൽ വിപണിയിലെത്തുമെന്ന് പ്രതീക്ഷിക്കുന്ന പുതിയ ഇലക്ട്രിക് എസ്‌യുവിയുടെ കൂടുതൽ വിവരങ്ങൾക്കായി കാത്തിരിക്കുകയാണ് വാഹനപ്രേമികൾ.