മുംബൈ വിമാനത്താവളത്തിൽ അപ്രതീക്ഷിത അപകടം! ടെർമിനൽ രണ്ടിന് പുറത്തുള്ള ഫാൾസ് സീലിങ് അടർന്നുവീണ് സന്ദർശകന് പരിക്ക്

മുംബൈ: മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തിലെ ടെർമിനൽ 2-ന് പുറത്തുള്ള ഫോൾസ് സീലിംഗിന്റെ ഒരു ഭാഗം തകർന്നു വീണ് ഒരാൾക്ക് പരിക്കേറ്റു. ഞായറാഴ്ചയാണ് അപകടമുണ്ടായത്. വിമാനത്താവളം സന്ദർശിക്കാനെത്തിയ ആൾക്കാണ് പരിക്കേറ്റത്. പരിക്ക് സാരമുള്ളതല്ലെന്നാണ് വിവരം.അപകടം നടന്ന ഉടൻ തന്നെ വിമാനത്താവളത്തിലെ എമർജൻസി മെഡിക്കൽ ടീം സ്ഥലത്തെത്തി. പരിക്കേറ്റയാൾക്ക് ആവശ്യമായ പ്രഥമശുശ്രൂഷയും പരിചരണവും നൽകി. അപകടത്തിന്റെ യഥാർത്ഥ കാരണം കണ്ടെത്താൻ വിശദമായ അന്വേഷണം ആരംഭിച്ചതായി മുംബൈ വിമാനത്താവള വക്താവ് ഔദ്യോഗിക പ്രസ്താവനയിലൂടെ അറിയിച്ചു. രാജ്യത്തെ വിമാനത്താവളങ്ങളുടെ അടിസ്ഥാന സൗകര്യങ്ങളെക്കുറിച്ചും സുരക്ഷയെക്കുറിച്ചും വീണ്ടും ആശങ്ക ഉയർത്തുന്നതാണ് ഈ സംഭവം. 2024 ജൂൺ 28-ന് ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളത്തിലെ ടെർമിനൽ 1-ന്റെ മേൽക്കൂര പെയ്ത കനത്ത മഴയിൽ തകർന്നു വീണ് ഒരാൾ മരിക്കുകയും ഒമ്പത് പേർക്ക് പരിക്കേൽക്കുകയും ചെയ്തിരുന്നു.ഐഐടി ഡൽഹി, ഐഐടി ജമ്മു എന്നിവിടങ്ങളിൽ നിന്നുള്ള സ്ട്രക്ചറൽ എൻജിനീയർമാർ ഉൾപ്പെട്ട വിദഗ്ധ സമിതി ഡൽഹിയിലെ അപകടത്തെക്കുറിച്ച് അന്വേഷണം നടത്തിയിരുന്നു. നിർമ്മാണത്തിലെ അപാകതകളും കൃത്യമായ അറ്റകുറ്റപ്പണികളുടെ അഭാവവും മഴവെള്ളം കെട്ടിക്കിടക്കാൻ കാരണമായ ഡിസൈനിലെ പിഴവുകളുമാണ് അപകടത്തിന് കാരണമായതെന്ന് സമിതി കണ്ടെത്തിയിരുന്നു. നിലവിൽ മുംബൈ ടി2 ലെ ഈ അപകടത്തിന്റെ പശ്ചാത്തലത്തിലും സുരക്ഷാ പരിശോധനകൾ ശക്തമാക്കിയിട്ടുണ്ട്.