குடியாத்தம்: திருமணம் மீறிய உறவில் திடீர் விரிசல்; காதலன் அடித்துக் கொலை; 4 பெண்களிடம் விசாரணை

வேலூர் மாவட்டம், குடியாத்தம் கொண்டசமுத்திரம் அம்பேத்கர் நகரைச் சேர்ந்தவர் கதிரவன் (வயது 40). திருமணமாகாதவர். அம்பேத்கர் நகருக்கு அருகிலுள்ள அருணாச்சல நகர் பகுதியில் வசிக்கும் 35 வயதான வேறொருவரின் மனைவியுடன் கதிரவனுக்கு திருமணம் மீறிய தகாத தொடர்பு ஏற்பட்டுள்ளது. அந்தப் பெண்ணும் கணவனை பிரிந்து தனியாக வசித்து வந்ததால், கதிரவன் அவரின் வீட்டுக்கே சென்று வருவதை வழக்கமாக்கிக் கொண்டுள்ளார். இந்த நிலையில், கடந்த சில நாள்களாக இருவருக்கும் கருத்து - வேறுபாடு நிலவியதால், அப்பெண்ணுடன் பேசுவதையும், பழகுவதையும் துண்டித்துள்ளார் கதிரவன். இதனால், ஆத்திரமடைந்த அப்பெண் நேற்று இரவு தனது அக்கா மற்றும் அக்காவின் மகள்கள் இருவரையும் அழைத்துக் கொண்டு கதிரவனின் வீட்டுக்குச் சென்றுள்ளார். கொலைச் செய்யப்பட்ட கதிரவன்அங்கு இருவருக்கும் கடும் வாக்குவாதம் ஏற்பட்ட நிலையில், அப்பெண்ணும் அவருடன் வந்திருந்த உறவுக்கார பெண்களும் சேர்ந்து கதிரவனை சரமாரியாக தாக்கி கீழே தள்ளியுள்ளனர். இதில், மயக்கமடைந்த கதிரவனை அங்கிருந்தவர்கள் மீட்டு குடியாத்தம் அரசு மருத்துவமனைக்குக் கொண்டு சென்றனர். அங்கு அவரை பரிசோதித்த மருத்துவர்கள், அவர் இறந்துவிட்டதை உறுதிப்படுத்தினர். இதையடுத்து, பிரேத பரிசோதனைக்காக அவரின் உடல் பிணவறைக்கு அனுப்பி வைக்கப்பட்டது. இதுதொடர்பாக குடியாத்தம் நகரக் காவல் நிலையப் போலீஸார் வழக்குப் பதிவு செய்து, 4 பெண்களையும் பிடித்து விசாரணை மேற்கொண்டு வருகின்றனர். இந்தச் சம்பவம், அப்பகுதியில் பெரும் பரபரப்பை ஏற்படுத்தியுள்ளது.