"என் அனுமதி இல்லாமல் என் கதையை எப்படி எடுப்பார்கள்!" - வழக்கு தொடர்ந்த இயக்குநர் கோபி நயினார்

இயக்குநர் கோபி நயினார், ஜெய், ஐஸ்வர்யா ராஜேஷை வைத்து 'கருப்பர் நகரம்' படத்தை இயக்கி வந்தார். இந்தத் திரைப்படம் நீண்ட நாட்களாகத் தயாரிப்பில் இருக்கிறது. இந்தப் படத்தின் படப்பிடிப்புத் தடைப்பட்டுத் தடைப்பட்டு நடந்தது. திடீரென்று இப்படத்தின் தயாரிப்பாளர் ரமேஷ், கோபி நயினாரிடம் அனுமதி பெறாமல் படப்பிடிப்பை நடத்தியிருக்கிறார். அதுமட்டுமன்றி, திரைக்கதையாசிரியராகவும் இயக்குநராகவும் வேறொருவரைக் குறிப்பிட்டிருக்கிறார் தயாரிப்பாளர். இதனைத் தொடர்ந்து இயக்குநர் கோபி நயினார், தன்னுடைய அனுமதி இல்லாமல் படப்பிடிப்பை நடத்தி வருவதாகத் தெரிவித்துச் சென்னை உயர்நீதிமன்றத்தில் வழக்குத் தொடர்ந்தார். வழக்கை விசாரித்த நீதிமன்றம், அக்டோபர் 27-ம் தேதிக்குள் தயாரிப்பாளர்கள் பதில் மனுத் தாக்கல் செய்ய வேண்டும் எனக் கூறிப் படத்தை வெளியிடவும் தடை விதித்திருக்கிறது. இது தொடர்பாக இயக்குநர் கோபி நயினாரிடம் பேசினோம்.நம்மிடையே பேசியவர், "'கருப்பர் நகரம்' திரைப்படத்தை முதலில் கங்காதரன் என்பவர் தயாரித்தார். ஆனால், அவர் விலகிய பிறகு ஆர்.ஆர் ஃபிலிம்ஸ் ரமேஷ் என்பவர் படத்தைத் தயாரிப்பதாக வந்தார். ரமேஷ் வருவதற்கு முன்பு தயாரிப்பாளர்கள் தரப்பில் கிட்டத்தட்ட ₹3 கோடிக்கும் மேல் செலவு செய்யப்பட்டது. தயாரிப்பாளர் ரமேஷ் இப்படத்தைக் கையில் எடுத்த பிறகு, தேவையானதையும் அவர் செய்துகொடுக்கவில்லை. இப்படம் ஒரு கால்பந்தாட்ட வீரரின் கதை என்பதால் படப்பிடிப்பிற்குத் தேவையான அத்தியாவசியப் பொருட்களைத் தயாரிப்புத் தரப்பு செய்து தரவில்லை.இந்தப் படத்திற்காகத் தயாரிப்பாளர் ரமேஷ் ஃபைனான்ஸ் பெற்ற பிறகும், இப்படத்தின் படப்பிடிப்பை நடத்தாமல் அந்தப் பணத்தை வைத்து வேறு படங்களை எடுக்கத் தொடங்கினர். 'கருப்பர் நகரம்' படப்பிடிப்புத் தடைப்பட்டது. நீண்ட நாட்களாகப் படப்பிடிப்பைத் தொடர்வதற்கு நானும் காத்திருந்தேன். பிறகு நான் 'காலனி' என்ற வேறு ஒரு படத்தை இயக்கக் கமிட்டானேன். ஆனால், 'கருப்பர் நகரம்' படத்தை முடிக்காமல் வேறு படம் இயக்கக் கூடாது எனத் தயாரிப்பாளர் சங்கத்தின் மூலம் 'காலனி' படப்பிடிப்பிற்கு என்னை முடக்கவும் முயன்றனர். பிறகு பேச்சுவார்த்தை நடத்தி 'காலனி' படப்பிடிப்பிற்குக் கிளம்பினேன். இயக்குநர் கோபி நயினார்பிறகு எனக்குத் தெரியாமல், என்னிடமிருந்து எந்தவித என்.ஓ.சி சான்றிதழும் பெறாமலும் தயாரிப்பாளர் ரமேஷ் வேறு நபர்களை வைத்துப் படப்பிடிப்பை நடத்தினார். இதுமட்டுமல்ல, படத்தின் போஸ்டரில் என்னுடைய பெயரைக் கதையாசிரியர் எனப் போட்டிருக்கிறார்கள். என்னுடைய அனுமதி இல்லாமல் திரைக்கதையாசிரியர், இயக்குநர் என வேறு நபர்களின் பெயர்களைப் போட்டிருக்கிறார்கள். என்னுடைய அனுமதி இல்லாமல், என்னுடைய கதையை அவர்கள் எப்படி எடுப்பார்கள்? இதை நான் எப்படி கேள்வி கேட்காமல் இருப்பது?" எனக் காட்டமானார்.