ہندوستان کو سیریز بچانے کے لیے آج کامیابی ضروری

برسٹل، 8 جولائی (آئی اے این ایس) پانچ ٹی20 میچوں کی سیریز میں بارش کی نذر ہونے والے پہلے میچ کے بعد ہندوستان0۔2 سے پیچھے ہے اور اب جمعرات کو کھیلے جانے والے چوتھے ٹی20 میچ میں اس کے پاس غلطی کی کوئی گنجائش نہیں ہے۔ اگر شریاس ایئرکی قیادت میں ہندوستانی ٹیم یہ میچ بھی گنوا دے تو انگلینڈ سیریز اپنے نام کر لے گا۔سیریز کے دوران ہندوستان کی سب سے بڑی کمزوری بیٹنگ رہی ہے۔ انگلینڈ کے فاسٹ بولروں نے نئی گیند سے مسلسل ہندوستانی بیٹرس کو مشکلات میں ڈالا، جس کے باعث ٹیم کو مضبوط آغاز نہیں مل سکا۔ مڈل آرڈر بھی خاطر خواہ کارکردگی دکھانے میں ناکام رہا، جبکہ اہم مواقع پر وکٹیں جلدی جلدی گرنے سے ہندوستان کسی بھی میچ میں بڑی شراکت قائم نہیں کر سکا۔چوتھے میچ سے قبل سب سے بڑا سوال سنجو سیمسن کی واپسی کا ہے۔ پہلے میچ کے بعد انہیں باہر بٹھا دیاگیا تھا اور ان کی جگہ نوجوان ویبھو سوریا ونشی کو موقع دیا گیا۔ اب ٹیم انتظامیہ کو فیصلہ کرنا ہوگا کہ نوجوان کھلاڑی پر اعتماد برقرار رکھا جائے یا تجربہ کار سیمسن کو دوبارہ موقع دیا جائے۔ہندوستانی بولنگ بھی سیریز میں زیادہ مؤثر ثابت نہیں ہوئی۔ فاسٹ بولرز وقفے وقفے سے اچھی بولنگ کرتے رہے، لیکن مستقل دباؤ برقرار نہ رکھ سکے، جبکہ اسپنرز بھی درمیانی اوورز میں وکٹیں لینے میں ناکام رہے، جس کا انگلینڈ نے بھرپور فائدہ اٹھایا۔دوسری جانب انگلینڈ مکمل اعتماد کے ساتھ میدان میں اترے گا اور سیریز پر اس کی نظریں ہوںگی۔