9 اگسٹ کو دہلی میں طلباء کی بڑی ریلی ‘ راہول گاندھی خطاب کرینگے

نئی دہلی، 20 جولائی (یو این آئی) لوک سبھا میں قائد اپوزیشن راہول گاندھی نیٹ ، جے ای ای سمیت مختلف مسابقتی امتحانات میں مبینہ پیپر لیک کے خلاف آئندہ 9 اگست کو کانگریس کی چھاتروں کی گونج تحریک سے خطاب کریں گے۔اس سے پہلے 22 جولائی کو دہلی میں کانگریس کے سینئر لیڈر اور رکنِ پارلیمنٹ گورو گوگوئی، رکنِ پارلیمنٹ عمران مسعود اور رکنِ پارلیمنٹ پرینتی شندے طلبہ کی تحریک میں شامل ہوں گے۔ دہلی پردیش کانگریس صدر دیویندر یادو نے پریس کانفرنس میں کہا کہ گزشتہ 10 سالوں میں تقریباً 90 پیپر لیک کے واقعات سے تقریباً 7.5 کروڑ نوجوانوں کا مستقبل متاثر ہوا ہے۔ مرکزی حکومت پر طلبہ کے مستقبل سے کھلواڑ کرنے کا الزام لگاتے ہوئے انہوں نے کہا کہ لگاتار تیسرے سال نیٹ امتحان سے متعلق تنازعات سامنے آئے ہیں اور اس کیلئے مرکزی وزیرِ تعلیم دھرمیندر پردھان کو اخلاقی ذمہ داری لیتے ہوئے استعفیٰ دینا چاہیے۔ یادو نے کہا کہ راہول گاندھی نے 17 جون کو کوٹا سے چھاتروں کی گونج مہم کا آغاز کیا تھا، جو اب ملک گیر تحریک کی شکل اختیار کر چکا ہے۔ راہول نے حال ہی میں دہرادون میں پیپر لیک سے متاثرہ طالبہ ریا کے لواحقین سے ملاقات کر کے ان کی آواز پارلیمنٹ تک اٹھانے کا تیقن دیا ۔ انہوں نے این ٹی اے کے طریقہ کار کی آزادانہ جانچ ، پیپر لیک خاطیوں کے خلاف سخت کارروائی ، امتحانی نظام میں وسیع اصلاحات اور ایسے معاملات کی سماعت کیلئے خصوصی عدالتوں کی تشکیل کا مطالبہ کیا۔