نیٹ پرچہ لیک معاملے پر سنگا ریڈی میں کانگریس کادوسرے دن بھی احتجاج ، جگا ریڈی کی بائیک ریالی

سنگاریڈی۔ 22 جولائی (سیاست ڈسٹرکٹ نیوز) ٹی پی سی سی کانگریس ورکنگ صدر جگّا ریڈی نے ضلع کانگریس صدر و چیئرپرسن ٹی جی آئی آئی سی نرملا جگّا ریڈی کے ہمراہ کانگریس کارکنوں کے ساتھ بائیک ریلی نکال کر مرکزی حکومت کے خلاف احتجاج کیا۔ نیٹ (NEET) پرچہ لیک معاملے پر جاری احتجاج دوسرے روز بھی جاری رہا اسکول اور کالجس بطور احتجاج بند منایا گیا ۔بعد ازاں میڈیا سے گفتگو کرتے ہوئے جگّا ریڈی نے بی جے پی کے ریاستی صدر رام چندر راؤ کو سخت تنقید کا نشانہ بنایا۔ انہوں نے کہا کہ اگر راہل گاندھی نیٹ پرچہ لیک معاملے پر وزیرِ اعظم نریندر مودی کی رہائش گاہ کے سامنے دھرنا دیتے ہیں تو اس میں کوئی برائی نہیں۔ انہوں نے بی جے پی قیادت سے مطالبہ کیا کہ گاندھی بھون کا رخ کرنے کے بجائے وزیرِ اعظم سے نیٹ کے متاثرہ طلبہ کے لیے غیر مشروط معافی کا اعلان کروائیں۔جگّا ریڈی نے خبردار کیا کہ اگر بی جے پی گاندھی بھون کا محاصرہ کرنے کی کوشش کریں گے تو کانگریس بھی بی جے پی کے ریاستی دفتر کا گھیراؤ کرے گی۔ انہوں نے کہا کہ نیٹ پرچہ لیک کی اخلاقی ذمہ داری قبول کرتے ہوئے مرکزی وزیرِ تعلیم دھرمیندر پردھان کو مستعفی ہونا چاہیے، بصورتِ دیگر کانگریس مرکزی وزراء کے خلاف بھی احتجاج اور گھیراؤ کرے گی۔