مساجد سے لاؤڈ اسپیکر ہٹانے بنگال پولیس کا دباؤ

مسلم رہنماؤں کا دعویٰ‘چیف منسٹر کے ساتھ اس مسئلہ پر ٹی ایم سی قائدین کا آج اجلاس کولکاتہ ۔6؍اگست ( ایجنسیز )مغربی بنگال میں ایک بڑا تنازعہ اس وقت شروع ہوا جب کئی مسلم رہنماؤں نے دعویٰ کیا کہ ریاست بھر کی مساجد پر پولیس کی جانب سے اذان کیلئے استعمال ہونے والے لاؤڈ اسپیکرز کو ہٹانے کیلئے دباؤ ڈالا جا رہا ہے۔ متعدد مساجد کمیٹیوں نے الزام لگایا کہ انہیں لاؤڈ سپیکر ہٹانے کے حوالے سے مقامی تھانوں سے زبانی ہدایات موصول ہوئی ہیں۔ ریتابرت بنرجی کی قیادت میں ترنمول کانگریس نیجمعہ کو چیف منسٹر سویندو ادھیکاری کے ساتھ مسئلہ اٹھانے والا ہے۔ تین باغی ٹی ایم سی ممبران پارلیمنٹ سابق کرکٹر یوسف پٹھان، خلیل الرحمان اور ابو طاہر خان نے جمعرات کو مرکزی وزیر داخلہ امیت شاہ سے ملاقات کی اور اس معاملے پر ایک میمورنڈم پیش کیا۔ارکان پارلیمنٹ نے مذہبی آزادی کے تحفظ پر تشویش کا اظہار کیا اور مرکز پر زور دیا کہ وہ مذہبی جذبات کو ٹھیس پہنچائے بغیر صوتی آلودگی کے اصولوں پر عمل درآمد کو یقینی بنائے۔اپنی پہلی کابینہ کی میٹنگ میں، بی جے پی حکومت نے تمام مذہبی اداروں میں عدالت کے ذریعہ صوتی آلودگی کے قوانین کو لاگو کرنے کا فیصلہ کیا۔ان قوانین کے تحت، آواز کی اجازت کی حد دن میں 55 ڈیسیبل اور رات میں 45 ڈیسیبل ہے۔میڈیا کے مطابق، ریاستی پولیس سے کہا گیا کہ وہ ڈیسیبل کی حدود کی تعمیل کو یقینی بنائے اور کئی اماموں نے کہا کہ مساجد کمیٹیوں کو لاؤڈ اسپیکر کو ساؤنڈ بکس سے بدلنے کا مشورہ دیا گیا ہے۔بڑھتے ہوئے تنازعہ کے درمیان، وزیر اعلی سویندو ادھیکاری نے کارروائی کا دفاع کیا اور کہا کہ حکومت صرف عدالتی احکامات پر عمل کر رہی ہے۔انہوں نے کہا کہ مساجد اور مندروں سے آنے والی آواز کو ان کے متعلقہ احاطے میں رہنا چاہیے اور کمپاؤنڈ سے باہر نہیں جانا چاہیے اور اس کے مطابق پولیس کو ہدایت دی گئی تھی۔وزیر اعلیٰ نے کہا کہ پولیس کی ہدایت کے بعد مساجد اور مندروں سے کل 5,299 لاؤڈ اسپیکرز کو ہٹایاگیا ہے۔ ان میں سے تقریباً 4,203 کو مساجد سے اور 1,096 کو مندروں سے ہٹا دیا گیا۔انہوں نے مزید کہا کہ پولیس کو خاص طور پر ہدایت کی گئی تھی کہ وہ زبردستی سے کام نہ لیں اور دعویٰ کیا کہ مسجد کمیٹیوں نے انتظامیہ کے ساتھ تعاون کیا ہے۔باغی ترنمول ایم ایل اے اخرزمان نے کہا کہ تمام مذاہب کے لوگوں کو اپنے مذہب پر عمل کرنے کا آئینی حق حاصل ہے۔بنگال کے سابق وزیر اور ٹی ایم سی لیڈر صدیق اللہ چودھری نے انتباہ دیا کہ اگر اس مسئلہ پر توجہ نہیں دی گئی تو بڑے پیمانے پر احتجاج کیا جائے گا۔