پاناما میں زلزلے کے بعد ’بڑی آفت‘ کا اعلان

پاناما :11اکٹوبر ( یو این آئی ) 7.7 شدت کے زلزلے نے پناما کو ہلا کر رکھ دیا، جس کے نتیجے میں وسطی علاقے میں عمارتیں اور سڑکیں منہدم ہو گئیں، تاہم فوری طور پر جانی نقصان کی کوئی اطلاع موصول نہیں ہوئی۔صدر جوسی رائول مولینو نے جمعہ کے روز کے زلزلے کو “بڑی آفت” قرار دیا اور کہا کہ اس نے مرکزِ زلزلہ کے قریب سڑکیں تباہ کر دی ہیں۔ مولینو نے یہ واضح نہیں کیا کہ آیا جھٹکوں سے کسی کے زخمی یا ہلاک ہونے کی اطلاعات ہیں یا نہیں۔قومی سول پروٹیکشن سسٹم کے مطابق، کم گہرائی میں آنے والے ہولناک زلزلے کے جھٹکوں کو تقریباً 4.5 ملین آبادی والے وسطی امریکی ملک کے وسیع حصّے میں محسوس کیا گیا۔زلزلے کے مرکز سے تقریباً 200 کلومیٹر دور پناما سٹی میں خوف و ہراس کے مناظر دیکھے گئے، جہاں لوگ شہر کی فلک بوس عمارتوں سے باہر نکلنے کے لیے دوڑ پڑے۔46 سالہ سلمون اینڈیون نے اے ایف پی نیوز ایجنسی کو بتایا کہ “میں ڈرا ہوا تھا کیونکہ جھٹکے بہت شدید اور طویل تھے۔ بھاری چیزیں جیسے ڈریسنگ ٹیبل، بستر اور کچن کی تمام اشیاء￿ ہل رہی تھیں۔” انہوں نے کہا کہ انہوں نے اپنی 15 منزلہ عمارت کو بعد از جھٹکوں دوسری بار خالی کیا۔سوشل میڈیا پر خوب گردش کرنے والی ایک ویڈیو میں 20 سے زائد منزلہ ایک عمارت کی چھت پر واقع سوئمنگ پول سے پانی نیچے گر رہا تھا۔ایک اور ویڈیو میں پناما کینال پر ایک پْل کو زور سے ہلتے ہوئے دکھایا گیا مگر وہ کھڑا رہا اور اس پر گاڑیاں گزر رہی تھیں۔پینونومے کے ایک اسٹور میں کیشیئر 38 سالہ جوانا الویو نے اے ایف پی کو بتایا، “یہ انتہائی خوفناک تھا، ہم نے پہلے کبھی ایسا محسوس نہیں کیا۔ میری بیٹی اسکول میں پھنس گئی تھی۔”