امریکہ میں 35 ہزار سے زائد ورک پرمٹ درخواستیں مسترد

گرین کارڈ کے منتظر غیرملکی درخواست گزاروں کو بڑا جھٹکہ واشنگٹن:15 اکٹوبر (ایجنسیز) امریکہ میں مستقل رہائش یعنی گرین کارڈ حاصل کرنے کے منتظر غیر ملکی شہریوں کیلئے ملازمت کی اجازت حاصل کرنا مشکل ہوتا دکھائی دے رہا ہے۔ امریکی شہریت و امیگریشن خدمات (USCIS) کے اعداد و شمار کے مطابق اپریل سے جون 2026 کے دوران ورک پرمٹ کیلئے جمع کرائی گئی 35,767 درخواستیں مسترد کر دی گئیں۔ اس عرصے میں درخواستوں کو مسترد کیے جانے کی شرح تقریباً 44 فیصد رہی، جو گزشتہ دو سہ ماہیوں کے مقابلے میں نمایاں طور پر زیادہ ہے۔ امریکی مالی سال 2026 کی تیسری سہ ماہی کے دوران امیگریشن حکام کو مجموعی طور پر 153,039 درخواستیں موصول ہوئیں۔ یہ درخواستیں ایسے غیر ملکی شہریوں کی جانب سے جمع کرائی گئی تھیں جو گرین کارڈ کیلئے درخواست دینے کے بعد ملازمت کی اجازت حاصل کرنا چاہتے ہیں۔ ان میں سے 46,405 درخواستوں کو منظوری دی گئی، جبکہ 35,767 درخواستیں مسترد ہوئیں۔ باقی درخواستوں کے بارے میں ان اعداد و شمار میں حتمی فیصلہ ظاہر نہیں کیا گیا ہے۔اس سے قبل اکتوبر 2025 سے مارچ 2026 تک ابتدائی دو سہ ماہیوں میں ورک پرمٹ کی درخواستیں مسترد ہونے کی شرح تقریباً 25 فیصد تھی۔ تازہ اعداد و شمار اس بات کی نشاندہی کرتے ہیں کہ مستقل رہائش کی درخواستوں پر فیصلے کا انتظار کرنے والے غیر ملکی شہریوں کو ملازمت کی اجازت حاصل کرنے میں زیادہ مشکلات کا سامنا کرنا پڑ سکتا ہے۔امریکہ میں ملازمت کی اجازت کیلئے اہل غیر ملکی شہری فارم I-765 جمع کراتے ہیں۔ اس درخواست کے منظور ہونے پر انہیں ایمپلائمنٹ آتھرائزیشن ڈاکیومنٹ (EAD) جاری کیا جا سکتا ہے، جس کے ذریعے وہ امیگریشن قوانین اور اجازت نامے کی شرائط کے مطابق ملازمت کر سکتے ہیں۔ یہ سہولت ان افراد کیلئے اہم ہے جن کی گرین کارڈ درخواست زیر غور ہو اور جو قانونی طور پر کام جاری رکھنا چاہتے ہوں۔