طلبہ پر حملے کی ایف آئی آر درج نہیں کر رہی دہلی پولیس:راہول

نئی دہلی، 16 اکتوبر (یو این آئی) کانگریس کے سابق صدر اور لوک سبھا میں اپوزیشن لیڈر راہول گاندھی نے دہلی پولیس پر طلباء کے ساتھ مار پیٹ کرنے اور اس معاملے میں ایف آئی آر درج نہ کرنے کا الزام لگاتے ہوئے کہا ہے کہ ذمہ دار پولیس حکام کے خلاف قانونی کارروائی کی جائے گی۔ راہول گاندھی نے جمعہ کے روز سوشل میڈیا پلیٹ فارم ‘ایکس’ پر کہا کہ کیرالا کی اتھیرا اور راجستھان کی ریتو سمیت کئی نوجوانوں کے ساتھ دہلی پولیس نے مار پیٹ کی ہے ۔ انہوں نے بتایا کہ اس معاملے میں انہوں نے کیرالا کے وزیرِ داخلہ رمیش چنیتھلا اور راجستھان پردیش کانگریس کے صدر گووند سنگھ ڈوٹاسرا سے بات کی ہے ۔ اس سلسلے میں کیرالا میں ‘زیرو ایف آئی آر’ درج ہو چکی ہے ۔ انہوں نے کہا کہ ذمہ دار پولیس حکام کے خلاف کیرالا اور راجستھان میں نیز عدالتوں میں قانونی کارروائی کی جائے گی۔ راہول گاندھی نے کہا کہ امیت شاہ کے ماتحت دہلی پولیس کی بربریت کو بغیر جوابدہی کے نہیں جانے دیا جائے گا۔ راہول گاندھی نے 1930 میں دھراسنا ستیہ گرہ کی مثال دیتے ہوئے کہا کہ سروجنی نائیڈو کی قیادت میں نہتے ستیہ گرہیوں نے پولیس کی لاٹھیاں سہیں، لیکن کسی نے ہاتھ نہیں اٹھایا۔ انہوں نے کہا کہ پولیس ہڈیاں توڑ سکتی ہے ، ستیہ گرہ نہیں توڑ سکتی۔ انہوں نے کہا کہ ملک کے نوجوان، بالخصوص لڑکیاں، بے خوف، مضبوط اور متحد ہیں اور جمہوریت کی حفاظت کیلئے کھڑی ہیں۔ انہوں نے نوجوانوں کے ساتھ کھڑے رہنے کا عزم ظاہر کیا۔