ٹائیگر شروف فائرنگ کیس : کیلیفورنیا سے 34 ہزار روپے کی سپاری، بیرونِ ملک ملازمت کا جھانسہ دینے کی اطلاعات

ممبئی۔ 20 اکتوبر (یو این آئی) بالی ووڈ اداکار ٹائیگر شروف سے متعلق فائرنگ کے معاملے کی تحقیقات کے دوران کئی چونکا دینے والے دعوے سامنے آئے ہیں۔ سوشل میڈیا پر گردش کرنے والی اطلاعات کے مطابق، مبینہ ملزمین کو کیلیفورنیا سے تقریباً 34 ہزار روپے کے عوض فائرنگ کی واردات انجام دینے کا ٹھیکہ دیا گیا تھا اور انہیں بیرونِ ملک ملازمت دلانے کا لالچ بھی دیا گیا تھا۔ اطلاعات کے مطابق، واردات کے بعد ملزمین نے اپنی شناخت چھپانے کے لیے ٹرین میں سفر کے دوران تین مرتبہ بال کٹوائے اور لباس بھی تبدیل کیا۔ بعد ازاں مبینہ طور پر انہوں نے لوکل ٹرین سے سفر کیا اور آن لائن ٹیکسی کے ذریعہ سورت پہنچے ۔ تحقیقاتی ایجنسیاں اب ملزمین کی نقل و حرکت، ان کے رابطوں اور واردات کے بعد فرار ہونے کے پورے سلسلے کی کڑیاں جوڑنے اور انل پنڈت کے مبینہ کردار کی بھی جانچ کیے جانے کی اطلاعات ہیں۔ ممبئی پولیس کی کرائم برانچ حملے کی سازش، ملزمین کو مبینہ طور پر فراہم کیے گئے اسلحے اور اس کے حصول کے ذرائع کے علاوہ اس نیٹ ورک کی بھی چھان بین کر رہی ہے جس کے ذریعہ واردات کو انجام دیا گیا۔ تاہم کیلیفورنیا سے مبینہ سپاری دیے جانے سے متعلق دعوؤں کی تاحال تصدیق نہیں ہوئی ہے ۔