روس اور ایران نے پہلے کبھی اتنی قریبی سطح پر کام نہیں کیا: عراقچی

تہران ۔ 20 اکٹوبر (ایجنسیز) ایران کے وزیرِ خارجہ عباس عراقچی نے منگل کے روز کہا ہے کہ روس اور ایران نے پہلے کبھی اتنی قریبی سطح پر کام نہیں کیا۔یہ بیان ایسے وقت میں آیا ہے جب ماسکو شرقِ اوسط جنگ میں ثالث کا کردار ادا کرنے کا خواہاں ہے۔عراقچی نے پیر کے روز ایران میں اپنے روسی ہم منصب سرگئی لاوروف کا خیرمقدم کیا جو تنازعہ شروع ہونے کے بعد سے ان کا اولین دورہ ہے۔عراقچی نے ایکس پر لکھا، ہم نے یورپ سے لے کر مغربی ایشیا تک تمام امور پر بات کی جن میں لبنان، فلسطین، یوکرین اور یمن شامل ہیں۔ اس کے علاوہ اقتصادی اور جوہری تعاون کو وسعت دینے پر بھی توجہ مرکوز کی گئی۔نیز کہا، ہماری تاریخ میں ایران اور روس نے کبھی بھی اتنی قریبی سطح پر کام نہیں کیا جتنا کہ اب کر رہے ہیں۔ماسکو کی کوششوں کا مقصد ایک بڑی جنگ کے دوبارہ بھڑک اٹھنے کو روکنا ہے خصوصاً ایسے وقت میں جب امریکہ اور ایران کے درمیان مذاکرات تعطل کا شکار ہیں، دورے سے قبل لاوروف نے کہا تھا۔ماسکو ثالثی کی کوششوں میں اپنا کردار ادا کرنے کیلئے تیار ہے، یہ بات روسی صدر ولادیمیر پوتن نے رواں ماہ اپنے ایرانی ہم منصب مسعود پزشکیان سے کہی تھی اور لاوروف کا دورہ اس پیش رفت کے بعد ہو رہا ہے۔روس اور ایران جو دنیا میں سب سے زیادہ پابندیوں کا سامنا کرنے والے ممالک میں شامل ہیں، باہم قریبی تعلقات رکھتے ہیں۔دورہ ایران سے قبل روسی وزارتِ خارجہ نے یہ توقع ظاہر کی تھی کہ ملاقات میں ایران کے خلاف امریکہ اور اسرائیل کی غیر قانونی جارحیت سے پیدا ہونے والے شدید بین الاقوامی بحران کو حل کرنے کے طریقوں پر توجہ مرکوز کی جائے گی۔وزارت نے کہا، یہ جنگ نہ صرف نزدیک و شرقِ اوسط بلکہ عالمی سطح پر بھی استحکام اور سلامتی کیلئے ایک دھچکا ثابت ہوئی ہے۔