നിർണായക നിർദ്ദേശവുമായി കേരളാ ഹൈക്കോടതി, 'ജുവനൈൽ കേസുകളിലെ പ്രായപരിധി 18 ൽ നിന്നും 16 ആക്കി മാറ്റുന്നത് പരിഗണിക്കണം', സ്വാഗതം ചെയ്ത് ചെന്നിത്തല

കൊച്ചി : കുറ്റകൃത്യങ്ങളിൽ ഉൾപ്പെടുന്ന കുട്ടികളുടെ ജുവനൈൽ കേസുകളിലെ പ്രായപരിധി 18 വയസ്സിൽ നിന്നും 16 വയസാക്കുന്നത് പരിഗണിക്കണമെന്ന് കേരളാ ഹൈക്കോടതി. നിലവിലെ സാഹചര്യം വിലയിരുത്തുമ്പോൾ 16 വയസിൽ കുട്ടികൾക്ക് മതിയായ മാനസിക വളർച്ചയും പക്വതയും വരുന്നുവെന്നാണ് വ്യക്തമാകുന്നതെന്നും കാലാനുസിതമായി ഉചിതമായ തീരുമാനമെടുക്കുന്നത് നിയമനിർമ്മാണ സഭകൾ ആലോചിക്കണമെന്നും ഹൈക്കോടതി നിർദ്ദേശിച്ചു. വയസെന്നത് കേസിൽ നിന്നും രക്ഷപ്പെടാനുള്ള പഴുതായി മാറുന്നു. പല കേസുകളിലും കോടതിക്ക് നടപടിയെടുക്കാൻ കഴിയാതെ പോകുകയാണെന്നും, വൈകാരികമായി നടപടികളെടുക്കാൻ കോടതിക്ക് കഴിയില്ലെന്നും ഹൈക്കോടതി ചൂണ്ടിക്കാട്ടുന്നു.23 ന് താഴെ ഉള്ളവർക്ക് മദ്യം നൽകുന്നത് കർശനമായി തടയണമെന്നാവശ്യപ്പെട്ടുള്ള ഹർ‍ജി പരിഗണിച്ചപ്പോഴാണ് കോടതിയുടെ നിർദ്ദശം.23 വയസ്സിന് താഴെയുള്ളവർക്ക് മദ്യം വിളമ്പുന്നതും വിൽക്കുന്നതും കർശനമായി തടയണമെന്ന് ആവശ്യപ്പെട്ട് മാധ്യമപ്രവർത്തകൻ വിനോദ് വിക്രമൻ പിള്ള സമർപ്പിച്ച ഹർജി പരിഗണിക്കവെയാണ് കോടതിയുടെ സുപ്രധാന നിർദ്ദേശം. കേരള അബ്കാരി നിയമത്തിലെ സെക്ഷൻ 15A, 15B എന്നിവ പ്രകാരം 23 വയസ്സിന് താഴെയുള്ളവർക്ക് മദ്യം നൽകുന്നത് നിരോധിച്ചിട്ടുണ്ടെങ്കിലും ബാറുകളിലും മറ്റും ഇത് ലംഘിക്കപ്പെടുകയാണെന്ന് ഹർജിയിൽ ചൂണ്ടിക്കാട്ടിയിരുന്നു. 18 വയസ്സിന് താഴെയുള്ളവർ മദ്യപിച്ച് വാഹനമോടിച്ചുണ്ടായ മാരകമായ അപകടങ്ങൾ കോടതി പരാമർശിച്ചു. നെടുമ്പാശ്ശേരിയിൽ 19-കാരൻ മദ്യപിച്ച് കാറോടിച്ചുണ്ടായ അപകടത്തിൽ മൂന്നുപേർ മരിച്ച സംഭവവും ഹർജിയിൽ ഉന്നയിച്ചിരുന്നു. തിരുവനന്തപുരം പാങ്ങപ്പാറയിൽ 17 വയസുകാരനെ മറ്റൊരു 17 കാരൻ കൊലപ്പെടുത്തിയ കേസടക്കം വന്ന വേളയിൽ ഇത് ചർച്ചയായിരുന്നു.ജുവനൈൽ നിയമത്തിൽ ഭേദഗതി ആവശ്യമെന്ന് ചെന്നിത്തലജുവനൈൽ നിയമത്തിൽ ഭേദഗതി ആവശ്യമെന്ന് ആഭ്യന്തരവകുപ്പ് മന്ത്രി രമേശ് ചെന്നിത്തല ചൂണ്ടിക്കാട്ടി. പ്രായം മുതലെടുത്തു വരെ കുറ്റകൃത്യം നടക്കുന്നു. നേരത്തെയും തന്റെ നിലപാട് ഇത് തന്നെയായിരുന്നു. ഹൈകോടതി ഇപ്പോൾ ഇക്കാര്യം പറഞ്ഞതിൽ സന്തോഷമുണ്ട്. 18 വയസുള്ളവർ കുറ്റകൃത്യം ചെയ്താലും ഇളവ് കിട്ടും എന്നാണ് കരുതുന്നത്. പ്രായത്തിന്റെ ഇളവിൽ കുറ്റകൃത്യം അംഗീകരിക്കാൻ കഴിയില്ലെന്നും ചെന്നിത്തല അഭിപ്രായപ്പെട്ടു.